ރާއްޖޭގެ ކުޅިވަރު ތަރިން އަވަށްޓެރި އިންޑިއާގައި ކުޅޭ މަންޒަރު ދެކެން ބޭނުންވާ ކަމަށް އެ ގައުމުން ރާއްޖެއަށް ކަނޑައަޅުއްވާފައިވާ ސަފީރު އަކިލޭޝް މިޝްރާ ވިދާޅުވެއްޖެއެވެ.

އެމަނިކުފާނު މިހެން ވިދާޅުވެފައިވަނީ އިންޑިއާގެ ޓީވީ ޗެނަލްއެއް ކަމަށްވާ "ނިއުސް 18" އިން ނޭޕާލްގެ ކުޅުންތެރިޔަކު އިންޑިއަން ޕްރިމިއާ ލީގުގެ ޓީމަކަށް ބަދަލުވި ހަބަރު ހިމާނާފައިވާ ޓްވީޓެއް ޝެއާ ކުރައްވަމުންނެވެ. ރައީސުލްޖުމްހޫރިއްޔާގެ އޮފީހާއި މިނިސްޓްރީ އޮފް ޔޫތު އެންޑް ސްޕޯޓްސް ޓެގް ކުރައްވާ އެމަނިކުފާނު ކުރެއްވި ޓްވީޓުގައި ވަނީ ރާއްޖޭގައި ކުޅިވަރު ކުޅޭ އެތަކެއް ހުނަރުވެރިން އެބަތިބި ކަމަށާއި ކުޅިވަރުގެ ކަންކަމަށް ރާއްޖޭގެ ކުޅުންތެރިން ބޮޑު ޝައުގުވެރިކަމެއް ދެމުންދާ ކަމަށެވެ. ހަމައެހެންމެ ރާއްޖެ އާއި އިންޑިއާ ދެމެދު ކުޅިވަރުގެ ރޮނގުން އެއްބާރުލުން ދިނުމަށް ބޮޑު ފުރުސަތުތަކެއް ހުޅުވިފައިވާ ކަމަށް ވެސް މިޝްރާގެ ޓްވީޓުގައި ފާހަގަކުރައްވާފައިވެއެވެ. ހަމައެހެންމެ ރާއްޖޭގެ ކުޅިވަރު ތަރިން އިންޑިއާގައި ވިދާ މަންޒަރު ފެނުމަކީ ދެކެން ވަރަށް ބޭނުންވާ މަންޒަރެއް ކަމަށް ވެސް މިޝްރާގެ ޓްވީޓުގައިވެއެވެ.

މިޝްރާ ޝެއާ ކުރެއްވި ޓްވީޓުގައިވާ ނޭޕާލްގެ ކުޅުންތެރިޔަކީ އުމުރުން 17 އަހަރުގެ ސަންދީޕް ލަމިޗާނޭއެވެ. އޭނާވަނީ އިންޑިއަން ޕްރިމިއާ ލީގު (އައިޕީއެލް) ގެ ޓީމެއް ކަމަށްވާ ދެއްލީ ޑެއާޑެވިލްސްއަށް 20 ލައްކަ ރުޕީސްގެ އަގަކަށް ގެނެސްފައެވެ. އޭނާ ވެގެން ގޮސްފައިވަނީ އައިޕީއެލްގެ ޓީމަކަށް ސޮއިކުރި ނޭޕާލްއަށް ނިސްބަތްވާ ފުރަތަމަ ކުޅުންތެރިޔާއަށެވެ. އައިޕީއެލްއަކީ ދުނިޔޭގެ އެންމެ ބޮޑު ކްރިކެޓް ލީގުގެ ގޮތުގައި ގިނަ ބަޔަކު ދެކޭ ލީގެވެ.

މިޝްރާ މިފަދައިން ޓްވީޓު ކުރައްވާފައިވާއިރު އިންޑިއާއަކީ ކުޅިވަރުގައި ރާއްޖެއަށް ބޮޑެތި އެހީތަކެއް ވަމުން އަންނަ ގައުމެކެވެ. އެ ގައުމުގައި ރާއްޖޭގެ ކުޅުންތެރިން ތަމްރީނުތައް ވެސް ފުރިހަމަކުރާއިރު ރާއްޖޭގެ ކުޅިވަރުގެ އިންފްރާސްޓްރަކްޗަރ ތަރައްގީ ކުރުމަށް ވެސް އިންޑިއާއިން އެހީތެރިކަން ފޯރުކޮށްދެއެވެ. ފުޓްބޯޅައަކީ ރާއްޖޭގެ އެންމެ މަގުބޫލު ކުޅިވަރަށްވާއިރު އިންޑިއާއަކީ މި ސަރަހައްދުގައި ރާއްޖެއިން އެންމެ ބޮޑަށް ވާދަކުރާ ގައުމެވެ.