މިދިޔަ އަހަރު ބޭންކް އޮފް މޯލްޑިވްސް އިން 50 މިލިއަން ޑޮލަރު ދަތުރުވެރިންނަށް ވިއްކާފައިވާ ކަމަށް އެ ބޭންކް އިން ހާމަކޮށްފިއެވެ.
ބުރާސްފަތި ދުވަހު ބީއެމްއެލް އިން ނެރުނު ނޫސްބަޔާނެއްގައި ވަނީ މިދިޔަ އަހަރު އެ ބޭންކުން މުޅިން އަލަށް ޔޫއެސް ޑޮލަރުގެ އޭޓީއެމްއެއް ހުޅުވާފައިވާ ކަމަށާއި 300 މިލިއަން ޑޮލަރު އެ އޭޓީއެމް މެދުވެރިކޮށް އާންމުން ނަގާފައިވާ ކަމަށެވެ.
މީގެ އިތުރުން މިދިޔަ އަހަރު ގައުމުން ބޭރަށްދާ ދިވެހިންނަށް ހާއްސަކޮށްގެން ޑޮލަރުގެ އައު އޮންލައިން ބުކިންގް ސިސްޓަމެއް ތައާރަފު ކޮށްފައިވާ ކަމަށް ވެސް ބީއެމްއެލް އިން ބުންޏެވެ. މީގެ ސަބަބުން ދިގު ކިއުގައި ހުރެ ހިދުމަތް ހޯދަން ނުޖެހި، ފަސޭހަ ގޮތްތަކެއް ހަމަޖެހިގެންދިޔަ ކަމަށް ވެސް ބޭންކުން ވަނީ ފާހަގަކޮށްފައެވެ.
ރާއްޖޭން ބޭރަށް ދަތުރުކުރާ ދިވެހިންނަށް ފަސޭހަކަމާ އެކު ޑޮލަރު ފޯރުކޮށްދިނުމަށް ބީއެމްއެލް އިން އޮންލައިންކޮށް ބުކިންގ ހައްދައިގެން ޑޮލަރު ލިބޭނެ ނިޒާމް ތައާރަފްކޮށްފައިވަނީ މިދިޔަ އަހަރުގެ ޖެނުއަރީ މަހުގައެވެ.
