ނަވާރަ އަހަރަށް ފަހު، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)ގެ ބޯޑު އޭނާއާ ނުލައި އެކުލަވާލައިފި އެވެ.
ނަވާރަ ސަތޭކަ އައްޑިހަ ދެ ވަނަ އަހަރު މަޓީ އުފެއްދި ބޭފުޅުންގެ ތެރޭގައި ހިމެނިވަޑައިގަންނަވާ ގާސިމް، މިފަހަރުގެ ބޯޑްގައި ނުހިމެނި ނަމަވެސް، އޭނާގެ ދެ ދަރިކަލުންކަމުގައިވާ އިބްރާހިމް ސިޔާދު ގާސިމާއި އިސްމާއީލް ސިޔާން ގާސިމް ވަނީ ބޯޑުގައި ހިމަނައިފަ އެވެ.
ރިޝްވަތު ހުށަހެޅިކަމުގެ ކުށް ސާބިތުކޮށް ތިން އަހަރާއި ދެ މަހާއި 12 ދުވަހަށް ގާސިމް ޖަލަށް ލުމަށް ހުކުމްކޮށްފައިވާއިރު، އޭނާ ރާއްޖޭން ބޭރުގައި އުޅުއްވާތާ ގިނަ ދުވަސްތަކެއް ވަނީ ވެފައެވެ.
ހޯމަ ދުވަހު ކުރުނބާ މޯލްޑިވްސްގައި ބޭއްވި އަހަރީ އާންމު ޖަލްސާގައި މަޓީގެ ބޯޑު އެކުލަވާލާފައި ވާއިރު، އެ ޖަމިއްޔާގެ ޗެއާމަނަކަށް މި ފަހަރު ވެސް ހަމަޖެއްސީ ޔުނިވާސަލްގެ ޗެއާމަން މުހަންމަދު އުމަރު މަނިކެވެ. ވައިސް ޗެއާމަންގެ ގޮތުގައި ހަމަޖެއްސެވީ އެ ބޯޑުގައި ހިމެނިވަޑައިގަންނަވާ ވޮޔެޖަސް މޯލްޑިވްސްގެ ޑިރެކްޓަރު ސޮލާހު ޝިހާބެވެ. އަލަށް އެ ބޯޑަށް އައްޔަންކުރެއްވީ ސަން ޓްރެވަލްގެ ފަރާތުން ޒުލޭހާ މަނިކާއި މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)ގެ މެނޭޖިން ޑިރެކްޓަރު އާދިލް މޫސާ އެވެ.
