މެންޗެސްޓާ ޔުނައިޓެޑާއެކު ހަދާފައިވާ އެއްބަސްވުން އާކުރަން އެ ޓީމުގެ ކޯޗު ހޯސޭ މޮރީނިއޯ ތައްޔާރު ކަމަށް ރިޕޯޓުތައް ބުނެފިއެވެ.

ބީބީސީ ސްޕޯޓްސްއިން ބުނީ މޮރީނިއޯގެ އޭޖެންޓް އާއި ޔުނައިޓެޑްގެ މެނޭޖްމަންޓާއި ދެމެދު ކޮންޓްރެކްޓް އާކުރުމުގެ މަޝްވަރާތައް ވަރަށް ބާރަށް ކުރެވެމުންދާ ކަމަށާއި ވަރަށް އަވަސް މުސްތަގުބަލެއްގައި އޭނާ އާ ކޮންޓްރެކްޓެއްގައި ސޮއިކުރާނެ ކަމަށެވެ. މި މަޝްވަރާތައް ކުރިޔަށް މިދަނީ މޮރީނިއޯ ޔުނައިޓެޑް ދޫކޮށްލަން އުޅޭ ކަމަށް ބުނެ މީޑިއާތަކުން ރިޕޯޓުކޮށްފައިވާ ދަނޑިވަޅެއްގައެވެ.

ބައެއް މީޑިއާތަކުން ރިޕޯޓުކޮށްފައިވާ ގޮތުގައި ކުޅުންތެރިން ގެނައުމަށް މޮރީނިއޯއަށް ހަވާލުކޮށްފައިވާ ބަޖެޓާއި މެދު އޭނާ ވަރަށް ހިތްހަމަ ނުޖެހިފައި ހުރި ކަމަށެވެ. ހަމައެހެންމެ އޭނާ މިހާރު ހުންނަ ހޮޓަލުން އެހެން ތަނަކަށް ބަދަލުވުމަށް ޔުނައިޓެޑުން އެދުމުން އެކަމަށް ވެސް އޭނާ އިންކާރު ކޮށްފައިވާ ކަމަށް ރިޕޯޓުތައް ބުނެއެވެ.

މީޑިއާތަކުން ފަތުރަމުންދާ ވާހަކަތަކަށް ރައްދު ދެމުން މޮރީނިއޯ ބުނެފައިވަނީ އެފަދަ ވާހަކަތަކަށް ޖަވާބު ދޭން ނުޖެހޭ ކަމަށާއި އެއީ އެއްވެސް ހަގީގަތެއް އެކުނުލެވޭ ހޮޅި ވާހަކަތަކެއް ކަމަށެވެ. އެފަދަ ވާހަކަތަކުގެ ސަބަބުން ނޭދެވޭ އަސަރު ހުރިކަން ހާމަކުރަމުން މޮރީނިއޯ ބުނެފައިވަނީ އޭނާގެ ޕްރޮފެޝަނަލް ކަމާއިމެދު ސުވާލު އުފެއްދުމުގެ ފުރުސަތު އެއްވެސް މީހަކަށް ނޯންނާނެ ކަމަށެވެ.

ހަމައެހެންމެ އޭނާ ބުނީ ކޮންޓްރެކްޓުގައި އަދި ބާކީ އެއް އަހަރު އެބައޮތް ކަމަށާއި އޭނާ ކޮންޓްރެކްޓުގެ މުއްދަތު އިތުރުކުރާނީ ކްލަބުގައި މަޑުކުރަން ބޭނުން ވެގެންކަން ވެސް އެންމެނަށް ވަރަށް ސާފުކޮށް ކިޔައިދޭން ބޭނުންވާ ކަމަށެވެ. އަދި އުއްމީދަކީ ދިގު މުއްދަތެއް ވަންދެން ޔުނައިޓެޑްގެ ކޯޗުގެ ގޮތުގައި ދެމިހުރުން ކަމަށާއި ކޮންޓްރެކްޓް އައުކުރުމާއި މެދު ގޮތެއް ވަރަށް އަވަހަށް ނިމިގެންދާނެ ކަމަށް މޮރީނިއޯ ބުނެފައިވެއެވެ.

ޔުނައިޓެޑްގެ ކޯޗުގެ މަގާމުގައި މޮރީނިއޯ ބެހެއްޓުމަށް އެ ކްލަބްގެ މެނޭޖްމަންޓުން ވެސް ބޭނުންވާއިރު، މިކަމަށް މަގުފަހި ކުރުމުގެ ގޮތުން އެ ޓީމުން އަންނަނީ އާސެނަލްއަށް ކުޅެމުން އަންނަ ޗިލީގެ ފޯވާޑް އެލެކްސިސް ސަންޗޭޒް އެ ޓީމަށް ގެނައުމުގެ މަސައްކަތް ކުރަމުންނެވެ.

ސަރ އެލެކްސް ފާގަސަންއާއި ސަރ މެޓް ބުސްބީގެ ފަހުން ޔުނައިޓެޑްގެ ކޯޗުގެ މަގާމުގައި އެންމެ ގިނަ ދުވަހު ދެމިހުރި ކޯޗަކީ ރޮން އެޓްކިންސަންއެވެ. އެގޮތުން ފާގަސަން 27 އަހަރު ޔުނައިޓެޑްއަށް އިރުޝާދު ދިން އިރު ބުސްބީ ވަނީ 24 އަހަރު އެ ޓީމަށް އިރުޝާދު ދީފައެވެ. ހަމައެހެންމެ އެޓްކިންސަން ވަނީ ފަސް އަހަރާއި ފަސް މަސްދުވަހު އެ ޓީމަށް އިރުޝާދު ދީފައެވެ. މޮރީނިއޯގެ އަމާޒަކީ މި ރެކޯޑުތައް މުގުރާލުން ކަމަށް ބެލެވެއެވެ.

އުމުރުން 54 އަހަރުގެ ކޯޗު ޔުނައިޓެޑާއެކު ހަދާފައިވާ ކޮންޓްރެކްޓުގެ މުއްދަތު ހަމަވާނީ 2019 ވަނަ އަހަރުއެވެ. އޭނާގެ ފުރަތަމަ ސީޒަނުގައި އެ ޓީމަށް އިނގިރޭސި ލީގު ކަޕްއާއި ޔުރޮޕާ ލީގު ކާމިޔާބުކޮށްދިން ނަމަވެސް މި ސީޒަނުގެ ކުރީކޮޅު އެ ޓީމުން ދެއްކި ކުޅުން ސީޒަނުގެ މިހާ ހިސާބަށް އައިއިރު ދެމެހެއްޓިފައެއް ނުވެއެވެ. ޔުއެފާ ޗެމްޕިއަންސް ލީގުގެ ދެވަނަ ބުރުން އެ ޓީމު ޖާގަ ހޯދާފައިވާއިރު ޔުނައިޓެޑް އޮތީ އިނގިރޭސި ޕްރިމިއާ ލީގުގެ ތާވަލުގެ އެއްވަނައިގައި އޮތް ޕެޕް ގާޑިއޯލާގެ މެންޗެސްޓާ ސިޓީއަށްވުރެ 12 ޕޮއިންޓް ފަހަތުން ތާވަލުގެ ދެވަނައިގައެވެ.