ރެޑްވޭވް އިން އިލްކްޓްރޯނިކްސް ސާމާނު ވިއްކާ ފިހާރައެއް "ރެޑްވޭވް ޑިޖިޓަލް ސެންޓަރ"ގެ ނަމުގައި އާދިއްތަ ދުވަހުގެ ރޭ ހުޅުވައިފިއެވެ.
މި ފިހާރަ ހުޅުވައިދެއްވަމުން ރެޑްވޭވްގެ ޖެނަރަލް މެނޭޖަރު އިބްރާހިމް ޝުޖާއު ވިދާޅުވީ މި އިލެކްޓްރޯނިކްސް ފިހާރައަކީ މޯބައިލް ފޯން ވިއްކުމަށް ހާއްސަކޮށްގެން ހުޅުވި ފިހާރައެއް ކަމަށާއި މިއަންނަ އަހަރާ ދިމާކޮށް ފިހާރަ ހުޅުވަން ނިންމި ނަމަވެސް ކަސްޓަމަރުންގެ އެދުމުގެ މަތިން ފިހާރަ އަވަހަށް ހުޅުވީ ކަމަށެވެ.
ރޭޑްވޭވްގެ އަމާޒަކީ ހަމައެކަނި ކާބޯތަކެތި ފޯރުކޮށްދިނުން ނޫންކަން ފާހަގަކުރައްވައި ޝުޖާއު ވިދާޅުވީ ކަސްޓަމަރުން ބޭނުންވާ ކޮންމެ ދާއިރާއަކުން ވިޔަފާރި ފުޅާކުރަން ނިންމާފައިވާ ކަމަށެވެ.
މީގެ އިތުރުން ކަސްޓަމަރުންނަށް އަގުހެޔޮ، ފެންވަރު ރަނގަޅު ޕްރޮޑަކްޓްތަކެއް މި ފިހާރައިން ލިބިގެންދާނެ ކަމަށް ޝުޖާއު ވިދާޅުވިއެވެ.
މި ފިހާރައިން ވިއްކާ ތަކެތީގެ ތެރޭގައި ޓީވީ، މޮބައިލް ފޯން، ކޮންޕިއުޓަރ. ލެޕްޓޮޕް، ޕީއެސް، ކާޓްރިޖް ފަދަ ސާމާނުތައް ހިމެނެއެވެ.
މި އަންނަ އަހަރާ ދިމާކޮށް ރޭޑްވޭވް ޑިޖިޓަލް ސެންޓަރުން ހާއްސަ ޕްރޮމޯޝަނެއް ފަށާނެ ކަމަށް ވެސް އެ ފިހާރަ އިން މައުލޫމާތުދެއެވެ.
