ރައްޔިތުންގެ މަޖިލީހުގެ މެމްބަރުންގެ އިތުބާރު ގެއްލިފައިވާ ބޭފުޅަކު ރިޔާސަތުގައި އިންވައިގެން ބާއްވާ ޖަލްސާއެއް ޤާނޫނު އަސާސީއާ ޚިލާފްވާނެ ކަމަށް ކުރީގެ ރައީސް މައުމޫން އަބްދުލް ޤައްޔޫމް ވިދާޅުވެއްޖެއެވެ.
All sittings of @mvpeoplesmajlis chaired by someone who has lost the confidence of majority of MPs would clearly be unconstitutional
— Maumoon Abdul Gayoom (@maumoonagayoom) October 9, 2017
އެމަނިކުފާނު މިހެން ވިދާޅުވީ ހޯމަ ދުވަހު ކުރެއްވި ޓްވީޓެއްގައެވެ. ރައީސް މައުމޫން މިމޭރުމުން ޓްވީޓްކުރައްވާފައިވާއިރު، ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލައެއް 46 މެމްބަރުން ސޮއިކުރައްވައި މަޖިލީހަށް މީގެ ކުރިން ވައްދާފައި ވެއެވެ. މަޖިލީހުގެ ސާފު މެޖޯރިޓީ ޕީޕީއެމްއަށް ގެއްލުނު ނަމަވެސް، ޤާނޫންތަކަށް ގެނެވުނު ބަދަލުތަކާ އެކު ޕީޕީއެމް ގެންދަނީ މަޖިލީހުގެ މެޖޯރިޓީ ހޯދުމަށް އަދިވެސް މަސައްކަތްކުރަމުންނެވެ.
މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމަށް މަޖިލީހުގެ އަޣުލަބިއްޔަތު މެމްބަރުން ސޮއިކުރައްވާފައި ވާތީ، އަދި އެމައްސަލަ އެޖެންޑާކުރުމަށް ރިޔާސަތުން ދެކޮޅު ހަދާފައިވާތީ މަޖިލީހުގެ ޖަލްސާތައް ސައްހަނުވާނެ ކަމަށް އިދިކޮޅު މެމްބަރުން ދަނީ ބުނަމުންނެވެ. އަދި މިމައްސަލައިގައި ސަރުކާރަށް ފާޑުވިދާޅުވުމުގެ އެންމެ ކުރީގައި ހުންނެވި އެއްބޭފުޅަކީ ރައީސް މައުމޫނެވެ. އަދި ރައީސް މައުމޫންގެ ދަރިކަލުން ދިއްގަރު ދާއިރާގެ މެމްބަރު ފާރިސް މައުމޫން ހުންނެވީ މެމްބަރުންނަށް ރިޝްވަތު ދިންކަމުގެ ތުހުމަތެއްގައި ޖަލު ބަންދެއްގައެވެ. އެމަނިކުފާނު ޖަލުގައި ހުންނަވާތާ މިހާރު ދެ މަހަށް ވުރެ ގިނަ ދުވަސްވަނީ ވެފައެވެ.