އިސްރާއީލް އިން ޣައްޒާގައި ހިންގަމުން އައި ހަނގުރާމަ ހުއްޓާލުމަށް އެކުލަވާލާފައިވާ އެއްބަސްވުމަކީ ވަރަށް ބާރު ގަދަ އެއްބަސްވުމެއް ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕްގެ އިސް ނެންގެވުމުގެ މަތިން ހަނގުރާމަ ހުއްޓާލުމުގެ އެއްބަސްވުން ޤާއިމު ކޮށްފައިވާއިރު، އެމެރިކާ އިން ވަނީ އެއްބަސްވުމުގެ ފުރަތަމަ މަރުހަލާ ނިމިފައިވާ ކަމަށް މީގެ ކުރިން ހާމަ ކޮށްފަ އެވެ. އަދި އެއްބަސްވުމާ އެއްގޮތަށް ހުރިހާ ފަރާތްތަކަކުން ވެސް އަމަލު ކުރަމުން ގެންދޭތޯ ކަށަވަރު ކުރާނެ ކަމަށް ވެސް އެމެރިކާ އިން އަންނަނީ ބުނަމުންނެވެ.

ނަމަވެސް، ހަމާސް އާއި އިސްރާއީލް އިން ވެސް މިހާރު އަންނަނީ އެއް ބަޔަކު އަނެއް ބަޔަކަށް ތުހުމަތު ކުރުމަށް ފަހު، އިންޒާރުގެ ބަސްތައް ރައްދު ކުރަމުންނެވެ. އެގޮތުން ހަމާސް އިން ބުނަމުން އަންނަނީ އިސްރާއީލް އިން އެއްބަސްވުމާ ޚިލާފުވާ ކަމަށާއި، އިސްރާއީލް އިން ބޭނުން ވަނީ އަނެއްކާ ވެސް ހަމަލާތައް ފެށުމަށް ކަމަށެވެ.

60 މިނެޓު ޕްރޮގްރާމް އަށް ދެއްވި އިންޓަވިޔުއެއްގައި ޓްރަމްޕް ވިދާޅުވެފައި ވަނީ، އޭނާ ކުރެއްވި ވަރަށް ބުރަ މަސައްކަތަކުން އެކުލަވާލެވިފައިވާ ހަނގުރާމަ ހުއްޓާލުމުގެ އެއްބަސްވުމަކީ ނުރައްކާތެރި އެއްބަސްވުމެއް ނޫން ކަމަށެވެ. އަދި ހަމާސް ޖަމާއަތުން، އެ ޖަމާއަތުގެ ހަތިޔާރުތައް ބަހައްޓަން ޖެހޭނެ ކަމަށާއި، އެހެން ނޫން ނަމަ އެ ޖަމާއަތް ނައްތާލާނެ ކަމަށް ވެސް ޓްރަމްޕް އިންޒާރު ދެއްވާފައިވެ އެވެ.

ޣައްޒާ ހަނގުތާމަ ހުއްޓާލުމުގެ އެއްބަސްވުން ނުރައްކާތެރި ނޫން ކަމަށް ފާހަގަ ކުރައްވައި ޓްރަމްޕް ވިދާޅުވީ، އެއީ ވަރަށް ބާރު ގަދަ އެއްބަސްވުމެއް ކަމަށެވެ. އަދި ހަމާސް ޖަމާއަތުން ދައްކަމުން އަންނަ ވާހަކަ ވެސް އަޑު އިވޭ ކަމަށް ޓްރަމްޕް ވިދާޅުވި އެވެ. އެހެން ނަމަވެސް، އެ ޖަމާއަތަށް ވެސް ޖެހޭނީ އެއްބަސްވުމަކަށް އަމަލު ކުރަން ކަމަށާއި، އެ ނޫން ނަމަ ވަގުތުން އެ ޖަމާއަތް ނައްތާލެވޭނެ ކަމަށް ޓްރަމްޕް ވިދާޅުވި އެވެ.

ޣައްޒާ ހަނގުރާމަ ހުއްޓާލުމުގެ އެއްބަސްވުމުގެ ދަށުން ހަމާސް ޖަމާއަތުން، އެ ޖަމާއަތުގެ ހަތިޔާރު ބަހައްޓަން ޖެހެ އެވެ. އެއީ އެމެރިކާ އާއި، އިސްރާއީލް އިން ވެސް ބޭނުންވާ ގޮތެވެ. ނަމަވެސް، މިހާތަނަށް ހަމާސް އިން އެކަމަށް އެއްބަސްވެފައި ނުވެ އެވެ. ހަމާސްގެ ހަތިޔާރު ނައްތާލާނީ ކިހިނެއްތޯ ސުވާލު ކުރުމުން ޓްރަމްޕް ވިދާޅުވީ، އޭނާ ބޭނުން ނަމަ ވަރަށް އަވަހަށް އެކަން ކުރެވޭނެ ކަމަށެވެ. އެހެން ނޫން ނަމަ، ހަމާސް ޖަމާއަތް ނައްތާލާނެ ކަމަށް ތަކުރާރުކޮށް ޓްރަމްޕް ވިދާޅުވި އެވެ.

ހަނގުރާމަ ހުއްޓާލުމުގެ އެއްބަސްވުން ޤާއިމު ކުރުމުގެ ކުރިން ޓްރަމްޕް ވަނީ، 20 ނުކުތާގެ މައްޗަށް އެކުލެވޭ ޕްލޭނެއް ވެސް ހުށަހަޅުއްވައިފަ އެވެ. އެ ޕްލޭން ގައި ހިމެނޭ ކަންތައްތަކާ އެއްގޮތަށް، ހަނގުރާމަ ހުއްޓާލުމުގެ މަރުޙަލާ ތަކަށް ކުރިއެރުމެއް ލިބިފައިވާ ކަމުގެ ހެއްކެއް މިހާތަނަށް ފެންނަން ނެތެވެ. ހަމަ އެއާއެކު، ހަމާސްގެ ހަތިޔާރުތައް ބެހެއްޓުމާއި، އިސްރާއީލްގެ ސިފައިން ޣައްޒާ އިން ފައިބައިގެން ދިޔުމުގެ ވަގުތު ކަނޑަ އެޅުން ފަދަ ކަންކަމުގައި ވަނީ ހުރަސް ތަކެއް ކުރިމަތިވެފަ އެވެ.

ހަނގުރާމަ ހުއްޓާލުމުގެ އެއްބަސްވުމުގެ ދަށުން ހަމާސް އިން ވަނީ އެ ޖަމާއަތުގެ ބެލުމުގެ ދަށުގައި ތިބި ރަހީނުންގެ ތެރެއިން ދިރި ތިބި އެންމެން މިނިވަން ކޮށްފަ އެވެ. އަދި މަރުވެފައިވާ ރަހީނުންގެ ތެރެއިން ބައެއް މީހުންގެ ހަށިގަނޑުތައް ހަވާލު ކޮށްފައިވާއިރު، އަދި ވެސް ހަމާސް އިން އަންނަނީ އިތުރު ރަހީނުންގެ ހަށިގަނޑުތައް ހޯދުމުގެ މަސައްކަތް ކުރިއަށް ގެންދަމުންނެވެ.

މީގެ ކުރިން ވެސް ޓްރަމްޕް ވަނީ، އެއްބަސްވުމާ ޚިލާފުވެއްޖެ ނަމަ ހަމާސް ޖަމާއަތް ނައްތާލާނެ ކަމުގެ އިންޒާރު ދެއްވައިފަ އެވެ. އޭރު ޓްރަމްޕް ވިދާޅުވެފައި ވަނީ ހަމާސް ޖަމާއަތާ އެކު ހެދިފައިވާ އެއްބަސްވުމާ އެއްގޮތަށް، އެ ޖަމާއަތް ވަރަށް ރީތިކޮށް އުޅޭނެ ކަމަށެވެ. އެހެން ނަމަވެސް، ރީތި ގޮތުގައި ކުރިއަށް ދާން އެ ޖަމާއަތުން ޚިޔާރު ނުކޮށްފި ނަމަ، އެ ޖަމާއަތް ނައްތާލާނެ ކަމަށް ޓްރަމްޕް އޭރު ވެސް ވިދާޅުވެފައިވެ އެވެ.