ހުޅަނގު އައްސޭރީގެ ޖެނިން ގައި އިސްރާއީލުގެ ސިފައިން އިތުރު ދެ ފަލަސްތީނުގެ ރައްޔިތުން ޝަހީދު ކޮށްލައިފިއެވެ.
ހުސްވި ހަފްތާގެ އަންގާރަ ދުވަހުން ފެށިގެން ޖެނިން ގައި ދެމުންދާ ހަމަލާތަކުގައި މިހާތަނަށް މަދުވެގެން 12 މީހުން ޝަހީދު ކޮށްލައި އަދި އެތައް ބަޔަކު ޒަޚަމްކޮށްލުމަށްފަހު ޖެނިން ރެފިއުޖީ ކޭމްޕުގައި އަސްކަރީ ހަމަލާތައް ފުޅާކުރުމަށް ރާވާފައިވާ ކަމަށް އިސްރާއީލުން ބުނެ އިންޒާރު ވަނީ ދީފައެވެ.
އިސްރާއީލުގެ އަސްކަރިއްޔާ އިންނާއި އިންޓެލިޖެންސް ސަރވިސްއިން ބުނެފައިވަނީ "ގިނަ ފްރޮންޓް ތަކެއް ގައި ހިނގަމުންދާ ހަނގުރާމައެއް" ގެ ތެރެއިން ޖެނިން ގައި ހިންގާ އަސްކަރީ "އޮޕަރޭޝަންތަކެއްގެ ސިލްސިލާއެއް" ކުރިއަށް ގެންދާނެ ކަމަށެވެ.
އިސްރާއީލުން ހިފާފައިވާ ހުޅަނގު އައްސޭރީގައި އިތުރުކޮށްފައިވާ އަސްކަރީ ހަމަލާތަކާއި، ޔަހޫދީ ވަޒަންވެރިންގެ އިތުރުވަމުންދާ އަނިޔާވެރިކަމަކީ ފަލަސްތީނުގެ ސަރަޙައްދުތަކަށް އެމީހުންގެ ބާރު އިތުރަށް ފުޅާކުރުމަށް އިސްރާއީލުން އެންމެ ފަހުން ކުރަމުންދާ މަސައްކަތް ކަމަށް ސިޔާސީ މަސްރަހް ދިރާސާ ކުރާ ފަރާތެއް ކަމަށްވާ މުޙައްމަދު އަލްމަސްރީ އަލްޖަޒީރާ އާ ވާހަކަ ދައްކަމުން ބުނެފައިވެއެވެ.
"މިއީ ހަމަ އެއްގޮތަކަށްވެސް އައު ކަމެއް ނޫން،" ދޯހާ އިންސްޓިޓިއުޓް ފޯ ގްރެޖުއޭޓް ސްޓަޑީޒްގެ މީޑިއާ ސްޓަޑީޒް ޕްރޮގްރާމްގެ ޕްރޮފެސަރ އަލްމަސްރީ އަލްޖަޒީރާ އަށް ބުނެފައިވެއެވެ. "އިސްރާއީލުން އެތައް އަހަރެއް ވަންދެން ބުނަމުން އަންނަނީ އެމީހުން ޓެރަރިޒަމާ ދެކޮޅަށް ހަމައެކަނި ހަނގުރާމަ ކުރަމުންދާ ކަމަށް، އެކަމަކު އެއީ ހަމަ ދޮގު ވާހަކައެއް. އިސްރާއީލުން ބޭނުންވަނީ އަދި ކުރަމުން އަންނަ ކަމަކީ ހުޅަނގު އައްސޭރި އަށް އިސްރާއީލުގެ ސަރަހައްދު އިތުރަށް ފުޅާ ކުރުން."
"750,000 އަށްވުރެ ގިނަ ޣައިރު ޤާނޫނީ އިސްރާއީލީ ވަޒަންވެރިން އެބަތިބި އަދި އެއީ ފަލަސްތީނުގެ ސަރަޙައްދުތަކަށް މަޑުމަޑުން ނަމަވެސް ފުޅާވަމުން ދިއުމަށް އިސްރާއީލު ދައުލަތުން ގެންގުޅޭ ސިޔާސަތެއް،" އަލްމަސްރީ އިތުރުކޮށްފައިވެއެވެ.
އެމެރިކާގެ ރައީސް ޑޮނަލްޑް ޓްރަމްޕް އިންތިޚާބުވުމާއެކު، ހުޅަނގު އައްސޭރި އަށް އިސްރާއީލުން ދަޢުވާކުރާ ކަންތައްތަކަށް ހާމަކަން ބޮޑު ގޮތެއްގައި ތާއީދުކުރާ މަތީ ފަންތީގެ ޑިޕްލޮމެޓުން އައްޔަން ކޮށްފައިވުމަކީ، މީގެ ކުރިން ކުރެވުނު ވަރަށް ވުރެ އިތުރަށް އެމީހުންގެ އެޖެންޑާ ކުރިއަށް ގެންދިއުމަށް އިސްރާއީލަށް ލިބުނު "ތާރީޚީ ފުރުޞަތެއް" ކަމަށް އޭނާ ބުނެފައިވެއެވެ.
