ފަލަސްތީނުގެ ބިމުން ގަދަކަމުން ހިފާފައިވާ ހުޅަނގު އައްސޭރީގެ ހައްގުތައް "ދީނީ ގޮތުން" އިސްރާއީލަށް އޮންނާނެ ކަމަށް އެމެރިކާގެ ރައީސް ކަމަށް ވަޑައިގެންނެވި ޑޮނަލްޑް ޓްރަމްޕް އާއި އދ އަށް އޭނާ ކަނޑައެޅުއްވި އައު ސަފީރު ވިދާޅުވެއްޖެއެވެ.

ޓްރަމްޕް މިހެން ވިދާޅުވިއިރު އިސްރާއީލުގެ ހަމަލާތައް ހުޅަނގު އައްސޭރީގައި ދިރިއުޅޭ ފަލަސްތީނުގެ ރައްޔިތުންނަށް އަމާޒު ކުރުން މި ދަނޑިވަޅުގައި ވަނީ އިތުރުވެފައެވެ.

އިސްރާއީލުން ވަނީ ހުޅަނގު އައްސޭރީގެ ޖެނިންގައި އަސްކަރީ ރެއިޑް އެއް އަންގާރަ ދުވަހު ހިންގާފައެވެ. މި ރެއިޑް ގައި އެއްގަމު އުޅަނދުފަހަރާއި ހެލިކޮޕްޓަރު ބައިވެރިވެފައިވެއެވެ.

ހަރުކަށި ޔަހޫދީ ފިކުރުގެ ހައްދުފަހަނަ އެޅި އިސްރާއީލުގެ ފައިނޭންސް މިނިސްޓަރު ބެޒަލެލް ސްމޮޓްރިޗް، ހާމަ ކޮށްފައިވާ ގޮތުގައި މި އޮޕަރޭޝަނަކީ ހަނގުރާމަވެރި ގްރޫޕް ތަކާ ދެކޮޅަށް ހިންގާ "ވަރުގަދަ އަދި ދެމިގެންދާ ކެމްޕޭނެއްގެ" ފެށުމެވެ. މިއީ ޔަހޫދީ ވަޒަންވެރިންގެ ހިމާޔަތުގައި ހިންގާ ކަމެއް ކަމަށް ވެސް އޭނާ ހާމަކޮށްފައިވެއެވެ.

މީގެ ކުރިން ސްމޮޓްރިޗް ވަނީ ފަލަސްޠީނުންނާ ދެކޮޅަށް ޖަރީމާތައް ހިންގާ ކަމަށް ތުހުމަތު ކުރެވޭ ޔަހޫދީ ވަޒަންވެރިންގެ މައްޗަށް އެމެރިކާ ސަރުކާރުން އަޅާފައިވާ ފިޔަވަޅުތައް ނައްތާލުމަށް ޓްރަމްޕް ނިންމެވި ނިންމެވުމަށް މަރުޙަބާ ކިޔާފައެވެ. އިސްރާއީލު ސަރުކާރުން ގެންދަނީ ހުޅަނގު އައްސޭރީގައި ޔަހޫދީން ވަޒަންވެރި ކުރުވުން ފުޅާ ކުރުމުގެ މަސައްކަތްތައް ކުރަމުން ކަންވެސް އޭނާ ފާހަގަ ކުރެއްވިއެވެ.

ގާތްގަނޑަކަށް 700,000 ޔަހޫދީ ވަޒަންވެރިން. ހުޅަނގު އައްސޭރީގެ އީސްޓް ޖެރޫސަލަމްގައި ދިރިއުޅޭ 2.7 މިލިއަން ފަލަސްޠީނު މީހުންގެ އާބާދީގެ ތެރޭގައި ދިރިއުޅެން ވަނީ ފަށާފައެވެ.

މިއީ 1967 ގައި އިސްރާއީލުން ހިފާފައިވާ ބިމެކެވެ. ގިނަ ޤައުމުތަކުން ދެކޭގޮތުގައި ހަނގުރާމައިގައި ހިފި ސަރަޙައްދުތަކުގައި އިސްރާއީލުން ގެދޮރު އަޅާ, މީހުން ވަޒަންވެރި ކުރުވަމުން ގެންދަނީ ބައިނަލްއަގްވާމީ ގާނޫނުތަކާ ޚިލާފަށެވެ. އިސްރާއީލުން ގެންދަނީ މި ވާހަކަތަކަށް ދެކޮޅުހަދަމުންނެވެ.

ބައިނަލްއަޤްވާމީ ގޮތުން ބަލައިގަނެފައިވާ ފަލަސްޠީނު އޮތޯރިޓީއަށް ހުޅަނގު އައްސޭރީގައި ފަލަސްތީނުގެ ސަރުކާރު ހިންގުމަށް ކޮންމެވެސް މިންވަރެއްގެ ބާރުތަކެއް ލިބިފައި އޮވެއެވެ.                

އަންގާރަ ދުވަހު އިސްރާއީލުން ހުޅަނގު އައްސޭރީގެ ޖެނިން އަށް ދިން ހަމަލާތަކުގައި މަދުވެގެން 10 ފަލަސްތީނު މީހުން މަރުވެފައިވެއެވެ. އަދި ގިނަ ބަޔަކު ޒަޚަމްވެފައިވާ ކަމަށް ސިއްހީ އޮފިޝަލުން ބުނެފައިވެއެވެ. 

ޣައްޒާ އަށް 15 މަސް ދުވަހުގެ މުއްދަތައް ހުއްޓުމެއް ނެތި އިސްރާއީލުން ދިން ހަމަލާތައް ހުއްޓާލުމުގެ އެއްބަސްވުމަކަށް އަމަލު ކުރަން ފަށާފައިވާ އިރު ސިވިލް ޑިފެންސް މުވައްޒަފުން ރިޕޯޓުކޮށްފައިވާ ގޮތުގައި، މި ދިޔަ ދެ ދުވަހުގެ ތެރޭގައި ޣައްޒާގައި ހަލާކުވެފައިވާ އިމާރާތްތަކުގެ ތެރެއިން މަރުވެފައިވާ 120 މީހުންގެ ހަށިގަނޑު ވަނީ ނަގާފައެވެ. 

އިޒްރޭލުން ޣައްޒާ އަށް އެހީ ފޯރުކޮށްދިނުމަށް އަޅާފައިވާ ހުރަސްތައް ނެގުމާއެކު، ހަނގުރާމައިން ހަލާކުވެފައިވާ ސަރަޙައްދަށް އެހީ ފޯރުކޮށްދިނުން އިތުރުވެފައިވާ ކަމަށް އދ. ގެ އިންސާނީ އެހީގެ އޭޖެންސީން ބުނެފައިވެއެވެ. އަންގާރަ ދުވަހު ގާތްގަނޑަކަށް 900 ޓްރަކުގެ އެހީ ޣައްޒާއަށް ވަދެފައިވާ ކަމަށް އެ އޭޖެންސީން ވަނީ ބުނެފައެވެ. 

ހިފާފައިވާ ހުޅަނގު އައްސޭރީގައި ހުންނަ އދ ގެ އިންސާނީ ޙައްޤުތަކުގެ އޮފީހުން ބުނެފައިވަނީ، ޤާނޫނާ ޚިލާފަށް ވަޒަންވެރިވެގެން އުޅޭ އިސްރާއީލުގެ އަވަށްތައް ފުޅާ ވަމުންދާއިރު، ފަލަސްތީނުގެ މީހުންގެ ދަތުރުފަތުރުގެ މިނިވަންކަން "ބޮޑުތަނުން ހަނިކުރެވިފައިވާ" ކަމަށެވެ.

ޓްރަމްޕްގެ ވެރިކަމުގެ ފުރަތަމަ ދުވަހު ހުޅަނގު އައްސޭރީގައި ދިރިއުޅޭ ފަލަސްތީނުގެ ރައްޔިތުންނާ ދެކޮޅަށް ޖަރީމާތައް ހިންގާ ޔަހުދީންނާ ދެކޮޅަށް އެމެރިކާ އިން އަޅާފައިވާ ދަތިކުރުމުގެ ފިޔަވަޅުތައް ވަނީ އުވާލާފައެވެ. 

އިޒްރޭލުން ޣައްޒާ ގައި ހިންގި ނަސްލު ނައްތާލުމުގެ ހަނގުރާމައިގައި 7 އޮކްޓޯބަރު 2023 އިން ފެށިގެން މަދުވެގެން 47،107 ފަލަސްތީނު މީހުން ވަނީ ޝަހީދު ކޮށްލާފައެވެ. އޭގެ އިތުރުން 111،147 މީހުން ޒަޚަމްވެފައިވެއެވެ.