ޓީޗަރަކު ޚާއްސަ އެހީއަށް ބޭނުންވާ ދަރިވަރަކަށް އަނިޔާކުރި މައްސަލައެއް ބަލަން ފަށައިފިއެވެ.
ފުލުހުން ބުނީ ޚާއްސަ އެހީއަށް ބޭނުންވާ ދަރިވަރަކަށް ޖިސްމާނީ އަނިޔާ ކުރި ޓީޗަރެއްގެ މައްސަލަ އެޑިއުކޭޝަން މިނިސްޓްރީން އެ އިދާރާ އަށް ހުށަހަޅާފައިވާ ކަމަށެވެ.
މީޑިއާތަކަށް މައުލޫމާތު ދެމުން އެޑިއުކޭޝަން މިނިސްޓްރީން ބުނެފައި ވަނީ މާލެ ސަރަހައްދުގެ ސްކޫލެއްގެ ޕްރައިމަރީ ގްރޭޑްގެ ހާއްސަ އެހީ އަށް ބޭނުންވާ ކުއްޖަކަށް ޖިސްމާނީ އަނިޔާ ކުރި މައްސަލަ އެއް އެ ވުޒާރާގެ ސަމާލުކަމަށް އައިސްފައިވާ ކަމަށެވެ.
އެކަން ސަމާލުކަމަށް ގެނައީ ސްކޫލްގެ ފަރާތުން ކަމަށާއި އެ މައްސަލަ ފުލުހުންނަށް ހުށަހަޅާފައިވާ ކަމަށް އެ ވުޒާރާއިން ވަނީ ބުނެފައެވެ.
އަދި އެ މައްސަލަ ބަލަމުންދާކަން ފުލުހުން ވަނީ ޔަޤީންކޮށްދީފައެވެ.
މި މައްސަލަ އާއި ގުޅޭގޮތުން އެޑިއުކޭޝަން މިނިސްޓަރ، ޑރ. އިސްމާއިލް ޝަފީއު ވިދާޅުވީ ދަރިވަރުންނަށް މިގޮތަށް އަނިޔާ ދިނުމަކީ ބަލައިގަންނަ ކަމެއް ނޫން ކަމަށެވެ.
މިނިސްޓަރ ވަނީ މިކަން ޒިންމާދާރުކަމާއި އެކު ބަލާނެ ކަމަށް ވިދާޅުވެފައެވެ.
