ލިވަޕޫލްގެ ކުޅުންތެރިންގެ ފަރާތުން ފެންނަނީ ވަރަށް ރަނގަޅު ރޫޙެއް ކަމަށާއި، އެކަމާ މެުދ ވަރަށް ބޮޑަށް ހިތްހަމަ ޖެހިފައި ހުންނަ ކަމަށް އެ ޓީމުގެ ކޯޗު އާން ސްލޮޓް ބުނެފި އެވެ.
އޭނާ މިހެން ބުނީ އިނގިރޭސި ޕްރިމިއާ ލީގުގައި ވެސްޓް ހޭމް ޔުނައިޓެޑާ ދެކޮޅަށް ލިވަޕޫލް ކުޅުނު މެޗަށްފަހު ވާހަކަ ދައްކަމުންނެވެ. ރަށުން ބޭރުގައި ކުޅުނު އެެ މެޗުން ފަސް ލަނޑުގެ މޮޅެއް ހޯދައި، ލިވަޕޫލް އިން ވަނީ އެއް ވަނައިގައި ލީޑު ފުޅާ ކޮށްފަ އެވެ. މިވަގުތު ލިވަޕޫލް އެއް ވަނައިގައި އޮތީ އަށް ޕޮއިންޓުގެ ލީޑަކާ އެކު އެވެ.
އެކަމާ ގުޅޭ ގޮތުން ވާހަކަ ދައްކަމުން ސްލޮޓް ބުނީ، އޭނާ އެންމެ ބޭނުން ވަނީ ރަށުން ބޭރުގައި ކުޅޭ މެޗުތަކުގައި ރަނގަޅަށް ކުޅޭ މަންޒަރު ދެކެން ކަމަށެވެ. ޕްރިމިއާ ލީގުގައި އެތައް ކަމަކާ ކުރިމަތިލާން ޖެހޭނެކަން ފާހަގަކޮށް ސްލޮޓް ބުނީ، ކޮންމެ ދަނޑެއްގައި ކުޅެން ޖެހުނު ނަމަވެސް ބައިވަރު ސަޕޯޓަރުން ތިބޭ ކަމަށެވެ. ލިވަޕޫލް މެޗެއް ކުޅުމަށް އަތުވެއްޖެ ނަމަ، ދަނޑުގެ ހުރިހާ ޓިކެޓެއް ވިކި ހުސްވާ ކަމަށް ވެސް ސްލޮޓް ވަނީ ބުނެފަ އެވެ. އިދިކޮޅު ޓީމުގެ ސަޕޯޓަރުންގެ ކުރިމަތީގައި ކުޅޭއިރު، ޓީމުގެ ރޫހު އެއް ގޮތުގައި އޮންނަން ޖެހޭނެކަން ވެސް ސްލޮޓް ފާހަގަ ކުރި އެވެ.
މީގެ އިތުރުން ސްލޮޓް ބުނީ މެޗުތަކުގައި ޓީމު އޮންނަ ލެވެލް ކަނޑައަޅަން ޖެހޭނީ އިދިކޮޅަށް ކުޅޭ ޓީމެއްގެ ފެންވަރަށް ބަަލައިގެން ކަމަށެވެ. ލިވަޕޫލް އިން ވެސްޓް ހޭމްއާ ދެކޮޅަށް ނިކުތްއިރު، އެ ޓީމުން އޮތީ ލީގުގައި ރަނގަޅު ކުޅުމެއް ދައްކާފައި ކަމަށް ވެސް ސްލޮޓް ބުންޏެވެ. ވެސްޓް ހޭމް ރަނގަޅު ރޫޙެއްގައި އޮތް ނަމަވެސް، އާންމު ގޮތެއްގައި އެ ޓީމަކީ ލީީގަށް ވާދަކުރާ ޓީމެއް ނޫން ކަމަށް ވެސް ސްލޮޓް ބުންޏެވެ. އެކަމަށް ވިސަން ޖެހޭކަން ފާހަގަކުރަމުން ސްލޮޓް ބުނީ، ރަށުން ބޭރުގައި ކުޅޭ މެޗުތަކުގައި އެންމެ މުހިންމީ ރަނގަޅު ކުޅުމެއް ދެއްކުން ކަމަށާއި، އެ މެޗުތަކުން މޮޅުވުމަކީ އުނދަގޫ ކަމެއް ކަމަށެވެ. އަދި މިވަގުތު ލިވަޕޫލްގެ ކުޅުންތެރިން ރަނގަޅު ރޫޙެއްގައި ތިބުމަކީ އޭނާ އަށް އޮންނަ ހިތްހަމަ ޖެހުމެއް ކަމަށް ސްލޮޓް ވަނީ ބުނެފަ އެވެ.
މި ސީޒަނާ ދިމާކޮށް ލިވަޕޫލްގެ ކޯޗުކަމާ ހަވާލުވި ސްލޮޓްގެ އިރުޝާދުގެ ދަށުން އެ ޓީމުން އަންނަނީ ރަނގަޅު ނަތީޖާތަކެއް ހޯދަމުންނެވެ. މި ސީޒަންގެ ޕްރިމިއާ ލީގުގައި މިހާތަނަށް ލިވަޕޫލް އިން 18 މެޗު ކުޅެފައިވާއިރު، 14 މެޗުން ވަނީ މޮޅުވެފަ އެވެ. ތިން މެޗު އެއްވަރުވެފައިވާއިރު، ބަލިވެފައި ވަނީ އެންމެ މެޗަކުންނެވެ.
