ތ. ތިމަރަފުށީގައި ވަޅިއަކުން ހަމަލާދީ، މީހަކު ޒަޚަމްކޮށްލި މައްސަލާގައި 5 މީހުން ހައްޔަރުކޮށް އެމީހުންގެ ވަނަވަރު އާއްމުކޮށްފިއެވެ.

މި މައްސަލައާ ގުޅިގެން ފުލުހުން ބުނީ ތިމަރަފުށީ ގެއަކަށް 5 މީހަކު ވަދެ މާރާމާރީ ހިންގި މައްސަލައެއް ތަހުގީގު ކުރަމުންދާ ކަމަށެވެ. އަދި މި މައްސަލާގެ ރިޕޯޓުކޮށްފައިވަނީ 28 ޑިސެންބަރު 2024 ވަނަ ދުވަހުގެ މެންދުރު 1:27 ހާއިރު ކަމަށެވެ.

އާދިއްތަ ދުވަހު ފުލުހުން ބުނީ މި މައްސަލައާ ގުޅިގެން ތިމަރަފުއްޓަށް ނިސްބަތްވާ، ޖަހާމުގުރިގެ، 36 އަހަރުގެ އަހްމަދު އަމީން، ސަލްވާ، 38 އަހަރުގެ އަހުމަދު ޝަހުދީ، ހިރި، 32 އަހަރުގެ ޢާޞް އިބްރާހީމް، ގުލްބަކާވިލާ، 39 އަހަރުގެ އަބްދުﷲ އަޝްރަފް އަދި ކ.މާލެ، ވ.ވަވަތް، 54 އަހަރުގެ މުހައްމަދު ރައޫފް ހައްޔަރުކޮށްފައިވާ ކަމަށެވެ.

މި 5 މީހުން ހައްޔަރުކޮށްފައިވަނީ ކޯޓު އަމުރެއްގެ ދަށުން ކަމަށް ފުލުހުން ބުނެއެވެ.

މައުލޫމާތު ލިބިފައިވާ ގޮތުން މި މާރާމާރި ހިނގާފައި ވަނީ އެ ރަށުގެ ޒުވާން ދެ ފިރިހެނެއްގެ މެދުގައެވެ. އެގޮތުން ހަމަނުޖެހުމުގެ ތެރެއިން އެކަކު، އަނެއް މީހާގެ ބުރަކަށްޓަށް ވަޅިން ހަމަލާ ދިން ކަމަށް މައުލޫމާތު ލިބިފައިވެއެވެ. އަދި އެމީހާއަށް ސިއްހީ މަރުކަޒުގައި ފަރުވާ ދީފައިވެއެވެ.

މިމައްސަލަ ފުލުހުން ގެންދަނީ ތަހުގީގުކުރަމުންނެވެ.