ޓިނު އިމާރާތުގެ އަލިފާނުގެ ހާދިސާ ތަހުގީގު ކުރުމަށް އައި އިންޑިއާގެ ޓީމުން ދިރާސާތައް ކޮށްފައިވާ ކަމަށް ފުލުހުންގެ ޚިދުމަތުން ބުނެފިއެވެ.

ހޮނިހިރު ދުވަހު ފުލުހުން ބުނީ 12 ޑިސެންބަރު 2024 ގައި މ. ގްރީން ބިލްޑިންގގައި ހިނގި އަލިފާނުގެ ހާދިސާގެ ތަހުގީގު ޓީމާ ގުޅުނު އިންޑިއާގެ ތަޖުރިބާކާރުންގެ ޚާއްސަ ޓީމު 22 ޑިސެންބަރު 2024 ވަނަ ދުވަހު ފުރާފައިވާ ކަމަށެވެ.

އިންޑިއާގެ ތަޖުރިބާކާރުންގެ ޓީމުން ހާދިސާ ހިނގި ތަން ބަލައި، ތަހުގީގު ފުރިހަމަ ކުރުމަށް ބޭނުންވާ އެންމެހައި ކަންކަން ދިރާސާކޮށްފައިވާކަން ފާހަގަކޮށް ފުލުހުން ބުނީ ހާދިސާއާ ގުޅޭ ފޮޓޯ، ވީޑިއޯ އަދި ސީސީޓީވީ ފުޓޭޖްގެ އިތުރުން ހާދިސާއާ ގުޅުންހުރި މުހިންމު މައުލޫމާތުތައް ޓީމާ ހިއްސާ ކޮށްފައިވާ ކަމަށެވެ. އަދި ފޯރުކޮށްދެވުނު މައުލޫމާތުތަކާއި ތަކެތި ދިރާސާކުރުމަށްފަހު، އެ ޓީމުގެ ހޯދުންތައް ދިވެހި ފުލުހުންގެ ޚިދުމަތާ ހިއްސާކުރުމަށް ހަމަޖެހިފައިވާ ކަމަށް ފުލުހުން ބުނެއެވެ.

އިންޑިއާގެ ޓީމް ރާއްޖެއަށް އައިސްފައިވަނީ 20 ޑިސެންބަރު 2024 ގައެވެ.

އަލިފާނުގެ ހާދިސާއާ ގުޅޭގޮތުން އިތުރު ތަފްސީލެއް ހާމަކޮށްފައިނުވެއެވެ. އަލިފާންގަނޑު އެހައި ބޮޑަށް ފެތުރި، ރޯވި ސަބަބާއި ގުޅޭގޮތުން މިހާތަނަށް ފުލުހުން އެއްވެސް މައުލޫމާތެއް ހާމަކޮށްފައިނުވެއެވެ.

އަލިފާނުގެ ހާދިސާ ތަހުގީގު ކުރަމުންދާއިރު، އިންޑިއާ ޓީމް އައުމުގެ ކުރިން އިމާރާތް ހުރި ބިން ސާފުކުރުމުގެ މަސައްކަތް މިނިސްޓްރީ އޮފް ސިޓީސް, ލޯކަލް ގަވަމެންޓް ޕަބްލިކް ވޯކްސް އިން ވަނީ ކޮށްފައެވެ. އެއީ ހެކި ނައްތާލުން ކަމަށާއި، ނެރެވޭނެ ނަތީޖާއެއް ނޯންނާނެ ކަމަށް ގިނަ ބަޔަކު ބުނެފައިވެއެވެ. މި ހާދިސާއާ ގުޅިގެން ގިނަ ބައެއްގެ ފާޑުކިޔުން ސަރުކާރަށް ވަނީ އަމާޒުވެފައެވެ. އަދި ހާދިސާއާ ގުޅިގެން ގިނަ ބަޔަކު ވަނީ ސުވާލު ވެސް އުފައްދާފައެވެ.

މީގެ އިތުރުން އެމްޑީޕީގެ ޕާލަމަންޓްރީ ގްރޫޕް (ޕީޖީ) ލީޑަރު، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވީ ފަތިހު 5:30 އިން ފެށިގެން އެއިމާރާތުގައި އަލިފާން ރޯވެފައިވާ ކަމަށް މައުލޫމާތު ލިބިފައިވާ ކަމަށާއި، ދުމުގެ އަސަރު އެތަނުން ފެންނަމުން ދިޔަ ކަމަށެވެ. އަލިފާންގަނޑު ކޮންޓްރޯލް ކުރުމަށް ގިނަަ ވަގުތުތަކެއް ހޭދަވެގެންދިޔައިރު، މިކަމުގައި އިހުމާލު ވަރަށް ބޮޑަށް އެބައޮތް ކަމަށް މެންބަރު ނާޒިލް ވިދާޅުވިއެވެ. މިހާދިސާގައި އެންމެ ބޮޑަށް އިހުމާލުވެފައިވަނީ އެމްއެންޑީއެފްކަން ފާހަގަކުރައްވައި ނާޒިލް ވިދާޅުވީ 6:00 އާއި 6:30 އާދޭތެރޭގައި އެމްއެންޑީއެފުން މިކަމުގައި ހަރަކާތްތެރިވެފައިވާ ކަމަށެވެ. އަދި އަލިފާންގަނޑު ބޭރަށް ފެނިފައިވަނީ އޭގެ ގާތްގަނޑަކަށް ދޮޅުގަޑިއިރު ފަހުން ކަމަށާއި، އެހެންކަމުން އެމްއެންޑީއެފްގެ ބޭފުޅުންނަށް މިކަމުގައި މަސައްކަތް ކުރެވިފައިވަނީ އެންމެ އެކަށީގެންވާ ގޮތަށް ނޫން ކަމަށް މެންބަރު ނާޒިލް ވިދާޅުވިއެވެ.

އަލިފާން ރޯވި ދެ އިމާރާތުގައި ހިންގަމުންދިޔައީ ހައުސިން މިނިސްޓްރީއާއި އިންފްރާސްޓްރަކްޗާ މިނިސްޓްރީ އަދި އެންވަޔަރަމެންޓް މިނިސްޓްރީގެ އިތުރުން އެންވަޔަރަމެންޓް ޕްރޮޓެކްޝަން އޭޖެންސީ (އީޕީއޭ) އާއި މާލޭ ސިޓީ ކައުންސިލްގެ އޮފީހެކެވެ. މިހާރު ތިން މިނިސްޓްރީގެ މަސައްކަތްތައް ވަގުތީގޮތުން ވަނީ ދަރުބާރުގެއަށް ބަދަލުކޮށްފައެވެ. އަދި ސިޓީ ކައުންސިލުން ވެސް ގެއްލުން ލިބުނު ލިޔެކިޔުންތައް ތަރުތީބުކޮށް، ރިކަވާ ކުރުމުގެ މަސައްކަތްތައް މިހާރު ގެންދަނީ ކުރަމުންނެވެ.