މީގެ ކުރިން ރާއްޖޭގައި އޮތް ވެރިިކަމުގެ ނިޒާމު ކަމު ނުދާ ކަމަށް ނިންމީ އަޅުގަނޑުމެން ދިވެހި ރައްޔިތުންނެވެ. އެތައް ޙައްޤުތަކެއްގައި ތަޅު އަޅުވައި، ޗޭނު ޖަހާފައި އޮތް އޮތުމަށް ޤަބޫލު ނުވީ ވެސް އަޅުގަނޑުމެން ދިވެހިންނެވެ. އެކަން ބަދަލު ކުރަން ބޭނުންވީ ވެސް އަޅުގަނޑުމެން ދިވެހީންނެވެ. ނަމަވެސް، އޭރު މަދުވެފައި އޮތީ އެކަންކަމާ ދެކޮޅަށް ނިކުންނާނެ ހިތްވަރެކެވެ. އެ ހިތްވަރު ދައްކާނެ ބަޔެކެވެ. އެކަން އެހެން އޮއްވައި، ދިވެހި ރައްޔިތުންގެ ތެރެއިން ހަށި ފޮޅާލާފައި ނިކުތް ބައެއްގެ ސަބަބުން އެތައް ދިވެހިންނަށް ލިބިގެން ދިޔައީ އެ ހިތްވަރެވެ.
ޗޭނު ޖަހާފައިތް ޚިޔާލު ފާޅު ކުރުމުގެ މިނިވަންކަމާއި، އެއްވެ އުޅުމުގެ މިނިވަންކަމަށް ދިވެހިން ފެން ބޮވައިގެންފައިވާ ތިބި މިންވަރު އެ ނިކުތުމުން ސާފުވެގެން ދިޔަ އެވެ. އޭރުގެ ސަރުކާރާ ދިމާލަށް، ނުވަތަ ރައީސުލްޖުމްހޫރިއްޔާއާ ދިމާލަށް، ނުވަތަ ސަރުކާރުގެ އިސް ވެރިޔަކާ ދިމާލަށް އެއްޗެއް ބުނެލާ މީހަކަށް ނުވަތަ އެއްޗެއް ލިޔެލާ މީހަކަށް އޮތީ ޖަލުގެ ކުޑަ ގޮޅި ނޫން ދެން އެހެން ކޮންތަކެއް ހެއްޔެވެ؟ ހާމަ އަށް ލޮލަށް ފެންނަން ނެތަސް، އޭރު ތިބީ އަނގަމަތީގައި މަލަން އެޅިފަ އެވެ. ދުލުގައި ތަޅު އެޅުވިފަ އެވެ. ދެ އަތާއި، ދެ ފައިގައި ޗޭނު ޖަހައިފަ އެވެ.
އެކަންކަމާ ދެކޮޅަށް އެތައް ބަޔަކު ކުރި މިންނެެތް މަސައްކަތުން އަޅުގަނޑުމެންނަށް ޑިމޮކްރަަސީ ހޯދުނެވެ. ފެހި ޤާނޫނުއަސާސީއެއް އެކުލަވާލައި، އެއަށް އަމަލު ކުރަން ފެށުމުގެ ނަތީޖާ އަކީ، ކުރިން ހިފެހެއްޓިފައި ނުވަތަ ހިފަހައްޓާފައިވާ ޙައްޤުތަކެއް ލިބިގެން ދިޔައީ އެވެ. އެއްވެ އުޅުމުގެ މިނިވަންކަމާއި، ޚިޔާލު ފާޅު ކުރުމުގެ މިނިވަންކަން ތަންމިނަށް ލިބިގެން ދިޔައީ އެވެ. އެ މިނިވަންކަމަށް ދިވެހިން ހިތްވަރު ހޯދީ ޖަލަށް ދިޔަ "ލީޑަރުން" އަދި މުގުރާއި ކަރުނަ ގޭހުގެ ޝިކާރަކައަށްވީ ސިޔާސީ ފަހުލަވާނުން ކޮޅެއްގެ ހިތްވަރުންނެވެ.
އެ ހޯދި ޑިމޮކްރަސީގައި ޤަބޫލުކޮށްގެން ތިބި ތިބުމުގައި މިއަދު އަނެއްކާ ވެސް ތަޅު އެޅުވޭ މަންޒަރު ފެންނަ ކަހަލަ އެވެ. ކަޅާއި ހުދުމުން އެ މަންޒަރުތައް އަނެއްކާ ވެސް ކުރެހެމުންދާ ކަހަލަ އެވެ. ތިން ބާރު ވަކިވެފައި މި އޮތް ނިޒާމު، އެއް ބާރުގެ މުށުތެރޭގައި ރަނގަޅަށް ހަރުކޮށްލީ އަޅުގަނޑުމެން ބަލަން ތިއްބަ އެވެ. އަޅުގަނޑުމެން އެންމެންގެ ލޯ ކުރިމަތީގަ އެވެ. އޭގެ ކުރިން ޚިޔާލު ފާޅު ކުރުމުގެ މިނިވަންކަމުގައި އަތް އެޅުމަށް ވެސް މަސައްކަތް ކޮށްފި އެވެ. މީޑިއާތައް "ތަޅު އަޅުވާ" ބިލެއް ރައްޔިތުންގެ މަޖިލީހަށް ވެއްދި އެވެ. ނަމަވެސް، އެކަން ވެސް ނިމުމަކަށް ގެންނަން ޖެހުނީ މީޑިއާ ތަކާއި، ދިވެހި ރައްޔިތުންގެ ކަންބޮޑުވުން އޮއްސާލުމާ ގުޅިގެންނެވެ.
ޤާނޫނު އަސާސީ އަށް ސަރުކާރުން ހިތު ހުރިހާ ބަދަލެއް ގެނެސް، ޤާނޫނުއަސާސީ "އޮޅާލުމަކީ" ހުދުމުހުތާރު ވެރިކަމަކާ ދިމާލަށް އަނެއްކާ ވެސް މިސްރާބު ޖަހާފައިވާ ކަމުގެ ނިޝާނެކެވެ. ހެއްކެކެވެ. މިއީ އަޅުގަނޑުމެން ދިވެހިން ޤަބޫލުކޮށްގެން ތިބި ތިބުމަށް އޮތް އިންތިހާ ނުރައްކަލެކެވެ. އެކަންކަމަށް އޮތް ބިރެކެވެ. މިއަދު އަނެއްކާ ވެސް މިތިބީ އެކަމުގެ ދިފާޢުގައި ނިކުންނަން ޖެހިފަ އެވެ. "ޤާނޫނުއަސާސީ" ދިފާޢު ކުރުމަކީ އަޅުގަނޑުމެންނަށް މިއަދު ކުރަން ޖެހިފައި އޮތް ކަމެކެވެ. ހުދުމުހުތާރު ވެރިކަމަކަށް ދީލާލައިގެން ދާން ތިބުމަކީ، ދިވެހިން ބޭނުންވާނެ ގޮތެއް ނޫނެވެ.
ރާއްޖޭގެ ވެރިކަމުގެ ނިޒާމު ބައްޓަން ވެފައި އޮތް ގޮތް މުޅިން ބަަދަލުވާ މަންޒަރު މިއަދު ފެންނަން ފަށައިފި އެވެ. ހުރިހާ ބާރެއް ރައީސުލްޖުމްހޫރިއްޔާގެ އަތްޕުޅަށް ނަންގަވައި ހިންދެމިލުމަށްފަހު، ދެން ފެންނާނީ ދިވެހިން ހޯދި ޑިމޮކްރަސީގެ އެއްކޮށް ފުނޑިގެންދާ މަންޒަރެކެވެ. އެ މަންޒަރު ބަލަން ދިވެހިންނަށް ތިބެވޭނެ ހެއްޔެވެ؟ ޚާއްސަކޮށް އެ ޑިމޮކްރަސީ ހޯދުމަށް މީގެ އަހަރުތަކެއް ކުރިން މަސައްކަތް ކުރި ސިޔާސީ ލީޑަރުންނަށް ތިބެވޭނެ ހެއްޔެވެ؟ އެ ލީޑަރުން އެހެން ތިބެން އަޅުގަނޑުމެން ދިވެހިން ބޭނުންވާނެ ހެއްޔެވެ؟ އަނެއްކާ ވެސް ބޭނުން ވަނީ މީގެ ކުރިން އެ ލީޑަރުން ދެއްކި ފަދަ ހިތްވަރަކާއި، ޢަޒުމެކެވެ.
