ހުކުރު ދުވަހު އިޒްރޭލުގެ ސިފައިން ބެއިރޫތުގެ ދެކުނުގެ ބައެއް ސަރަހައްދުތަކުން ރައްޔިތުން ނުކުމެ، އެ ސަރަހައްދު ހުސް ކުރުމަށް އިންޒާރު ދިނުމަަށްފަހު، އިޒްރޭލުން އެ ސަރަހައްދުތަކަށް ބޮން އަޅައިފިއެވެ.

ލުބުނާނުގެ ނޭޝަނަލް ނިއުސް އެޖެންސީން ރިޕޯޓުކޮށްފައިވާ ގޮތުގައި، ހަމަލާދީފައިވަނީ ލުބުނާނު ޔުނިވަރސިޓީ ކައިރިއަށާއި، ބުރުޖު އަލް ބަރާޖިނާ ސަރަހައްދަށެވެ. އަދި އޭގެ ފަހުން އަލް ޖާމޫސް ސަރަހައްދަށްވެސް ހަމަލާ ދީފައިވާ ކަމަށް އެ އެޖެންސީން ހާމަކޮށްފައިވެއެވެ. އަލް ޖާމޫސް ސަރަހައްދަކީ އިޒްރޭލުގެ ސިފައިންގެ އިންޒާރުގައި ހިމެނިފައިނުވާ ސަރަހައްދެކެވެ.

ލުބުނާނުގެ ސަރުކާރު މީޑިއާއިން އިތުރަށް ހާމަކޮށްފައިވާ ގޮތުގައި، މި ހަމަލާތަކުގެ އަޑު ބެއިރޫތުގައި ގަދައަށް އިވުނެވެ. އަދި ހަމަލާ ދިން ސަރަހައްދުތައް ވަނީ ކަޅު ދުމުން ފުރިފައެވެ.

މިހަމަލާތަކާ ގުޅިގެން އަނިޔާވި މީހުންގެ އަދަދެއް މި ވަގުތު ސާފެއްނުވެއެވެ. އަދި އިޒްރޭލުން ވެސް މި ހަމަލާތަކާ ގުޅޭގޮތުން އެއްވެސް އެއްޗެއް މިހާތަނަށް ބުނެފައެއް ނުވެއެވެ.

މި ހަމަލާތައް ދީފައި މިވަނީ އިޒްރޭލާއި ހިޒްބުﷲއާ ދެމެދު ހަނގުރާމަ ހޫނުވަމުންދާ ދަނޑިވަޅެއްގައެވެ. މި ދެ ފަރާތުގެ ދެމެދުގައި ހަނގުރާމަ ފެށިފައިވަނީ 2023 ވަނަ އަހަރުގެ ސެޕްޓެމްބަރު މަހުގެ ފަހުކޮޅުގައެވެ.

ހިޒްބުﷲއިން ބުދަ ދުވަހު ހާމަކޮށްފައިވާ ގޮތުގައި، އެ ޖަމާއަތުން ވަނީ އިޒްރޭލުގެ މައި ބައިނަލްއަޤްވާމީ ވައިގެ ބަނދަރު ކަމުގައިވާ ބެން ގުރިއަން އެއަރޕޯޓް ކައިރީގައި ހުރި އަސްކަރީ މަރުކަޒަކަށް ހަމަލާދީފައެވެ. ހިޒްބުﷲއިން އިޒްރޭލަށް ހަމަލާދޭން ފަށާފައިވަނީ 2023 ވަނަ އަހަރުގެ އޮކްޓޯބަރު 7 ވަނަ ދުވަހު ހަމާސްއިން އިޒްރޭލަށް ދިން ހަމަލާއާ ގުޅިގެން، ހަމާސްއަށް އެހީތެރިވުމުގެ ގޮތުންނެވެ.

ލުބުނާނުގެ ސިއްހީ ވަޒީރު ފިރާސް އަބިއާދު ވިދާޅުވެފައިވާ ގޮތުގައި، 2023 ވަނަ އަހަރުގެ ސެޕްޓެމްބަރު 23 ވަނަ ދުވަހުން ފެށިގެން އިޒްރޭލުން ލުބުނާނަށް ދިން ހަމަލާތަކުގައި 2،600ށްވުރެ ގިނަ މީހުން ވަނީ މަރުވެފައެވެ.