ތެޔޮ ގަތުމަށް އެސްޓީއޯއިން ވިޓޯލްއާއެކު ހެދި އެއްބަސްވުމުގައި ހުރި ކަންކަމާއި، ރައީސް ޑރ. މުހައްމަދު މުއިއްޒުގެ ދަތުރުފުޅުތަކުގެ ހަރަދުގެ ތަފްސީލު ދިނުމަށް އެދުމުން އެކަމަށް ސަރުކާރުން ޖަވާބެއް ނުދިނެވެ.

ރާއްޖެ ޓީވީން ވަނީ 4 ކަމަކާއި ގުޅޭގޮތުން، މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން މައުލޫމާތު ހޯދަން އެދިފައެވެ.

އެގޮތުން ސެޕްޓެމްބަރު މަހުގެ 26 ވަނަ ދުވަހު ހުށަހަޅާފައިވަނީ، ދައުލަތުގެ ވިޔަފާރި ކުންފުނި، އެސްޓީއޯއަށް ބޭނުންވާ ހުރިހާ ތެލެއް ފޯރުކޮށްދޭން ސްވިޒަލޭންޑްގައި މަރުކަޒުކޮށްފައިވާ ނެދަލެންޑްސްގެ ބޮޑު ތެޔޮ ކުންފުންޏެއް ކަމަށްވާ ވިޓޯލްއާ އެކީ އެއްބަސްވުމެއްގައި ސޮއިކޮށްފައިވާ ކަމަށެވެ. އެހެން ކަމުން އެއެއްބަސްވުމުގެ ދަށުން އާންމު ކޮށް ރައްޔިތުން ސާފުކުރުމަށް އެދޭ މުހިންމު މައުލޫމާތޯ ހޯދުމަށް އާރުޓީއައި ހުށަހަޅާފައިވަނީ އިކޮނޮމިކް މިނިސްޓްރީއަށެވެ.

މީގެ އިތުރުން އދ ގެ އާންމު މަޖިލީހުގައި ބައިވެރިވެވަޑައިގަތުމަށް ރައީސް ޑރ. މުހައްމަދު މުއިއްޒު އެމެރިކާގެ ނިއުޔޯކަށް ކުރެއްވި ދަތުރުފުޅުގައި، ދިވެހިރާއްޖޭގެ ފަރާތުން ބޭއްވި ސައިޑް އިވެންޓްތަކުގައި ދައުލަތުން ހަރަދުވި ފައިސާގެ ތަފްސީލާއި، މި ދަތުރުފުޅުގައި ރައީސް މުއިއްޒުގެ މީޑިއާ ޓީމުގައި ހިމެނވިވަޑައިގަންނަވަނީ ކިތަށް ބޭފުޅުންތޯއާއި އެ ބޭފުޅުންނަށް ދައުލަތުން ހަރަދުވި ފައިސާގެ ތަފްސީލު ހޯދުމަށް ވާނީ އެދިފައެވެ. މި މައުލޫމާތު ހޯދުމަށް އެދިފައިވަނީ ވެސް ސެޕްޓެމްބަރު މަހުގެ 24 ވަނަ ދުވަހުއެވެ. މި މައުލޫމާތު ހޯދަން އެދުނީ ރައީސް އޮފީހުންނެވެ.

މީގެ އިތުރުން ވިޔަފާރިއާއި އިންވެސްޓްމަންޓް ކުރިއަރުވަން ދިވެހި ސަރުކާރުން ޗައިނާގެ ޕީޕަލްސް ބޭންކާއެކު ސޮއިކުރެވުނު މެމޮރަންޑަމް އޮފް އަންޑަސްޓޭންޑިންގެ ދަށުން ރާއްޖޭން ނަގާފައިވާ ދަރަނިތައް ދިވެހި ރުފިޔާއިން ދެއްކޭނެތޯ ސާފު ކުރުމަށްވެސް ވާނީ އާރުޓީއައި ހުށަހަޅާފައެވެ. އަދި ދިވެހި ވިޔަފާރިވެރިންނަށް ދިވެހި ރުފިޔާއިން ޗައިނާގެ ކުންފުނިތަކާއެކު ވިޔަފާރީގެ މުއާމަލާތްތައް ކުރެވޭނެތޯ އާއި އަދި ޗައިނާ އިން ރާއްޖެ އަންނަ ފަތުރުވެރިން ރިސޯޓްތަކަށް ފައިސާ ދައްކާނީ ޔުއާނުންތޯ އަދި ދިވެހި ސަރުކާރާއި ޗައިނާގެ ޕީޕަލްސް ބޭންކާއެކު ސޮއި ކުރެވުނު އެމްއޯޔޫ އާއްމުކުރާނެތޯއެވެ. މި އާރުޓީއައި އަކީ ސެޕްޓެމްބަރު މަހުގެ 15 ވަނަ ދުވަހު ހުށަހެޅި ހުށަހެޅުމެކެވެ. އަދި މައުލޫމާތު ހޯދަން އެދިފައިވަނީ ރައީސް އޮފީހުންނެވެ.

މީގެ އިތުރުން 4 ވަނަ ކަމަކަށް މައުލޫމާތު ހޯދުމަށް އެދިފައިވަނީ ރައީސުލްޖުމްހޫރިއްޔާ 1446 ވަނަ އަހަރުގެ ރަބީއުލްއައްވަލު މަހުގެ 1 ވަނަ ދުވަހު (ގައުމީ ދުވަހު) ގައުމީ ޖަލްސާގައި ދެއްވި ތަގުރީރުގައި ރާއްޖެ އދ ގެ ފުރިހަމަ މެންބަރަކަށް ހެދުމަށް އދ ގައި ކުރެވުނު ބަހުސްތަކުގައި އެކި ގައުމުތަކުން ދެއްކެވި ވާހަކަތައް ކަމަށް ވިދާޅުވެ، ދައްކަވާފައިވާ ވާހަކަފުޅުތަކުގެ މަސްދަރަކީ ނުވަަތަ އެ މައުލޫމާތު ހޯއްދެވީ ކޮން ބައެއްގެ ފަރާތުންތޯ އާއި ކޮން ރިސަރޗަކުންތޯ ސާދުކޮށްދެއްވުމަށާއި ގައުމީ ދުވަހު ރައީސް ދެއްވި ތަގުރީރު ތައްޔާރުކޮށްދެއްވީ ކޮންބޭފުޅެއްތޯ ސާފުކުރުމަށް ވާނީ އެދިފައެވެ. މި މައުލޫމާތަކީ ވެސް މިދިޔަ މަހުގެ 8 ވަނަ ދުވަހު ހޯދަން އެދުނު މައުލޫމާތެވެ.

ނަމަވެސް މިހާތަނަށް ވެސް މިއިން އެއްވެސް އާރުޓީއައި އަކަށް ޖަވާބު ދީފައި ނުވެއެވެ. އަދި މި ސަރުކާރަކީ ނޫސްވެރިންނާއި ބީރަށްޓެހި ސަރުކާރަކަށްވެ، ނޫސްވެރިންނަށް ޖަވާބު ނުދީ ހާމަކަން ކުޑަސަރުކާރެއްގެ ގޮތުގައި ވަނީ ސިފަކޮށްފައެވެ. އަދި މިހާތަނަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނޫސްވެރިންނާއި ބައްދަލުކުރެއްވީ ވެރިކަމަށް ވަޑައިގެންނެވި ފަހުން 1 ފަހަރުއެވެ.