މި ހިނގަމުންދާ ސަރުކާރަށް އެމްއެމްޕީއާރްސީ މައްސަލަ ނުބެލޭނެކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.

ރާއްޖެޓީވީގެ ސުވާލަކީ ޕްރޮގްރާމްގައި ވާހަކަ ދައްކަވަމުން އުމަރު ވިދާޅުވީ، މި ސަރުކާރަށް އެމްއެމްޕީއާރްސީގެ މައްސަލައެއް ނުބެލޭނެ ކަމަށާއި، ސަރުކާރުން އެމްއެމްޕީއާރްސީ މައްސަލަ ބަލާނެކަމަށް އެ ބުނާ ވާހަކައިގެ މާނައަކީ ކުރީގެ ރައީސް އަބްދުﷲ ޔާމީނު ޖަލަށް ލުން ކަމަށެވެ.

އެއީ ހަމައެކަނި ރައީސް ޔާމީނު ޖަލަށް ލުމަށްޓަކައި ދައްކަމުން ގެންދާ ވާހަކައެއް ކަމަށްވެސް އުމަރު ވިދާޅުވިއެވެ.

އުމަރު ވިދާޅުވީ، ކުރީގެ ނައިބްރައީސް އަދީބަކީ މި ސަރުކާރުގެ އެއް އެޑްވައިޒަރު ކަމަށެވެ. ސަރުކާރުގެ ކެބިނެޓުގައި އަދީބަށް "ސްލޮޓް" ދީފައިވާކަމަށްވެސް އުމަރު ވިދާޅުވިއެވެ. އެކަމުންވެސް އެމްއެމްޕީއާރްސީ މައްސަލަ ނުބަލާނެކަން އެނގިގެންދާކަމަށް އުމަރު ވިދާޅުވިއެވެ.

ނުވިތާކަށް ރައީސް ޑރ މުއިއްޒުގެ ވަށައިގެން ތިއްބެވި ބޭފުޅުންގެ ތެރެއިން 50 އިންސައްތައަކީ އެމްއެމްޕީއާރްސީ ލިސްޓުގައި ހިމެނޭ ބޭފުޅުންކަމަށްވެސް އުމަރު ވިދާޅުވިއެވެ.

އުމަރު ވިދާޅުވީ، ރައީސް ޔާމީނު ވީ އެންމެ އަވަހަށް ޖަލަށް ލުމަށް މި ސަރުކާރުން މަސައްކަތް ކުރާނެ ކަމަށެވެ.

އޭގެ އިތުރުން، ރައީސް ޔާމީނު ޖަލަށް ލީކަމުގައިވީނަމަވެސް، ނުވަތަ ޖަލަށް ނުލި ނަމަވެސް، ކުރިއަށް އޮތް ރިޔާސީ އިންތިޚާބު މި ސަރުކާރަށް ކާމިޔާބެއް ނުކުރެވޭނެކަމަށް އުމަރު ވިދާޅުވިއެވެ. އެގޮތުން ރައީސް ޔާމީނު ޖަލަށް ލައިގެން އިންތިޚާބު ކާމިޔާބު ކުރެވިދާނެކަމަށް މި ސަރުކާރަށް ހީވެފައިވާކަމަށްވެސް އުމަރު ވިދާޅުވިއެވެ.

އެމްއެމްޕީއާރްސީ ހިޔާނާތުގެ މައްސަލަ މި ސަރުކާރަށް ނުބެލޭނެކަމަށް އުމަރު ވިދާޅުވާއިރު، އެ މައްސަލައިގެ ތަހުގީގު ނުނިމެނީސް އޭގެ ތެރެއިން ގިނައީ ހިޔާނާތުގައި ބައިވެރިނުވާ މީހުންކަމަށް ރައީސް ޑރ މުޙައްމަދު މުއިއްޒު ވަނީ ވިދާޅުވެފައެވެ. އެގޮތުން ދާދި ފަހުން ޕީއެންސީން ބޭއްވި ހަރުގެ ޖަލްސާގައި ވާހަކަ ދައްކަވަމުން ރައީސް ވިދާޅުވީ، އެމްއެމްޕީއާރްސީ ލިސްޓުގައި ތިބި ގިނަ މީހުންނަކީ އެ ހިޔާނާތުގައި ބައިވެރިވި މީހުންނެއް ނޫން ކަމަށެވެ.

އޭގެ ތެރެއިން ގިނަ މީހުންނަކީ ޑޮލަރު މާރު ކުރުމުގެ ގޮތުން މުއާމަލާތް ކޮށްފައިވާ މީހުންކަމަށް ރައީސް ވިދާޅުވިއެވެ.

ރައީސް މުއިއްޒު އެހެން ވިދާޅުވެފައިވާއިރު، އެމްއެމްޕީއާރްސީ ހިޔާނާތާ ގުޅޭ ގިނަ މައްސަލަތަކެއް އޭސީސީން މިހާރުވެސް ތަހުގީގު ކުރަމުންދެއެވެ. އަދި އެއީ އެތައް ބައެއްގެ މައްޗަށް ތުުުހުމަތު ކުރެވޭ މައްސަލައެކެވެ.

 ވީއިރު، ތަހުގީގު ކުރިއަށްދާ މައްސަލަތަކެއްގައި އެއީ ހިޔާނާތުގެ ފައިސާކަމަށް ރައީސް ކަނޑައެޅުއްވީ ކީއްވެތޯ ގިނަ ބަޔަކު ދަނީ ސުވާލު އުފައްދަމުންނެވެ.