އިރާގުގެ ހަނގުރާމަވެރިންގެ ގްރޫޕްތަކެއް އެކުލެވޭ ޖަމާއަތަކުން އިޒްރޭލުގެ ހައިފާ ބަނދަރަށް އަންގާރަ ދުވަހު ހަމަލާ ދީފިއެވެ.
ބުދަ ދުވަހުގެ ހެނދުނު އެ ޖަމާޢަތުގެ ޓެލެގްރާމް ޗެނަލްގައި ޝާއިޢުކުރި ބަޔާނެއްގައި ހައިފާ ބަނދަރަށް ދިން ހަމަލާގެ ޒިންމާ ވަނީ ނަގާފައެވެ. ހަމަލާ ދީފައިވަނީ ކަމިކާޒީ ޑްރޯން ބޭނުން ކޮށްގެން ކަމަށް ބުނެފައިވެއެވެ.
އެ ޖަމާޢަތުގެ ބަޔާނުގައި ބުނެފައިވަނީ މި ޑްރޯން ހަމަލާ ދިނީ އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ކުރަމުންދާ ހަނގުރާމައިގެ ތެރެއިން، ޣައްޒާގެ އަންހެނުންނާއި، ކުޑަކުދިންނާއި، އުމުރުން ދުވަސްވީ މީހުންނަށް ޒަޔަނިސްޓް ވެރިކަމުން ދެމުންދާ އަނިޔާތަކަށް ބަދަލު ހިފުމުގެ ގޮތުން ކަމަށެވެ.
އެ ޖަމާޢަތުން ބުނެފައިވަނީ އިޒްރޭލުން ހިފާފައިވާ ފަލަސްތީނުގެ ބިންތަކުގައިވާ އިޒްރޭލުގެ މުހިންމު ތަންތަނަށް ހަމަލާދީ ހަލާކުކުރުން ކުރިއަށް ގެންދާނެ ކަމަށެވެ.
