ވަފާ ނިއުސް އެޖެންސީން ބުނާ ގޮތުގައި، ޚާން ޔޫނިސްގެ އިރުމަތީ ސަރަޙައްދުގައިވާ އަބަސާން އަލް-ކަބީރާ ސަރަޙައްދުގެ ގެއަކަށް އިސްރާއީލުން އަންގާރަ ވިލޭރޭ ދިން ހަމަލާއެއްގައި މަދުވެގެން 10 މީހުން މަރުވެ، އަދި އެތައް ބަޔަކު ޒަޚަމްވެއްޖެއެވެ.

އޭގެ އިތުރުން އަލް-ޖަޒީރާ އިން ބުނެފައިވާ ގޮތުގައި ޣައްޒާ ސިޓީގެ ޝެއިޚް ރަޟްވާން ސަރަހައްދުގައި ހުރި ގެއަކަށް އިޒްރޭލު ސިފައިން ވަނީ ބޮން އަޅާފައެވެ. އެ ހާދިސާ ގައި ދެ މީހުން ވަނީ ޝަހީދުވެފައެވެ. މި ހަމަލާގައި ހަ މީހުން ޒަޚަމްވި ކަމަށްވެސް އަލް-ޖަޒީރާ އިން ބުނެފައިވެއެވެ.

އަނެއްކޮޅުން ޣައްޒާގެ މެދުތެރޭގެ މަޣާޒީ ރެފިއުޖީ ކޭމްޕަށް ހަމަލާދީ އެތައް ބަޔަކު ޝަހީދުވެ އެތައް ބަޔަކު ޒަޚަމްވެފައިވާ ކަމަށް ވެސް އަލްޖަޒީރާ އިން ބުނެފައިވެއެވެ.

އިސްރާއީލުގެ އަސްކަރިއްޔާ އިން ވަނީ، ހަމާސްގެ ހައްޔަރުގައި ތިއްބާ އިޒްރޭލު މީހެއްގެ ގަޔަށް ބަޑިޖަހާ މަރާލުމާއި އިތުރު ދެ މީހަކަށް ބަޑިޖެހުމުގެ ސަބަބުން އަނިޔާ ލިބުނު ހާދިސާ ތަހުގީގު ކުރަމުންދާ ކަމަށް ބުނެފައެވެ.

އިޒްރޭލުން ޣައްޒާ ގައި ހިންގަމުންދާ ހަނގުރާމައިގައި މިހާތަނަށް މަދުވެގެން 39,897 މީހުން ޝަހީދުވެ، 92,152 މީހުންނަށް އަނިޔާވެފައިވެއެވެ. އޮކްޓޯބަރު 7 ގައި ޙަމާސް އިން އިޒްރޭލަށް ދިން ހަމަލާގައި ގާތްގަނޑަކަށް 1,139 މީހުން މަރުވެ، 200 އަށްވުރެ ގިނަ އިޒްރޭލް މީހުން ހަމާސް އިން ހައްޔަރުކޮށްފައިވާ ކަމަށް ބެލެވެއެވެ.