މި ސަރުކާރުގެ ކޮންސްޓަރަކްޝަން މިނިސްޓަރު އަބްދުﷲ މުއްތަލިބު މަޖިލީހުގައި ހެއްދެވީ އިތުރުފުޅެއް ކަމަށާއި، ޑރ. މުހައްމަދު މުއިއްޒު މިނިސްޓަރުކަމުގައި ހުންނެވި އިރު ޕަބްލިކް ވާކްސްގައި ހުރި މުދާތައް ހުރީ ރަށްރަށުގައި އުކާލާ ދަބަރަށްވެފައި ކަމަށް ހައުސިންގ މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެއެވެ.

ރައްޔިތުންގެ މަޖިލީހުގެ ޖަލްސާގައި ކޮންސްޓްރަކްޝަން މިނިސްޓަރު އަބްދުﷲ މުއްތަލިބު ދެއްކެވި ވާހަކައާއި ގުޅިގެން އަކްރަމް އެކްސްގައި ކުރެއްވި ޕޯސްޓެއްގައި ވިދާޅުވީ މިނިސްޓަރު ހެއްދެވީ ކަނޑައެޅިގެން ބޮޑު އިތުރުފުޅެއް، ނޫނީ މިނިސްޓަރަށް މައޫލޫމާތް ދިންފަރާތް ތައް މިނިސްޓަރަށް އޮޅުވާލެއްވީ ކަމަށެވެ. އަދި ރައްޔިތުން މަޖިލިހުގައި އެހާ ބޮޑެތި ދޮގުތަކެއް ހައްދަވަން ހެޔޮ ނުވާނެ ކަމަށެވެ.

އަކްރަމް ވިދާޅުވީ 2018 ގައި އެމްޑީޕީން ސަރުކާރާ ހަވާލުވި އިރު މިނިސްޓަރު ވިދާޅުވި ބޭބީ ޑްރެޖަރު ޑރ. މުހައްމަދު މުއިއްޒުގެ މިނިސްޓަރ ކަމުގައި މިފްކޯ މެދުވެރިކޮށް އެ ކުންފުނިން ފައިސާ ދޭގޮތަށް އަމިއްލަ ކުންފުންޏަކާ ރިޕެއަރ ކުރަން ހަވާލުކޮށްފައިވާ ކަމަށެވެ. އަދި އެކަން ބެލިއިރު އެ ރިޕެއަރކޮށް އެކަމަށްދާ ޚަރަދު މިފްކޯ އިން ދައްކަންޖެހޭ ކަމުގެ އެއްވެސް މުއާމަލާތެއް ހިނގާފައިވާ ކަމުގެ ލިޔެކިޔުމެއް ފެންނާކަށް ނެތް ކަމަށެވެ.

އަދި އޭރު ބެލިބެލުމުން ބޭބީ ޑްރެޖަރ ރިޕެއަރ ކުރުމަށްދާ ހަރަދަށް ބަލާއިރު ރިޕެއަރ ކޮށްގެން އެ ނެރުމަށް ވުރެ އައު ޑުރެޖަރ އެއް ގަތުންވެސް މާ ރަނގަޅު ކަމަށެވެ. އަދި މިނިސްޓަރު މަޖިލީހުގައި ވިދާޅުވީ ޕަބްލިކްވާރކްސް ގައި މެއިންޓަނަސް ޑްރެޖިންޖް އަށް ބޭނުންވާ މެޝިނަރީޒް މިނިސްޓަރު އޭރުއުޅުއްވި ސަރުކާރު ނިމި 2018 ގައި އެމްޑީޕީ ސަރުކާރާ ހަވާލުވިއިރު ހުންނާނެކަމާ އެ ގޮތުން ބޭބީ ޑްރެޖަރ ގެ ވާހަކައިގެ އިތުރުން ވިދާޅުވި ލޭންޑިންގް ކުރާފްޓްތައް ވިއްކާލާފައިވާ ކަމާއި އެކްސްކަވޭޓަރ ތައް ރައްރަށުގައި އުކާލާ ދަބަރަށް ވެފައިވާ ކަމަށެވެ. އަކްރަމް ވިދާޅުވީ އެއީ ހެއްދެވި ބޮޑުވެގެންވާ އިތުރުފުޅެއް ކަމަށެވެ.

އަދި މުއިއްޒުގެ މިނިސްޓަރު ކަމުގައި އުފެއްދި ރޯޑް ކޯޕަރޭޝަން އަށް ޕަބަލިކްވާރކްސް ގައި ހުރި އެ މެޝިނަރީތައް ބަދަލުކުރި ކަމަށެވެ. އަދި މުއިއްޒުގެ ދައުރުގައި އެތަން އުވާލުމަށްފަހު އަލުން ޕަބްލިކްވާރކްސް އުފައްދާ މަސައްކަތް ކުރަން ފެށީ 2018 ގައި ކަމަށާއި، އެމްޑީޕީ ސަރުކާރު އައިސް އޭގެ 3 މަސްފަހުން ރަށްރަށަށް މިނިސްޓްރީ މުވައްޒަފުން ޒިޔާރަތް ކުރަމުން ދިޔަދިޔުމުގައި މުވައްޒަފުންނަށް ފާހަގަވީ ރަށްރަށުގައި ވަލުތެރެއަށް މެޝިނަރީޒްތައް އުކާލާފައިވާކަން ކަމަށެވެ. އަދި އެކަމުގެ އޮޑިޓެއް ހަދަންފެށި ނަމަވެސް ފުރިހަމަ އިންވެންޓްރީއެއް ރޯޑްކޯޕަރޭޝަންގައި ނެތްކަމަށެވެ.

މީގެ އިތުރުން އުވާލަން ވެގެން ފިނޭސް މިނިސްޓްރީ އަށް މުއިއްޒު ފޮނުއްވި ލިސްޓް ބަލައިގެން ކޮންމެސް ވަރަކަށް އިކްއުޕްމަންޓް އަޅާ ކިޔާ ރަށްރަށު ވަލުތެރެއަށް އުކާލާފައި ހުރި ބައެއް އެއްޗެތި ފާހަގަ ކުރެވުނު ކަމަށް އަކްރަމް ވިދާޅުވިއެވެ. އަދި ގިނަ އެއްޗެހި ހުރީ ދަބަރުޖަހާ އުކާލެވިފައި ކަމަށާއި، އޭގެ ތެރެއިން ބައެއް އެއްޗެހި ރަށްރަށުން ގެނެސް ރިޕެއަރކޮށް ބޭނުން ކުރަންފެށުނު އަނެއްބައި އެއްޗެހި ރަށްރަށުގައި ބަހައްޓައިގެން ރިޕެއަރކޮށް އެރަށްރަށުގެ މަސައްކަތް ކުރުމަށް ރަށުގައި ބެހެއްޓުނު ކަމަށް އަކްރަމް ވިދާޅުވިއެވެ. އަދި ބަޖެޓްގައި ފައިސާނެތިގެން ރިޕެއަރ ނުކުރެވުނެ ބައެއް މެޝިނަރީޒްތައް އެމްޓީސީސީން ރިޕެއަރކޮށް ވަކި މުއްދަތަކަށް ބޭނުންކުރުމަށް ދެވުނު ކަމަށާއި، މިގޮތަށް އާރުޑީސީ އާއި ވެސް ހަވާލު ކުރެވުނު ކަމަށެވެ.

އަދި މިނިސްޓަރު ވިދާޅުވާ ލޭންޑިންގ ކްރާފްޓްގެ ވާހަކައަށް ބަލާއިރު އެމްޑީޕީ ސަރުކާރާ ހަވާލުވިއިރު އޮތީ ބާ ދަގަނޑަށް ވެފައި އޮތް 2 ލޭންޑިންގ ކުރާފްޓް، އަދި ކުޑަކޮށް ބޭނުން ކުރެވޭ 1 އުޅަނދު ކަމަށެވެ. އަދި މި ވެސް ދުއްވުނީ މަދު ދުވަސް ކޮޅަކު ކަމަށާއި، އެ ރިޕެއަރކޮށްގެންވެސް ބޭނުން ކުރެވޭވަރު ނުވި ކަމަށެވެ. އެހެންކަމުން އެ އެއްޗެހި ވިއްކާނުލާ ކަމަށާއި، މި ކަންކަން ހިނގާ ދިޔަގޮތް ވަރަށް ރަނގަޅަށް މިނިސްޓަރުގެ ނައިބަކަށް ހުންނެވި އަލީ ސަލީމް (ބުލޭ) އަށާއި އެހެން ދެ މިނިސްޓްރިީއެއްގައި މިހާރު މަސައްކަތް ކުރައްވަމުން ގެންދަވާ 4 ބޭފުޅަކަށް އެނގިވަޑައިގަންނަވާނެ ކަމަށެވެ. އަދި މި މެޝިނަރީޒް ތަކާ ބެހޭ ވަރަށް ތަފްސީލީ ރިޕޯޓް އެއްވެސް އެކުލަވާލި ކަމަށާއި، މި ރިޕޯޓް ރައީސް އޮފީހަށާއި ފިނޭންސް މިނިސްޓްރީ އަށް ފޮނުވުނު ކަމަށެވެ.

އަކްރަމް ވިދާޅުވީ މިނިސްޓްރީ ގައި އެ ރިޕޯޓް އޮންނަންވާނެ ކަމަށާއި، އެ ރިޕޯޓް ބައްލަވާލެއްވުމަށެވެ. އަދި މި ކަހަލަ ބޮޑެތި އިތުރުފުޅު ހައްދަވާ ނުވަތަ ރަނގަޅު މައުލޫމާތު ނެތި ވާހަކަފުޅު ދެއްކެވުމުން މިނިސްޓަރާއި، އަދި ސަރުކާރުގެ ދޯދިޔަަކަމާއި މުއިއްޒު މިނިސްޓްރީ ހިންގެވި ގޮތުގެ ދޯދިޔާކަން ފާހަގަވެގެންދާ ކަމަށެވެ. އަދި އެގޮތަށް ކަންތައް ކުރެއްވުން ހުއްޓުވާލައްވާ ވީހާވެސް އަވަހަކަށް މަޖިިލީހަށް އަލުން ވަޑައިގެން އާންމު ޖަލްސާ އެއްގައި އެކަމަށް މެމްބަރުން އަރިހުން މާފަށް އެދިވަޑައިގެން މިނިސްޓަރުގެ ރެކޯޑް ރަނގަޅުކޮށްލުމަށް އަކްރަމް ވަނީ ގޮވާލައްވާފައެވެ.