ކުރީގެ ކޮމިޝަނަރ ޖެނެރަލް އޮފް ކަސްޓަމްސް އަދި ހޯމް މިނިސްޓްރީގެ ސްޓޭޓް މިނިސްޓަރަކަށް ފަހުން ބަދަލުކުރެއްވި ޔޫސުފް މާނިއު މުހައްމަދު އެމަގާމުން އިސްތިއުފާ ދެއްވައިފި އެވެ.
ކޮމިޝަނަރ ޖެނެރަލް އޮފް ކަސްޓަމްގެ މަގާމަށް މާނިއު އައްޔަންކުރެއްވީ 20 ނޮވެމްބަރު 2023 ގައެވެ. މި މަޤާމަށް ޔޫސުފް މާނިޢު މުޙައްމަދު އައްޔަނު ކުރައްވާފައިވަނީ ސްޓޭޓް މިނިސްޓަރ ފެންވަރުގައެވެ. ނަމަވެސް ދާދި ފަހުން މަޖިލީހުގެ ކޮމިޓީގައި މާނިއު ދެއްކި ބައެއް ވާހަކަތަކަށް އާންމުންގެ ފާޑުކިއުންތައް އަމާޒުވެ، ކަސްޓަމްސްއިން އަމަލުކުރަމުން އަންނަ ބައެއް އުސޫލުތަކަށް ބަދަލު ގެންނަވާ ވާހަކަ ދެއްކެވި ފަހުން މާނިއު ވަނީ ކުއްލި ގޮތަކަށް އެ މަގާމުން ވަކިކުރައްވާފައެވެ.
އަދި މާނިއު އައްޔަންކުރެއްވީ ހޯމްލޭންޑް ސެކިއުރިޓީ މިނިސްޓްރީގެ ސްޓޭޓް މިނިސްޓަރުކަމުގެ މަގާމަށެވެ. މާނިއު ކަސްޓަމްސްއިން ވަކިކުރި ސަބަބެއް ސަރުކާރުން ހާމައެއް ނުކުރެއެވެ. ސަރުކާރުން ބުނެފައިވަނީ މާނިއު ކަސްޓަމްސްގެ ސީޖީކަމުން ވަކިކޮށް ހޯމްލޭންޑަށް ބަދަލުކުރެއްވީ ރައީސްއަށް ލިބިވަޑައިގަންނަވާ ބާރުގެ ދަށުން ކަމަށެވެ. އޭނާ ބަދަލުކުރެއްވީ 22 ޖުލައިގައެވެ.
މާނިއު ކަސްޓަމްސްއިން ވަކިކޮށް ކަސްޓަމްސްގެ ސީޖީގެ މަގާމަށް އައްޔަންކުރައްވާފައިވަނީ ޑެޕިއުޓީ ކޮމިޝަނަރ އޮފް ކަސްޓަމްސްގެ މަގާމުގައި ހުންނެވި ފާތިމަދު ދިޔާނާއެވެ.
މާނިއު ކަސްޓަމްސްގެ ސީޖީކަމުން ވަކިކޮށް ހޯމްލޭންޑަށް ބަދަލުކުރައްވާފައިވަނިކޮށް ކުއްލިގޮތަކަށް ވަނީ އިސްތިއުފާ ދެއްވާފައެވެ. ނަމަވެސް އިސްތިއުފާ ދެއްވި ސަބަބެއް ހާމައެއް ނުކުރައްވައެވެ. އަދި މިކަމާއި ގުޅިގެން ސަރުކާރުންވެސް ވަކިއެއްޗެއް ހާމައެއް ނުކުރެއެވެ.
ކަސްޓަމްސްގެ ސީޖީކަމުގެ މަގާމުން ހޯމްލޭންޑުގެ ސްޓޭޓަކަށް ބަދަލުކުރެއްވުމާއި ގުޅިގެން މާނިއު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ކޮމިޝަނަރ ޖެނެރަލް އޮފް ކަސްޓަމްސްގެ މަގާމު އަދާކުރެއްވުމުގެ ފުރުސަތު ލިބިވަޑައިގަތުމުން ރައީސް ޑރ. މުހައްމަދު މުއިއްޒުއަށް އިހުލާސްތެރިކަމާއެކު ޝުކުރު އަދާކުރައްވާ ކަމަށެވެ. އަދި އެ ހައިސިއްޔަތުން މަސައްކަތް ކުރުމަކީ ލިބުނު ޝަރަފެއް ކަމަށާއި، ހޯމް މިނިސްޓަރު ދެއްވި އެއްބާރުލުމާއި އިރުޝާދަށް ޝުކުރުވެރިވާ ކަމަށެވެ.
