ރަށްރަށަށް ބޭނުންނުވާ ވަރުގެ އިންޖީނުގެތަކާއި އޮފީސްތައް ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގެ ދުވަސްވަރު އަޅާފައި އެބަހުރި ކަމަށް މިސަރުކާރުގެ އެންވަޔަރަންމަންޓް މިނިސްޓަރު ތާރިގު އިބްރާހީމް ވިދާޅުވެފައިވާތީ އެކަމަށް އެމްޑީޕީގެ ޗެއާޕާސަންގެ ނައިބު އިބްރާހިމް ވަހީދު ފާޑުވިދާޅުވެއްޖެއެވެ.
''ކުރީ ސަރުކާރު ކުރީ ސަރުކާރުގެ'' ނަމުގައި ބުރާސްފަތި ދުވަހުގެ ރޭ ބޭއްވި ޖަލްސާގައި ވަހީދު ވިދާޅުވީ އެމްޑީޕީގެ ސަރުކާރުގައި ރަށްރަށުގައި އިންޖީނުގެތަކާއި، އޮފީސްތައް އިމާރާތް ކޮށްފައިވަނީ ދުރު ރާސްތާއަށް ބަލައިގެން ކަމަށާއި، ކުރިއަށް 50 އަހަރު ވެސް އެމަސައްކަތް ކުރަން ނުޖެހޭ ގޮތަށް ކަމަށެވެ.
ވަހީދު ވިދާޅުވީ މިސަރުކާރުގެ ބޭފުޅުން އެއީ އިސްރާފެއް ކަމަށް ދެކޭ ކަމަށްވާނަމަ އެބޭފުންގެ ވިސްނުން ބަދަލުކުރަންޖެހޭ ކަމަށެވެ. އަދި މިކަމުން ވެސް ދޭހަވަނީ އެބޭފުޅުންގެ ވިސްނުން ކުޑަކަން ކަމަށް އޭނާ ވިދާޅުވިއެވެ.
މީގެ އިތުރުން ވަހީދު ވިދާޅުވީ ޕީޕީއެމް/ޕީއެންސީ ސަރުކާރުތަކުގައި ރަށްރަށުގައި އިމާރާތްކޮށްފައިވާ އިންޖީނުގެތަކާއި އޮފީސްތައް އިމާރާތް ކޮށްފައިވަނީ ހިޔާ ފްލެޓުތައް ތަރައްގީ ކޮށްފައިވާ އުސޫލުން ކަމަށެވެ.
އަޅުގަނޑަށް ރޭގައި ނޫހުން މިފެންނަނީ މިހާރުގެ އެންވަރުމެންޓް މިނިސްޓަރު ބުނެފައި އޮންނަނީ އެމްޑީޕީ ސަރުކާރުގައި އެބަހުއްޓޭ ރަށްރަށުގައި ބޮޑެތި އިންޖީނުގެތަކެއް އަޅައި ބޮޑެތި އޮފީސްތަކެއް އަޅައި އެ އިސްރާފެކޭ އެބޭފުޅުން ވިދާޅުވަނީ އެނގޭތޯ. ދެން އަޅުގަނޑު ހަމަ ވިސްނާލިން މި އިސްރާފު ވެގެން މިއުޅެނީ ކިހިނެތްވެގެންތޯ. ދެން ޕީޕީއެމް/ޕީއެންސީގެ ކުރީ ސަރުކާރު ހަމަ އެބަހުރި އިންޖީނުގެތަކެއް އަޅާފައި. އެކަމަކު އޭގެ އިންޖީނުގެ ގެއެއްގައި ހިޔާ ފްލެޓެއް ވަރުވަނީ އިންޖީނުގެއެއް ވަނީ. އެކަމަކު މިހާރު މިތަރައްގީގެންދާ ޒަމާނުގައި އަޅުގަނޑުމެންގެ ވެރިކަމުގައި އިންޖީނުގެތައް މިއެޅީ ކުރިއަށް އޮތް 50 އަހަރު ވެސް އިތުރު ތަނެއް އަޅަން ނުޖެހޭނެ ވަރަށް ބަލައިގެން. އެޅީމަ މިބޭފުޅުންނަށް ގަބޫލެއް ނުކުރެވޭ. މި ބޭފުޅުންގެ ވިސްނުން މިހުންނަނީ ވަރަށް ކުޑަކޮށް. ވަރަށް ކުޑަކުޑަ ވިސްނުމެއްގައި މިބޭފުޅުން މިއުޅުއްވަނީ. މިބޭފުޅުންނަށް އަޅުގަނޑުމެން ސަރުކާރުގައި ކަންތައްތައް ކުރާ ގޮތް ވެސް ނޭނގެނީ. ވާހަކަތައް ދެއްކުމުގެ ކުރިން އެވާހަކަތައް ދެއްކުމުގެ ކުރިން ސާފުކޮށްލުން ރަނގަޅު.އެމްޑީޕީގެ ޗެއާޕާސަންގެ ނައިބު އިބްރާހިމް ވަހީދު![]()
ވަހީދު ބަހުގެ ހަމަލާތަކެއް އަމާޒުކުރެއްވީ އެންވަޔަރަންމަންޓް މިނިސްޓަރު ތާރިގު ރަށްރަށަށް ބޭނުން ނުވާ ވަރުގެ އިންޖީނުގެތަކާއި އޮފީސްތައް އަޅާފައި އެބަހުރި ވިދާޅުވެފައިވާތީއެވެ.
މީގެ އިތުރުން މިނިސްޓަރު ތާރިގު ވިދާޅުވީ ރާއްޖެއިން ތެލަށް ބަރޯސާވާ ވަރު ކުޑަކޮށް، އިޔާދަކުރަނިވި ހަކަތައިގެ ވަސީލަތްތައް ބޭނުންކުރުން އިތުރުކުރުމުގެ ގޮތުން ޑިސްޓްރިބިއުޝަނާއި ޖަނަރޭޝަންގެ ވެސް ގިނަ މަސައްކަތްތަކެއް ކުރަން ޖެހިފައިވާ ކަމަށެވެ. ނަމަވެސް މިދިޔަ ސަރުކާރުން ދުރާލައި ރޭވުމެއް ނެތި ކުރިއަށް ގެންދިޔަ މަޝްރޫއުތަކުގެ ސަބަބުން މަސައްކަތްތަކަށް ހުރަސްތަކެއް ކުރިމަތިވެފައިވާ ކަމަށެވެ.
ކުރީ ސަރުކާރުގައި ފެނަކައިގެ ބޮޑެތި އޮފީސް އިމާރާތްތަކާއި އިންޖީނުގެތައް ވަނީ ތަރައްގީކޮށްފައެވެ. ރައްޔިތުންނަށް ރަނގަޅު ޚިދުމަތްތައް ފޯރުކޮށްދިނުމަށް ކަރަންޓުގެ ކެޕެސިޓީ އިތުރުކޮށް އައު ޖަނަރޭޓަރުތައް ވެސް ގެނެސްފައިވެއެވެ. ސަރުކާރު ބަދަލުވެގެންދިޔައިރު ބައެއް ރަށްރަށުގެ އިންޖީނުގެތަކާއި އޮފީސްތަކަށް ބޭނުންވާ ވަސީލަތްތައް ހޯދުމަށް ވަނީ މަސައްކަތް ފަށާފައެވެ. ނަމަވެސް ސަރުކާރު ބަދަލުވުމާއި ގުޅިގެން ބައެއް ވަސީލަތްތައް ރަށްރަށަށް ނުލިބޭ ކަމަށް މައުލޫމާތު ލިބެއެވެ.