މަސްވެރިންގެ ކަންބޮޑުވުންތަކާ ގުޅިގެން ސަރުކާރުން އެކަށީގެންވާ ޖަވާބެއް ނުލިބޭކަމުގައިވާނަމަ، އައްޑޫ މަސް ފެކްޓަރީން ކަރަންޓު ކަނޑާލައި، މަސްވެރިން އެތަނާ ޙަވާލުވާނެކަމަށް މަސްވެރިން ބުނެފިއެވެ.

އިހުތިޖާޖު ކުރަމުންދާ މަސްވެރިން ރާއްޖެޓީވީއާ ވާހަކަ ދައްކަމުން ބުނީ، އާދިއްތަ ދުވަހުގެ ހަވީރު 4:00 އާ ހިސާބަށް ސަރުކާރުން އެކަށީގެންވާ ޖަވާބެއް ނުލިބޭކަމުގައިވާނަމަ، އައްޑޫ މަސް ފެކްޓަރީން ކަރަންޓު ކަނޑާލައި، އެތަނުގެ މުވައްޒަފުން ނެރުމަށްފަހު މަސްވެރިން އެތަނާ ޙަވާލުވާނެ ކަމަށެވެ.

މަސްވެރިން މިވަގުތު ސަރުކާރަށް ކުރަމުންދާ މައިގަނޑު ޑިމާންޑަކީ ފިޝަރީޒް މިނިސްޓަރު ވަޑައިގެން މަސްވެރިންނާ ބައްދަލު ކުރެއްވުމާއި، އެންމެ ކުޑަމިނުން 15 ދުވަސް ތެރޭގައި ފައިސާ ދޭނެކަމުގެ ޔަޤީންކަމެއް ދެއްވުމެވެ.

އޭގެ އިތުރުން މަސްވެރިންނަށް ފައިސާ ނުދޭތާ 2 މަހަށްވުރެ ގިނަ ދުވަސްވެފައިވާއިރު، އެ ފައިސާ ދޭނެ ކަމުގެ ޔަޤީންކަމާއި ދޭނެ ދުވަހެއްވެސް މަސްވެރިން ބަލަން ބޭނުންވެއެވެ.

އޭގެ އިތުރުން، މަސްވެރިންގެ ކަންބޮޑުވުންތަކަށް ޙައްލު ނުލިބޭކަމުގައިވާނަމަ، ރައީސާ ހަމައަށް ގޮސްގެންވެސް އަޑުއުފުލަން ތައްޔާރަށް ތިބިކަން މަސްވެރިން ފާހަގަކުރިއެވެ.

އޭގެ އިތުރުން މަސްވެރިން ވަނީ ފުލުހުން ގެނެސްގެން ހަމަނުޖެހުން އުފައްދަން މަސައްކަތް ނުކުރުމަށްވެސް ސަރުކާރަށް ގޮވާލާފައެވެ.

ރާއްޖެޓީވީއަށް އިންޓަވިއު ދިން ބައެއް މަސްވެރިން ބުނި ގޮތުގައި މިއީ ފަހުގެ ތާރީޚެއްގައި މަސްވެރިންނާމެދު އެންމެ ހުދުމުހުތާރުކޮށް އަމަލުުކުރި ސަރުކާރެވެ.