ނ. މާޅެންދޫގައި ދަންޖެހިގެން މަރުވި ކުޑަ ކުއްޖާ އިތުރު ޓެސްޓްތަކެއް ހެދުމަށް މާލެ ގެނެސްފި އެވެ.

ފުލުހުން ބުނީ މާޅެންދޫގައި ދަންޖެހުނު ކުއްޖާގެ ހަށިގަނޑު އިތުރު ޓެސްޓުތަކެއް ހެދުމަށް އައިޖީއެމްއެޗަށް ގެންގޮސްފައިވާ ކަމަށެވެ. އެކުއްޖާގެ ހަށިގަނޑު މާލެ ގެނެސްފައި ވަނީ 09:50 ހާއިރު އެވެ.

މިހާދިސާގައި ދަންޖެހިފައިވަނީ އުމުރުން 11 އަހަރުގެ ފިރިހެން ކުއްޖެއް ކަމަށް މައުލޫމާތު ލިބެ އެވެ. އަންގާރަ ދުވަހުގެ މެންދުރު 2:00 ހާއިރު ހާއިރު ހިނގި މިހާދިސާ ހިނގާދިޔަ ގޮތް ފުލުހުން އަންނަނީ ތަހުގީގު ކުރަމުންނެވެ.

މިހާދިސާއާ ގުޅޭ ގޮތުން މާޅެންދޫ ކައުންސިލްގެ ރައީސް މުހައްމަދު ޝާހު ވިދާޅުވީ، އެރަށުގައި ހިނގާދިޔަ މިހާދިސާގައި އެކުއްޖާ މަރުވެފައި ވަނީ ދަންޖެހިގެން ކަމަށް ފުލުހުން ނުނިންމާ ކަމަށާއި މަރުވި ކުއްޖާގެ ކަރަށް ވާގަނޑު ބާނާފައި ހުރި ކަމުގެ ނިޝާންތައް ހުރި ކަމުގެ މައުލޫމާތުތަކެއް ލިބިފައިވާ ކަމަށެވެ. އެކުއްޖާ ދަންޖެހިފައިހުރީ ނިދާ ކޮޓަރީގެ ދޮރުގައި ކަމަށް އެރަށު ކައުންސިލުން ވަނީ މައުލޫމާތުދީފަ އެވެ.

އުމުރުން 11 އަހަރުގެ ކުއްޖަކު ދަންޖެހިގެން މަރުވެފައި ހުއްޓާފެނިދައިވާ އިރު އެ ކުއްޖާ ދިރިއުޅުނު ގޭގައި އުޅެނީ އޭނާގެ މަންމަ އާއި ބައްޕަގެ އިތުރުން އޭނާއާ އެއްބަނޑުއެއްބަފާ އިތުރު ދެކުދިންނެވެ.