ކުރީގެ ނައިބު ރައީސް އަހުމަދު އަދީބުގެ ލޯފުޅު ކަށީގެ ޑޮކްޓަރަކަށް ދެއްކުމަށް ބުރާސްފަތި ދުވަހު މާލެ ގެނެސްފި އެވެ.
މިކަމާ ގުޅޭ ގޮތުން އަދީބުގެ އަނބިކަނބަލުން މަރިޔަމް ނަޝްވާ ވިދާޅުވީ ބުރާސްފަތި ދުވަހު ލޮލުގެ ޑޮކްޓަރަށް ދެއްކުމަށް އަދީބު އައިޖީއެމްއެޗް ގެނައި ކަމަށެވެ. އަދި ހޮސްޕިޓަލަށް ގެނައި ފަހުން އެނގުނީ އެޕޮއިންޓެމެންޓް ހެއްދިފައި އޮތީ ކަށީގެ ޑޮކްޓަރަކަށް ކަމަށާއި އެހެންވެ އަނބުރާ ދޫނިދޫއަށް އަދީބު ގެންގޮސްފައިވާ ކަމަށެވެ..
Today Adeeb was brght to igmh for an ophthalmologist consultation n on arrival found the apointmnt was made 4 an 'ortho' & he was taken back
— Nash (@maryam_nashwa) August 3, 2017
ފުލުހުންނާއި ކަރެކްޝަނުގެ ބަންދުގައި ތިބޭ މީހުން ޑޮކްޓަރަށް ދެއްކުމަށް އެޕޮއިންޓެމެންޓް ހައްދަނީ އެ މުއައްސަސާތަކުންނެވެ. އަދީބު މިހާރު ހުރީ ފުލުހުންގެ ބަންދުގައި ދޫނިދޫގައެވެ.
ނަޝްވާ ވަނީ ފުލުހުންގެ މުއައްސަސާއަށް ވަރަށް ބޮޑަށް ފާޑުވިދާޅުވެފަ އެވެ. ކަށީގެ ޑޮކްޓަރަކާއި ލޮލުގެ ޑޮކްޓަރެއް ވަކިކުރަން ދައުލަތުގެ މުއައްސަސާތަކަށް ނޭގޭއިރު، އެ މުއައްސަސާތަކުން ރަނގަޅަށް ކަމެއް ކޮށްފާނެ ކަމަށް އުންމީދު ކުރާނީ ވެސް ކިހިނެއްތޯ ނަޝްވާ ސުވާލު އުފެއްދެވި އެވެ.
When govt authorities cannot identify the difference between an ophthalmologist and an orthopedic doctor what can we expect from them?
— Nash (@maryam_nashwa) August 3, 2017
މިކަމާ ގުޅޭ ގޮތުން ފުލުހުންގެ ބަހެއް ހޯދުމަށް ކުރި މަސައްކަތް ވަނީ ކާމިޔާބުވާ ގޮތް ނުވެފަ އެވެ.
އަދީބުގެ ސިއްޙީ ހާލުކޮޅު ދެރަވެ ފުރާނައަށް ގެއްލުން ވެދާނެ ކަމަށް ޑޮކްޓަރުންނާ ހަވާލާދީ އާއިލާއާ ވަކީލުން ދަނީ ބުނަމުންނެވެ. އަދީބުގެ އެތެރެހަށީގައި ސިސްޓް އުފެދިފައިވުމާއި ލޮލަށް ގްލޮކޮމާ ޖެހިފައިވުމާއި ކިޑްނީގައި ހިލަ އުފެދިފައިވާ ކަމަށް އާއިލާއާ ވަކީލުން ދަނީ ބުނަމުންނެވެ.
އަދީބަށް އިތުރު ފަރުވާ ދިނުމަށް ވީހާވެސް އަވަހަކަށް ރާއްޖެއިން ބޭރަށް ގެންދިއުމަށް ޑޮކްޓަރުން ލަފާދީފައިވާއިރު، ސަރުކާރުން ވަނީ އެ ހުއްދަ އަދީބަށް ނުދިނުމަށް ނިންމާފަ އެވެ. ސަރުކާރުން ބުނަމުންދަނީ އަދީބު ފިއްލަވާފާނެ ކަމަށާއި، އަދީބު ފިއްލަވައިފިނަމަ ދައުލަށް ލިބެންޖެހޭ ފައިސާ ނުލިބޭނެ ކަމަށެވެ.
އަދީބުގެ ލޯޔަރުން ވިދާޅުވަމުން ގެންދަވަނީ ސަރުކާރުން އަދީބު ރާއްޖެއިން ބޭރަށް ނުފޮނުވާ ހިފެހެއްޓުމަކީ ޤާނޫނީ އިމުން ބޭރުން ކުރާ ކަމެއް ކަމަށެވެ.
އަދީބުގެ ބޭސްފަރުވާއަށް ހުރަސްއަޅާ މައްސަލަ ހިއުމަން ރައިޓްސް ކޮމިޝަން އޮފް ދަ މޯލްޑިވްސް(އެޗްއާރްސީއެމް) އަށް ވަނީ ހުށަހަޅާފަ އެވެ. ނަމަވެސް، އެ ކޮމިޝަނުން މިހާތަނަށް އެކަމުގައި އެއްވެސް އެއްޗެއް ބުނެފައެއް ނުވެ އެވެ.
