އިޓާލިއަން ލީގުގައި އުދިނޭޒީއާ ދެކޮޅަށް ކުޅުނު މެޗުން ޔުވެންޓަސް ބަލިވެއްޖެ އެވެ.

ލީގުގައި ހޯމަ ދުވަހުގެ ރޭ ޔުވެންޓަސްގެ އަމިއްލަ ދަނޑުގައި ކުޅުނު މެޗުން އެ ޓީމު ބަލިވީ 1-0 އިންނެވެ. މި ސީޒަންގައި ޔުވެންޓަސް އިން ރަނގަޅު ކުޅުމެއް ދައްކަމުން އަންނައިރު، އެ ބައްޔާއެކު ޔުވެންޓަސް އަށް ވަނީ ދެ ވަނައިގައި އޮތުމަށް ދައްޗާ ކުރިމަތިލާން ޖެހިފަ އެވެ.

ޔުވެންޓަސްއާ ދެކޮޅަށް ކުޅުނު މެޗުން އުދިނޭޒީ މޮޅުވީ، މެޗުގެ 25 ވަނަ މިނެޓުގައި ޖެހި ލަނޑުންނެވެ. އިޓާލިއަން ލީގު ތާވަލްގެ 15 ވަނައިގައި އޮތް އުދިނޭޒީން ލީޑު ނެގީ ޑިފެންޑަރު ލައުޓާރޯ ޖިއަނެއްޓީ ޖެހި ލަނޑުންނެވެ. މެޗުގައި ނަތީޖާ ހަމަހަމަކޮށް، ލީޑު ނެގުމުގެ ފުރުސަތު ޔުވެންޓަސް އަށް ލިބުނު ނަމަވެސް، ކާމިޔާބުވާ ގޮތެއް ނުވި އެވެ.

މިހާތަނަށް ކުޅުނު 24 މެޗުން 52 ޕޮއިންޓާއެކު ޔުވެންޓަސް އޮތީ ދެ ވަނައިގަ އެވެ. ހަމަ އެ އަދަދަށް މެޗު ކުޅެގެން ތިން ވަނައިގައި އޭސީ މިލާނަށް ލިބެނީ 52 ޕޮއިންޓެވެ. އެ ދެ ޓީމަށް ވުރެ އެއް މެޗު މަދުން ކުޅެގެން، އެއް ވަނައިގައި އިންޓަ މިލާނަށް ލިބެނީ 60 ޕޮއިންޓެވެ.