ޕެރިސް 2024 ގެ ރައީސް ޓޯނީ އެސްޓެންގުއެޓްގެ މުސާރައާ ގުޅިގެން ޝަރުއީ ތަހުގީގެއް ކުރަމުންދާ ކަމަށް މި އަހަރުގެ އޮލިމްޕިކްސް އިންތިޒާމްކުރާ ކޮމެޓީން ބުނެފި އެވެ.

އެ ކޮމެޓީން ވަނީ އަންގާރަ ދުވަހު މީޑިއާތަކަށް އެކަން ހިއްސާކޮށްފަ އެވެ. ޕެރިސް 2024 ގެ ކޮމެޓީން ބުނީ ތަހުގީގާ މެދު ހައިރާންވާ ކަމަށާއި، ނަމަވެސް ތަހުގީގު ކުރިއަށް ގެންދާ ފަރާތުން ކުރިމަތި ކުރާ ކޮންމެ ސުވާލަކަށް ޖަވާބު ދޭން ތައްޔާރަށް ތިބި ކަމަށެވެ. އެކަމާ ގުޅިގެން އެ ކޮމެޓީން އިތުރަށް ބުނެފައި ވަނީ، އިންތިޒާމް ކޮމިޓީގެ ރައީސްގެ މުސާރަ އަކީ ވަރަށް ހަރުކަށިކޮށް ރެގިއުލޭޓް ކުރެވިފައިވާ އުޖޫރައެއް ކަމަށެވެ.

އެކަމާ ގުޅިގެން ފައިނޭންޝަލް ޕްރޮސެކިއުޓާ އޮފީހުން ވަނީ އެއްޗެއް ބުނުމަށް ދެކޮޅު ހަދައިފަ އެވެ. އެސްޓަންގުއެޓްގެ މުސާރައިގެ އިބްތިދާއީ ތަހުގީގަކީ، ގޭމްސްގެ ވަށައިގެންވާ ގިނަ ކަންތައްތަކުގެ ތެރޭގައި ހިމެނޭ ތަހުގީގެއް ކަމަށް މީޑިއާ ތަކުން ވަނީ ރިޕޯޓުކޮށްފަ އެވެ.

މިދިޔަ އަހަރުގެ އޮކްޓޫބަރު މަހުގެ ތެރޭގައި ކަމާބެހޭ ފަރާތްތަކުން ވަނީ ޕެރިސް 2024 ގެ ހެޑްކުއާޓާ ވެސް ބަލައި ފާސްކޮށްފަ އެވެ. ނޭޝަނަލް ފައިނޭންޝަލް ޕްރޮސެކިއުޓާ (ޕީއެންއެފް) އިން ބުނީ ޕެރިސް 2024 ގެ މައި އިދާރާ ބަލައި ފާސްކުރީ ސަމާ ގޭމްސް އިންތިޒާމް ކުރާ ކޮމިޓީން ހަދާފައިވާ އެއްބަސްވުންތަކާ ގުޅޭ އިބްތިދާއީ ތަހުގީގެއް 2017 ވަނަ އަހަރު ފެށުމަށް ފަހު ކަމަށެވެ. އަދި އެ އަހަރުން ފެށިގެން އެ މައްސަލަ ތަހުގީގު ކުރަމުން އަންނަ ކަމަށް ވެސް ވަނީ ބުނެފަ އެވެ.

މިއަހަރު ޕެރިހުގައި އޮލިމްޕިކްސް ބޭއްވުމަށް ތާވަލްކޮށްފައި ވަނީ އަންނަ އަހަރުގެ ޖުލައި 26 އިން އޯގަސްޓު 11 އަށެވެ.