ރައްޔިތުން މަޖިލީހުގެ މެންބަރުން ހިފެހެއްޓުމަށް ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ން ފައިސާއެއް ނުދޭނެކަމަށް، އެޕާޓީގެ ޗެއަރޕަރސަން ފައްޔާޒު އިސްމާއީލް ވިދާޅުވެއްޖެއެވެ.
އެމްޑީޕީއާއި ދަ ޑިމޮކްރެޓްސް ގުޅިގެން ބޭއްވި ނޫސްވެރިންގެ ބައްދަލުވުމުގައި ފައްޔާޒު ވިދާޅުވީ، ޕާޓީގެ މެންބަރުންނަށް ވަރަށް އިތުބާރާއެކު ވަރުގަދަ ޓިކެޓެއް ދީފައިވާކަމަށާއި، އެ ޓިކެޓުގައި އިންތިޚާބުކޮށްފައި ވާކަމަށެވެ. މެންބަރުން ހިފެހެއްޓުމުގެ ނިޔަތުގައި ފައިސާ ނުދޭނެކަމަށް ފައްޔާޒު ވިދާޅުވިއެވެ.
ފައްޔާޒު ވިދާޅުވީ އެމްޑީޕީ ދޫކޮށް މެންބަރުން ވަޑައިގަތް ސަބަބު އެނގިވަޑައިނުގަންނަވާ ކަމަށާއި، އެ ބޭފުޅުން އެ ސަބަބުން ވެސް ހާމަކުރައްވާފައި ނުވާކަމަށެވެ. ނަމަވެސް ތަފާތު ވާހަކަތައް އިވިވަޑައިގަންނަވާ ކަމަށާއި، ހަގީގަތް އެނގިވަޑައިނުގަންނަވާ އޭނާ ވިދާޅުވިއެވެ.
މިހާރުގެ ރައީސް ޑރ. މުހައްމަދު މުއިއްޒު އަޒުލުކުރުމަށް މަޖިލީހުގެ ތެރެއިން މަސައްކަތްކުރާކަމަށް ބަޔަކު މީހުން އަޑު ފެތުރިނަމަވެސް، އެމްޑީޕީން އެއްވެސް ރަސްމީ ހައިސިއްޔަތަކުން، ރައީސް އަޒުލުކުރުމުގެ ވިސްނުމެއް ގެންގުޅެފައި ނޯންނާނެކަމަށް ފައްޔާޒު ވިދާޅުވިއެވެ. އެއީ ވަކި ނަތީޖާއެއް ހާސިލްކުރުމަށް އުފެއްދި ވާހަކައަކަށް ވެދާނެ ކަމަށް އޭނާ ވިދާޅުވިއެވެ.
އަޅުގަނޑުމެންގެ ޕާޓީއަށް އެކަމުގެ ސަބަބުން ވަރަށް ބޮޑު ގެއްލުމެއް ލިބުނު. އެކަމަކު އަޅުގަނޑުމެން އަޅުގަނޑުމެންގެ މެންބަރުން ހިފަހައްޓަން ކުރާނީ ކީއްތޯ؟ އަޅުގަނޑުމެން ފައިސާއެއް ނުދޭނަން އަޅުގަނޑުމެންގެ މެންބަރުން ހިފަހައްޓާކަށް. އަޅުގަނޑުމެން އެއޮތީ އަޅުގަނޑުމެންގެ އާއްމު މެންބަރުން ވަރަށް ވަރުގަދަ އެއްޗެއް ދީފަ އެއޮތީ. އެއީ ޓިކެޓް. އެ ޓިކެޓުގަ ހޮވިގެން ވަޑައިގެންނެވީ. އިތުރަށް ޕާޓީއަކުން އެ ބޭފުޅުން ހިފަހައްޓާކަށް ކަމެއް ކުރާކަށް ނުޖެހޭނެ. ޖެހިގެން ނުވާނެ. އެއީ ޕާޓީއެއް ދޫކޮށްލާފަ ދާންޖެހޭ ސަބަބެއް ނޫން. އާއްމު މެންބަރުން އެބޭފުޅުން ހޮވާފަ އެތިބީ.އެމްޑީޕީގެ ޗެއަރޕަރސަން، ފައްޔާޒު އިސްމާއީލް
28 ޑިސެންބަރު 2023ގައި، 13 މެންބަރަކު ވަނީ އެމްޑީޕީ ދޫކުރައްވައި، ޕީއެންސީއަށް ސޮއިކުރައްވާފައެވެ.
