ސަރުކާރުން ކުރިއަށް ގެންދާ ބޮޑެތި ޕްރޮޖެކްޓްތައް ޗައިނާއާއި ހަވާލުކޮށް، ޖުމްލަ 20 އެއްބަސްވުމެއްގައި ސޮއިކޮށްފިއެވެ.

މި އެއްބަސްވުންތަކުގައި ސޮއިކުރުމަށް ޗައިނާގެ ބެއިޖިންގގެ ގްރޭޓް ހޯލް އޮފް ޕީޕަލްގައި ބޭއްވި މި ރަސްމިއްޔާތުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒާއި ޗައިނާގެ ރައީސް ޝީ ޖިންޕިން ބައިވެރިވެވަޑައިގެންނެވިއެވެ.

ދިވެހިރާއްޖެއާއި ޗައިނާއާ ދެމެދު މިއަދު ސޮއިކުރި އެއްބަސްވުންތަކުގެ ތެރޭގައި ހިމެނޭ އުމްރާނީ ބޮޑެތި މަސައްކަތްތަކުގެ ތެރޭގައި މެމޮރަންޑަމް އޮފް އަންޑަރސްޓޭންޑިންގ ބިޓްވީން ޗައިނާ އިންޓަރނޭޝަނަލް ޑިވެލޮޕްމަންޓް ކޯޕަރޭޝަން އެޖެންސީ އާއި ރާއްޖޭގެ މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ މިނިސްޓްރީއާއެކު ވެވުނު އެއްބަސްވުން ހިމެނެއެވެ.

އެގޮތުން ފުށިދިއްގަރު ފަޅުގައި ސޯޝަލް ހައުސިންގ ޕްރޮޖެކްޓް ހިންގުމާއި، ވެލާނާ އިންޓަރނޭޝަނަލް އެއަރޕޯޓުގެ އެކްސްޕޭންޝަން ޕްރޮޖެކްޓާ އަދި ފިޝަރީޒް ޕްރޮޑަކްޓްސް ޕްރޮސެސިންގ ފެކްޓްރީޒް، އަދި މާލެ އާއި ވިލިމާލެ މާލޭގެ މަގުތައް ތަރައްގީކުރުން ހިމެނެއެވެ.

މީގެ އިތުރުން ސޮއިކުރި އެއްބަސްވުންތަކުގެ ތެރޭގައި ވިޔަފާރީގެ ގުޅުންތައް ބަދަހިކުރުމާއި ފަންނީ ދާއިރާތަކުން މީހުން ބިނާކުރުމާއި އިޖުތިމާއީ، އިގުތިސާދީ، ޓެކްނޮލޮޖީ ގުޅުންތައް ވަރުގަދަ ކުރުމާ ގުޅޭ އެއްބަސްވުންތައް ހިމެނެއެވެ.

20 އެއްބަސްވުމެއްގައި ސޮއިކޮށްފައިވާ އިރު، މި އެއްބަސްވުންތަކުގެ ތަފްސީލެއް ސަރުކާރުން ހާމަކޮށްފައި ނުވެއެވެ. މީގެ އިތުރުން ދިވެހި ބަހަށް އިސްކަން ދިނުމަށް ޚާއްސަ ވުޒާރާއެއް އުފައްދާފައިވާ އިރު، ރައީސް އޮފީހުން ހާމަކުރި އެއްބަސްވުންތަކުގެ މައުލޫމާތު ހުރީ އިނގިރޭސީ ބަހުންނެވެ.