ޒަމާނުއްސުރެ އުލިގަމުގައި ކުރިއަށް ގެންދާ ފޯރިގަދަ ބަރބަކިއު މި އަހަރުވެސް އެބަ ކުރިއަށް ދެއެވެ.
މި އަހަރުގެ ބަރބަކިއު އޮތީ އަންގާރަ ދުވަހުގެ ރޭގަނޑު 08:30ގައެވެ. އުލިގަމު ކައުންސިލްގެ ނައިބު ރައީސް އަސަދުﷲ މުހައްމަދު ރާއްޖެ އެމްވީ އަށް މައުލޫމާތުދެއްވަމުން ވިދާޅުވީ މިއީ ރަށުގަ އިޖުތިމާއީ ހަރަކާތެއްގެ ގޮތުގައި ކުރިއަށް ގެންދާ ހަރަކާތެއް ކަމަށް ވާއިރު މިއީ އުލިގަމާއި ގުޅިފައިވާ ވަރަށް ޒަމާންވީ ހަރަކާތެއް ކަމަށެވެ. އަސަދުއްﷲ ވަނީ މި ހަރަކާތުގެ ތާރީހަށް އަލިއަޅުވާލައްވާފައެވެ.
ކޮންމެ އަހަރަކުވެސް މަސައްކަތު ތާވަލްގައި ހިމަނައިގެން މަސައްކަތް ކުރިއަށް ދާތާ މިހާރު ގާތްގަނޑަކަށް 8 ވަނަ އަހަރު މިއީ. އެއީ ކައުންސިލުން އެކަން ކުރާތާ ވީހާ ދުވަސް މި ދެންނެވީ. އަދި އަޅުގަނޑަށް މައުލޫމާތު ލިބޭ ގޮތުން 1980 އިން ފެށިގެން އެކި އެކި ފަރާތްތަކުން ކުރަމުން އައި ކަމެއްކަމަށް ވަނީ މިއީ. ރަށުގެ ކުދި ބޮޑު އެންމެން ބައިވެރިވާ ކަމެއް. ރަށަށް އަންނަ މީހުން ވެސް މިކަމުގައި ބައިވެރިވާނެއަސަދުއްﷲ
ކޮންމެ އަހަރަކު ބާއްވަމުން އަންނަ މި ހަރަކާތް މި އަހަރުވެސް ކުރިއަށް ދަނީ ވަރަށް ފޯރި އާއި އެކުގައެވެ. ވަރަށް އެއްބައިވަންތަކަމާއި އެކުގައެވެ. އެގޮތުން މި ފަހަރު ބަރބަކިއުގައި 700 މަސް ފިހަން ވަނީ ހަމަޖައްސާފައެވެ. މިއީ އުލިގަމުގައި ބާއްވާ ފެސްޓިވަލް އެކޭ ބުންޏަސް ދޮގަކަށް ނުވާނެއެވެ. އެއީ މި ހަރަކާތަށް ވަރަށް ބޮޑަށް ތައްޔާރުވެ, ދުވަސްތަކަކަށް ބަހާލައިގެން ބަރބަކިއުގެ ކަންކަން އިންތިޒާމްކޮށް، ބަރބަކިއު ފުރިހަމަ ކުރަން އަބަދުވެސް އެ ރަށުގެ އެންމެން މަސައްކަތް ކުރެއެވެ.
ބާބަކިއު ގްރިލް އަށް ބޭނުންވާ ދަރު ހޯދުން އެއީ އެއް ދުވަސް. ވަކި ދުވެހެއްގައި އެކަން ކުރަނީ. ބާބަކިއު ހެދުމަށް ބޭނުންވާ އޫ ތައްޔާރު އެއް ދުވަސް. އަންގާރަ ދުވަހުގެ ހެނދުނު 05:45ގައި ފުރައިގެން 03:00 އަށް ލަފާގޮތަށް މަހަށް ފުރާނެ. އައިސް މަހެއް ބޭނުން ނުކުރާނެ. ތާޒާ މަސް ބޭނުން ކުރާނީ. އަންނަ އިރު މަސް ބާނާ، ޅިޔަ އަޅާ ތައްޔާރުކޮށްފައި ހުންނާނީ.އަސަދުއްﷲ
މި ބަރބަކިއު އަށް އަންހެން ވެރިންގެ ދައުރުވެސް ވަރަށް މުހިންމެވެ. އެއީ ހެނދުނު ސަޔާއި މެންދުރުގެ ކެއުމާއި ތައްޔާރުކުރަނީ ހުރިހާ އެންމެން އެކުގައި އެންމެން އެއް ޖަމާއަތެއްގައެވެ. އަދި މަސްވެރިންނަށް ފަރިވަޅު އެރުވުމުގެ އިންތިޒާމްތައް ވެސް ހަމަޖައްސަނީ ހަމަ މި އަންހެން ވެރިންނެވެ. އަންހެން ވެރިންގެ ޓާސްކުތަކުގެ ތެރޭގައި ނޫނީ މަސައްކަތްތަކުގެ ތެރޭގައި ދެން ހިމެނެނީ ރޮށްޓާއި، ބޮނޑިބަތް ތައްޔާރުކުރުމެވެ. އެ މަސައްކަތް ވެސް ކުރަނީ އެންމެން އެކުގައެވެ.
މީގެ އިތުރުން އަންގާރަ ދުވަހުގެ 06:00 އިން ފެށިގެން މަސް ފިހާ ބެޑް ތައްޔާރުކޮށް، މިރުސްގަނޑު ތައްޔާރުކުރުުގެ ކަންކަން ފަށާނެ ކަމަށް އަސަދުﷲ ވަނީ ބުނެފައެވެ. ބާބަކިއު ފަށަނީ 08:30ގައެވެ. މުޅި މި ހަރަކާތަކީ ރަށުގެ އެންމެންނާ ރަށަށް އަންނަ މެހެމާނުން ބައިވެރިވާ ހިތްގައިމު ހަރަކާތެކެވެ. އަދި މިއީ މިހާރު އުލިގަން ރާއްޖެ އަށް މަޝްހޫރުކޮށްލާ ފަދަ މަޤްބޫލް ބަރބަކިއުއެެކެވެ.
