އަންނަ އަހަރު ފްރާންސްގައި އޮންނަ އޮލިމްޕިކްސްގައި ރަޝިޔާ އަދި ބެލަރޫސްގެ އެތުލީޓުންނަށް މަރުހަބާ ކިޔާނެ ކަމަށް، ޕެރިސް 2024ގެ ރައީސް ޓޯނީ އެސްޓަންގުއޭޓް ވިދާޅުވެއްޖެ އެވެ.

ރަޝިޔާ އިން ޔޫކްރެއިނަށް ދެމުން އައި ހަމަލާތަކުގެ ސަބަބުން، ދުނިޔޭގެ ކުޅިވަރު އިދާރާތަކުން ވަނީ އެ ޤައުމާ ދެކޮޅަށް ދަތިކުރުމުގެ ފިޔަވަޅުތައް އަޅައިފަ އެވެ. އެގޮތުން ޔޫރަޕުގެ ފުޓުބޯޅައިގެ މައި އިދާރާ (ޔުއެފާ) އާއި ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ވަނީ ރަޝިޔާގެ ޤައުމީ ޓީމާއި، އެ ޤައުމުގެ ކުލަބުތައް ވެސް ސަސްޕެންޑުކޮށްފަ އެވެ. މީގެ އިތުރުން އިންޓަނޭޝަނަލް އޮލިމްޕިކް ކޮމެޓީ (އައިއޯސީ) އިން ވެސް ވަނީ ރަޝިޔާގެ އެތުލީޓުނަށް ގޭމްސްތަކުގައި ބައިވެރިނުވެވޭނެ ކަމަށް ނިންމައިފަ އެވެ. ނަމަވެސް ފަހުން ވަނީ ބައެއް ގޭމްސްތަކުގައި އެ ޤައުމުގެ އެތުލީޓުންނަށް ވާދަކުރުމުގެ ފުރުސަތު ދޭން ނިންމައިފަ އެވެ.

އެސްޓަންގުއޭޓް ވިދާޅުވީ، ބައިނަލްއަގްވާމީ ފެޑެރޭޝަނުން ކޮލިފައިވެ، އިންޓަނޭޝަނަލް ޕެރަލިމްޕިކް އަދި އޮލިމްޕިކް ކޮމިޓީން ވެލިޑޭޓްކޮށްފައިވާ އެތުލީޓުންނަށް އިޝާރާތް ކުރެވިފައިވާ އުސޫލެއްގެ ތެރޭގައި ބައިވެރިވުމަށް މަރުހަބާ ކިޔާނެ ކަމަށެވެ. އޭގެ މާނައަކީ އެ އެތުލީޓުންނަށް އެއްވެސް ދިދައެއް ބޭނުން ނުކުރެވޭނެ ކަމަށާއި، ޤައުމީ ސަލާމް ޖެހުމެއް ނޯންނާނެ ކަމަށާއި، އަދި އެއްވެސް ޓީމު ކުޅިވަރެއްގައި ބައިވެރިނުވެވުން ކަމަށް ވެސް އޭނާ ވަނީ ވިދާޅުވެފަ އެވެ. އެހެންކަމުން އެ އެތުލީޓުން ހިމެނޭ ޑެލިގޭޝަން ކުޑަ ވާނެ ކަމަށާއި، ނަމަވެސް، ޕެރިސް 2024 އިން އެ އެތުލީޓުންނަށް މަރުޙަބާ ކިޔާނެ ކަމަށް ވެސް އޭނާ ވިދާޅުވި އެވެ.

އަންނަ އަހަރު ޕެރިހުގައި އޮލިމްޕިކްސް ބޭއްވުމަށް ތާވަލްކޮށްފައި ވަނީ ޖުލައި 26 އިން އޯގަސްޓު 11 އަށެވެ.