ރައީސުލްޖުމްހޫރިއްޔާ ޑރ.މުހައްމަދު މުއިއްޒު ޗީފް އޮފް ޑިފެންސް ފޯސްގެ މަގާމަށް މޭޖަރ ޖެނެރަލް ޢަބްދުއްރަހީމް އަބްދުއްލަތީފް އައްޔަންކުރައްވައިފިއެވެ.

ޢަބްދުއްރަހީމް އަބްދުއްލަތީފް ސިފައިންގެ ޚިދުމަތް ފެށްޓެވީ 18 ފެބްރުވަރީ 1985 ގައެވެ. އޭނާ އަކީ ރައީސުލްޖުމްހޫރިއްޔާގެ ޚާއްޞަ އިނާމު، 1989 ވަނަ އަހަރު ލިބިވަޑައިގެންފައިވާ ބޭފުޅެކެވެ. އަދި ދިވެހި ދައުލަތަށް ޚިދުމަތް ކުރުމުގެ އިނާމު 2021 ވަނަ އަހަރު އޭނާ ވަނީ ހާސިލްކުރައްވާފައެވެ.

ޢަބްދުއްރަހީމް އަބްދުއްލަތީފް ވަނީ ސިފައިންގެ އިންޓެލިޖެންސްގެ ދާއިރާ ހަރުދަނާ ކުރެއްވުމަށް ގިނަ މަސައްކަތްތަކެއް ކުރައްވާފައެވެ. އޭނާ އިސް ދައުރެއް އަދާކުރެއްވި ކަންކަމުގެ ތެރޭފައި ސާރކް ސަމިޓުގެ ސެކިއުރިޓީއާބެހޭ މަސައްކަތާއި، ސުނާމީ ކާރިޘާއާ ގުޅިގެން ލިބުނު ގެއްލުންތައް އިއާދަކުރުމަށް ކުރި މަސައްކަތްތަކާއި، ކޯވިޑް19 ފެސިލިޓީގެ މަސައްކަތްތަކާއި، ނަޞްރުގެ ދުވަހުގެ ހަނދާނީ ބިނާގެ މަސައްކަތްފަދަ މަސައްކަތްތައް ހިމެނެއެވެ.

ޢަބްދުއްރަހީމް އަބްދުއްލަތީފް ފުރުއްވައިފައިވާ އިސް މަގާމުތަކުގެ ތެރޭގައި، ވައިސް ޗީފް އޮފް ޑިފެންސް ފޯސްގެ މަޤާމާއި ސަދަން އޭރިޔާގެ ކޮމާންޑަރުގެ މަގާމާއި، ސެނަހިޔާ މިލިޓަރީ ހޮސްޕިޓަލުގެ ކޮމަޑާންޓު ފަދަ މަޤާމުތައް ހިމެނެއެވެ. މީގެ އިތުރުން ވެލްފެއަރ ބޯޑުގެ ޗެއަރމަންކަމުގެ މަގާމުގެ އިތުރުން، އެމް.އެން.ޑީ.އެފް. ގްރީވަންސް ބޯޑުގެ ޗެއަރޕަރސަން ކަމުގެ މަގާމާއި، އެމް.އެން.ޑީ.އެފް.ގެ ސްޕޯކްސްޕާރސަން ކަމުގެ މަޤާމު ހިމެނެއެވެ.