ގިނަ ދުވަސްތަކެއް ވަންދެން ކުޅުމާ ދުރުގައި ހުރުމަށްފަހު، އަލުން އެނބުރި ކުޅުމުގެ ތެރެއަށް އައިއިރު ޑޮކްޓަރުން އޮތީ އިންޒާރު ވެސް ދީފައި ކަމަށް، ސައުދީ ލީގުގެ އަލް ޙިލާލަށް ކުޅެމުން އަންނަ ބްރެޒިލްގޭ ނޭމާ ޖޫނިއާ ބުނެފި އެވެ.
ފްރާންސްގެ ޕެރިސް ސެއިންޓް ޖާމަން (ޕީއެސްޖީ) ދޫކޮށްލުމަށްފަހު ނޭމާ އަލް ޙިލާލަށް ބަދަލުވީއިރު، ވަރަށް ކުރީ ކޮޅު އޭނާ އަށް ވަނީ އަނިޔާވެފަ އެވެ. އެ އަނިޔާގެ ސަބަބުން ގިނަ ދުވަސްތަކެއް ވަންދެން ނޭމާ ވަނީ ކުޅުމާ ދުރުގައި ހުންނަން ޖެހިފަ އެވެ. ނަމަވެސް އަނިޔާ އިން ރަނގަޅުވެ، އަލުން ނޭމާ ކުޅުމުގެ ތެރެއަށް އައީ މިދިޔަ އޮކްޓޫބަރު މަހުގެ ތެރޭގަ އެވެ.
އެންމެ ފަހުން އަލް ޙިލާލް އިން އޭއެފްސީ ޗެމްޕިއަންސް ލީގުގައި އަލް އިސްތިޤުލާލާ ދެކޮޅަށް ކުޅުނު މެޗުގައި ނޭމާ އަށް ވަނީ އަނިޔާވެފަ އެވެ. އަލް އިސްތިޤުލާލުގެ އޭރިޔާ ތެރެއިން ލިބުނު ބޯޅަ އަކަށް ކުޅެން އުޅުމުގެ ތެރޭގައި ނޭމާގެ ފަޔަށް އަނިޔާވެފައިވާއިރު، އެ އަނިޔާގެ ސަބަބުން އޭނާ ވަނީ ބަދަލު ކޮށްފަ އެވެ. ނަމަވެސް އަނިޔާގެ މާ ބޮޑު ތަފުސީލެއް ނުލިބެ އެވެ.
އެ މެޗަށްފަހު އަނިޔާއާ ގުޅޭ ގޮތުން ވާހަކަ ދައްކަމުން ނޭމާ ބުނީ، އޭނާގެ ފަޔަށް ތަދުވި ކަމަށާއި، ނަމަވެސް އޭނާ ހުރީ ވަރުގަދަކޮށް ކަމަށެވެ. އެހެންކަމުން ކުރިއަށް އޮތް ވަގުތު ތަކުގެ ތެރޭގައި އިތުރު މެޑިކަލް ޓެސްޓުތައް ހަދާނެ ކަމަށާއި، އުންމީދު ކުރަނީ އެއްވެސް ގެއްލުމެއް ނުވަތަ ގޯހެއް ނުވުން ކަމަށް ވެސް ނޭމާ ބުންޏެވެ.
މީގެ އިތުރުން ނޭމާ ބުނީ އަނިޔާގެ ސަބަބުން ގާަތް ގަނޑަކަށް އަހަރެއްހާ ދުވަސް ވަންދެން ކުޅުމާ ދުރުގައި ހުރުމަށްފަހު، އަލުން އެނބުރި ކުުޅުމުގެ ތެރެއަށް އައިސްފައިވާއިރު، އެކަހަލަ ކަމެއް ދިމާވެދާނެ ކަމަށެވެ. އޭނާ ބުނީ ކުރިން ވެސް ޑޮކްޓަރުން އޮތީ އިންޒާރު ކޮށްފައި ކަމަށާއި، ކުޅުމުގެ ތެރޭގައި އޭނާ ވަރަށް ބޮޑަށް ސަމާލުވާން ވެސް ޖެހޭނެ ކަމަށެވެ.
އަލް ޙިލާލާ އެކު ނޭމާ ސޮއި ކޮށްފައި ވަނީ ދެ އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްުވުމުގެ މުއްދަތު ހަމަވާނީ 2025 ވަނަ އަހަރު އެވެ. ނަމަވެސް ނޭމާގެ ކުރިމަގާ މެދު އަލް ޙިލާލް ވެސް އަދި ނޭމާ ވެސް މިހާތަނަށް ވަކި އެއްޗެއް ނުބުނެ އެވެ.
