އޮމާންކަމާއެކު ވެރިކަން ބަދަލުވީ ހަމައެކަނި މިފަހަރު ކަމަށާއި، މީގެކުރިން ވޯޓުން ނުވިއްޔާ ކޯޓާއި މަގުމަތިން އެކަން ކުރަން އުޅެފައިވާކަމަށް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.

ދިވެހި ޖުމްހޫރީ ނިޒާމަށް 55 ފުރުމާ ގުޅިގެން ޤައުމާ މުޚާޠަބުކުރައްވައި ދެއްކެވި ވާހަކަފުޅުގައި ރައީސް ވަނީ، ދުވަހުގެ ހެޔޮއެދުމާއި ތަހުނިޔާ ދިވެހި ރައްޔިތުންނަށް ފޮނުއްވާފައެވެ.

ރައީސް ވިދާޅުވީ، މީގެ 5 އަހަރުކުރިން ރާއްޖޭގެ ރައްޔިތުން އެ މަޤާމަށް އެމަނިކުފާނު އިންތިޚާބުކުރީ ސަަބަބުތަކެއް އޮވެގެންކަމަށާއި، ރައްޔިތުންގެ އުއްމީދުތަކެއް އޮތްކަމަށެވެ. އޭގެތެރޭގައި އަމާންކަމާއި ހަމަޖެހުން ޤައުމުގައި ޤާއިމުކޮށް، މިނިވަން ސިޔާސީ މާޙައުލެއް ޤާއިމު ކުރުމާއި، އަސާސީ ޚިދުމަތްތައް ތަރައްޤީކޮށްދިނުން ފަދަ ކަންކަން ހިމެނޭކަން ރައީސް ފާހަގަކުރެއްވިއެވެ.

ރައީސް ޞާލިޙު އިތުރަށް ވިދާޅުވީ، ކުރިއަށް އޮތް ތަނުގައިވެސް އަމާންކަމާއެކު ވެރިކަން ބަދަލުވާ މަންޒަރު ދެކެން ރައްޔިތުން ބޭނުންވާނެކަމަށެވެ.

ރައީސް ޞާލިޙު އިތުރަށް ވިދާޅުވީ، އަސާސީ ޚިދުމަތްތައް ހުރިހާ ރައްޔިތުންނަށް ފަހިވެގެން މެނުވީ ފުރިހަމަ ޖުމްހޫރިއްޔާއެއް ޤާއިމު ނުވާނެކަމަށެވެ. މި ނިމިގެން ދިޔަ 5 އަހަރު އެ މަގަށް މަސައްކަތް ކުރެވިފައިވާކަން ރައީސްގެ ވާހަަކަފުޅުގައި ފާހަގަކުރެއްވިއެވެ.

ރައީސް ޞާލިޙު ވަނީ އެކަމުގެ ބައެއް މިސާލުތަކަށްވެސް އަލިއަޅުއްވާލައްވާފައެވެ.

ބާރުތައް އެއްތަނަކަށް ޖަމާކޮށްގެން ކުރިނާރާކަން ރާއްޖޭގެ ތާރީޚުން ހެކިދޭކަން ފާހަގަކުރައްވައި ރައީސް ވިދާޅުވީ، އެއީ ތަރައްޤީއަށްވެސް އެޅޭ ހުރަހެއް ކަމަށެވެ

ރައީސް ވަނީ، މިދިޔަ 5 އަހަރުގެ ބައެއް ކާމިޔާބީތަކަށްވެސް އަލިއަޅުއްވާލައްވާފައެވެ. އޭގެ ތެރޭގައި އެކި ރޮނގުރޮނގުން ސަރުކާރަށް ހޯދިފައިވާ ކާމިޔާބީތައް ފާހަގަކުރެއްވިއެވެ.

ރައީސް އިތުރަށް ވިދާޅުވީ، ކޮވިޑް-19ގެ ބަލިމަޑުކަން ފަދަ ބޮޑެތި ގޮންޖެހުންތައް މި ވެރިކަމުގައި ކުރިމަތިވެފައި ވާކަމަށެވެ. އެހެންނަމަވެސް ރައްޔިތުންނަށް ބޭނުންވާ ކާޑާއި، ބޭހާއި ޚިދުމަތްތައް ހުއްޓުމެއްނެތި ކުރިއަށްދާނެ ގޮތަކަށް ޤައުމުގެ ކަންކަން އިންތިޒާމުކުރެއްވުމަށް މަސައްކަތްޕުޅު ކުރެއްވިކަން ރައީސް ފާހަގަކުރެއްވިއެވެ.

ރައީސް ވަނީ ކޮވިޑް-19އަކީ އެމަނިކުފާނުގެ ޙަޔާތްޕުޅުގެ އިމްތިޙާނެއްކަން ފާހަގަކުރައްވައި، އެމަނިކުފާނުގެ އެންމެ ގިނަ ރޭ އަވަހާރަފުޅު ނުލެއްޕެވި ދިޔަ ސަަބަބުކަމުގައި ވިދާޅުވެފައެވެ.

ރައީސް ޞާލިޙު ވަނީ ދިވެހި ފުދުންތެރިކަން އިތުރުކުރުމާއި، އިޤްތިޞާދު ފުޅާކުރުމަށް މި ސަރުކާރުން ކޮށްފައިވާ މަސައްކަތްތަކާއި، މިހާރު ފެށިފައިވާ މަސައްކަތްތަކަށްވެސް އަލިއަޅުއްވާލައްވާފައެވެ.

އޭގެ ތެރޭގައި އެއާޕޯޓުތައް ތަރައްޤީކުރުމާއި، ފަތުރުވެރިކަމާއި މަސްވެރިކަން ފުޅާކުރުން ހިމެނެއެވެ.

ރައީސް ވިދާޅުވީ، ނުފޫޒުން އެއްކިބާވެ މަސައްކަތްކުރުމުގެ ބާރު ކޯޓުތަކަށްވެސް ލިއްބައިދީފައި ވާނެކަމަށާއި، އިޖްތިމާޢީ ޢަދާލަތު ޤާއިމުކޮށް، ފަރުދީގޮތުން ރައްޔިތުންނަށް ހެޔޮ ވެރިކަމެއް ކޮށްދިނުމަށް ސަރުކާރަށް ލިބުނު ކޮންމެ ފުރުސަތެއްގެ ބޭނުން ހިއްޕަވާފައި ވާނެކަމަށެވެ.

ރައީސް ވަނީ ސަރުކާރުގެ އިދާރާތަކާއި، ސަލާމަތީ ބާރުތަކާއި، ނޫސްވެރިންނާއި، ދިވެހި ރައްޔިތުންނަށް ޝުކުރުއަދާކުރައްވައި، އަލަށް އިންތިޚާބުވި ސަރުކާރަށް ކާމިޔާބަށް އެދިވަޑައިގެންފައެވެ.