ވެލާނާ އިންޓަރނޭޝަނަލް އެއަރޕޯޓު ވީއައިއޭގެ ގްރައުންޑު ހޭންޑްލިންގުގެ މަސައްކަތަށް އިތުރު ވެހިކަލްތަކެއް ގެނެސް ބޭނުން ކުރަން ފަށައިފިއެވެ.

އެއަރޕޯޓްސް ކޮމްޕެނީ ލިމިޑަޓް (އެމްއޭސީއެލް) އިން ބުނީ ގްރައުންޑު ހޭންޑްލިންގުގެ މަސައްކަތްތަކަށް އިތުރުކޮށްފައިވާ ވެހިކަލްތަކާއި އިކުއިޕްމަންޓުތަކުގެ ތެރޭގައި 4 ފަސިންޖަރ ބަހާއި، 4 އެއަރކްރާފް ސިޑި ބަރިއާއި، 2 ޔުނިވަރސަލް ލޯޑާ، 2 ހައި ލޯޑާ، 10 ބެގޭޖު ޓްރެކްޓާ، 14 ގޮނޑީގެ 1 މިނީވޭންގެ އިތުރުން 32 ގޮނޑީގެ ބަހެއް ހިމެނޭ ކަމަށެވެ.

ވެލާނާ އިންޓަރނޭޝަނަލް އެއަރޕޯޓުގެ މަސައްކަތްތަކަށް ގެނެސްފައިވާ އައު ވެހިކަލްތަކާއި، އިކުއިޕްމަންޓުތައް ބޭނުންކުރަން ފެށުން ފާހަގަކުރުމަށް ހާއްސަ ހަފްލާއެއް ބާއްވާފައިވާއިރު މި ހަފްލާގައި އެމްއޭސީއެލްގެ މެނޭޖިންގ ޑިރެކްޓަރ މަހުޖޫބް ޝުޖާއު އަދި އެ ކުންފުނީގެ އިސްވެރިން ވަނީ ބައިވެރިވެފައެވެ.

ގްރައުންޑު ހޭންޑުލިންގުގެ މަސައްކަތަށް އިތުރު ވެހިކަލްތަކާއި އިކުއިޕްމަންޓު ގެނެސްފައިވަނީ އެ އެއަރޕޯޓުން އެއަރލައިންތަކަށް ދޭ ޙިދުމަތްތައް އަވަސްކޮށް ހަރުދަނާކުރުމަށް ކަމަށް އެމްއޭސީއެލް އިން ބުންޏެވެ.

ވެލާނާ އިންޓަރނޭޝަނަލް އެއަރޕޯޓު ވީއައިއޭގެ ގްރައުންޑު ހޭންޑްލިންގުގެ މަސައްކަތަށް އިތުރު ވެހިކަލްތަކެއް ގެނެސް ބޭނުން ކުރަން ފަށާފައިވާއިރު އެމްއޭސީއެލް އިން، ރާއްޖޭގައި ފުރަތަމަ ފަހަރަށް ވީއާރު ސިސްޓަމްގެ އެހީގައި ރޭމްޕް އޮފިސަރުން ތަމްރީނުކޮށްފައިވެސް ވެއެވެ.