ހިލޭ ޑިްގްރީގެ ސަބަބުން ރާއްޖޭގައި ތައުލީމީ ފެންވަރު ދަށްވާނެކަމަށް ގަބޫލުފުޅުނުކުރައްވާކަމަށް އެމްކިއުއޭގެ ސީއީއޯ ޑރ. އަބްދުލް ހަންނާނު ވަހީދު ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅުދައްކަވަމުން މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)ގެ ސީއީއޯ ހަންނާނު ވިދާޅުވީ، ރާއްޖޭގައި ކިޔަވާދޭ ކޯސްތަކަކީ އެމްކިއުއޭ އިން އެކްރެޑިޓްކޮށްފައިހުރި ކޯސްތައްކަމަށާއި، އެ ކޯސްތަކުގެ ތެރެއިން ޑިގްރީ ފެންވަރުގެ ކޯސްތައް ހިލޭ ޑިގްރީގެ ތެރެއިން ކިޔަވާދެމުންދާތީވެ ތައުލީމީ ފެންވަރު ދަށްވާނެކަމަށް ގަބޫލުފުޅުނުކުރާކަމަށެވެ.
ހަންނާނު އިތުރަށް ވިދާޅުވީ، ސަރުކާރުން ކަމަކަށް ޚަރަދުކުރާއިރު އެކަމަކުން ނިކުންނާނެ ނަތީޖާއާއިމެދު ވިސްނާނެކަމަށާއި، އެ ކޯހެއް ރަނގަޅަށް ފުރިހަމަކުރުމަށް ސަރުކާރުން ބާރުއަޅާނެކަމަށެވެ.
ސަރުކާރަކުން ކަމަކަށް ޚަރަދުކުރާއިރުގައި އެއާއެކޮށް އަންނަޖެހޭނެ އެކައުންޓިބިލިޓީ. އޭގެ މާނައަކީ ކުރާ ޚަރަދު. ޚަރަދު އެ ކުރަނީ އަސްލު ހަރުދަނާގޮތަކަށްކަން ޔަގީންކުރެވެންޖެހޭނެ އެ ފަންޑް ކުރާ ބަޔަކަށް. ދުނިޔޭގެ ހުރިހާ ގައުމެއްވެސް ވާހަކައަކީ އިންޓަނޭޝަނަލް ބެސްޓް ޕްރެކްޓިސް އެއީ. ސަރުކާރަކުން ޚަރަދެއް ކުރާނަމަ، ފަންޑެއް ދޭކަމަށްވާނަމަ އެއާއެކު އެކައުންޓިބިލިޓީ އަންނަންޖެހޭނެ. އެގޮތަށް އެކަން ބަށްޓަންވެގެންދަނީ. އަޅުގަނޑު ގަބޫލުކުރާ ގޮތުގައި ފްރީ ޑިގްރީގަވެސް އެފަދަ ނިޒާމެއް އެކުލަވަލެވިފައި އޮންނާނީ.އެމްކިއުއޭގެ ސީއީއޯ ޑރ. އަބްދުލް ހަންނާނު ވަހީދު
އެގޮތުން، ހަޔަރ އެޑިއުކޭޝަން މިނިސްޓްރީއިން އެކަށައަޅާ ގަވާއިދުތައްވެސް އެކަމަށް ބާރުއަޅާކަމަށް އޭނާ ވަނީ ފާހަގަކުރައްވާފައެވެ.
މިކަހަލަ ގަވާއިދުތައް އެބަހުރި އަޅުގަނޑަށް އެނގިގެން މިނިސްޓްރީގެ ގަވާއިދުތައް ތެރޭގައިވެސް. އަޅުގަނޑަށް ހީވަނީ މިނިސްޓްރީ އިންވެސް ވަރަށް ބޮޑަށް މަސައްކަތްކުރައްވާކަންނޭނގެ، އެހެންވީމަ ދަރިވަރު އެ ވަންނަ ކޯހެއް ރަނގަޅަށް ފުރިހަމަކުރަން.އެމްކިއުއޭގެ ސީއީއޯ ޑރ. އަބްދުލް ހަންނާނު ވަހީދު
މީގެއިތުރުން އޭނާ ވިދާޅުވީ، ރާއްޖޭގައި ކުރިން ހިންގި ބައެއް ކޯސްތައް މިހާރު ހިންގަނީ އެކްރެޑިޓްނުކޮށްކަމަށާއި، އެކްރެޑިޓް ހުއްދައަކީ ފަސް އަހަރުގެ މުއްދަތަށް އެމްކިއުއޭ އިން ދޫކުރާ ހުއްދައެއްކަމަށެވެ. އެހެންކަމުން، މީގެފަހުން ކޯސްތައް ހިންގަން ބޭނުންވާނަމަ އެކްރެޑިޓް ކުރަންޖެހޭނެކަމަށް ހަންނާނު ވިދާޅުވިއެވެ.
އެހެންނަމަވެސް ކުރީގައި އެޕްރޫވްކޮށްފައިހުރި ބައެއް ކޯސްތައްވެސް އަދި އެބަ ހިނގާ އެކްރެޑިޓްނުކޮށްވެސް. އެހެންނަމަވެސް އެ ހުއްދަ އަދި ބާޠިލެއްނުކުރަން. ކުރިން އެޕްރޫވް ކޮށްފައިހުރި ކޯސްތައް ކުރިއަށް ގެންދެވޭނެ. ދެން އެކަމަކު އެކްރެޑިކްކުރަން އެބަ ޖެހެ. އެއީ ފަސް އަހަރުގެ މުއްދަތައް ހޯދާ ހުއްދައެއް.އެމްކިއުއޭގެ ސީއީއޯ ޑރ. އަބްދުލް ހަންނާނު ވަހީދު
ހަންނާނު އިތުރަށް ވިދާޅުވީ، މިހާރު އެފަދަ ކޯސްތައް ނުހުއްޓުވަނީ އިންތިޤާލީ މަރުހަލާއެއްގައި އެ މަރުކަޒުތަކުން އެ މަސައްކަތްކުރަމުންދާތީކަމަށެވެ.
