ޣައްޒާގެ ބިމުގައި ހަމަލާތައް ފަށައިފިނަމަ ނުވަތަ އިސްރާއީލުން އެއްގަމު މަގުން ޣައްޒާއަށް ހަތިޔާރާއެކު އަރައިފިނަމަ ސަރަހައްދީ ހަމަނުޖެހުންތައް އިތުރުވާނެކަމުގެ އިންޒާރު އީރާނުން ދީފިއެވެ.
ހަމާސް ޖަމާއަތާ ދެކޮޅަށް އިސްރާއީލުން ވަރުގަދަ ހަމަލާތަކެއް ދީ، މުޅި ޣައްޒާ ފުނޑުފުނޑުކޮށް، މެދުއިރުމަތީގެ ނުތަނަވަސްކަން ވަރަށް ނާޒުކު ހިސާބަކަށް ގޮސްފައި މި ވަނީ، އިސްރާއީލުގެ އަސްކަރިއްޔާއިން ޣައްޒާއަށް އެއްގަމު މަގުން އަރައިގަތުމުން ސަރަހައްދީ ހަމަނުޖެހުން އުފެދިދާނެކަމުގެ އިންޒާރު އީރާނުން އިސްރާއީލަށް ދީފައި ވަނިކޮށެވެ.
ހަމާސް ޖަމާއަތާއެކު ހިންގަމުންދާ ހަމަނުޖެހުންތައް ދެވަނަ ހަފުތާއަށް ވަދެފައިވާއިރު، އިސްރާއީލުގެ ވައިގެ ހަމަލާތަކުގައި ގިނަ އަދަދެއްގެ ކުޑަކުދިންވެސް ވަނީ މަރުވެފައެވެ. އީރާނުގެ ޚާރިޖީ ވަޒީރު ހުސައިން އާމިރު އަބްދުއް ލަހްޔާން ކަންބޮޑުވުން ފާޅުކުރައްވަމުން ވިދާޅުވީ، ޣައްޒާގައި ކުޑަކުދިން މަރަމުންދާއިރު، އިސްރާއީލުން ދޭ ހަމަލާތައް ވަގުތުން ހުއްޓުވުމުގެ މަގުސަދުގައި ކުރަމުންދާ މަސައްކަތްތައް ހުއްޓުމަކަށް އައިސްފިނަމަ، އެހެން ގިނަ ފްރޮންޓްތަކެއް ހުޅުވިގެން ދިއުމަކީ ވަރަށް ގާތް ކަމެއް ކަމަށެވެ.
އަދި އިޒްރޭލުން އެ ސަރަހައްދަށް ވަދެއްޖެނަމަ، އެ ސަރަހައްދު (ޣައްޒާ) ސިފައިންގެ ގަބުރުސްތާނަކަށް ބަދަލުކުރާނެ ކަމަށް އޭނާ ވިދާޅުވިއެވެ. މި މައްސަލަ އިތުރަށް ގޯސްވަމުންދާއިރު، އިސްރާއީލުން ޣައްޒާއަށް ދެމުންގެންދާ ހަމަލާތައް ހުއްޓާލުމަށް އީރާނުން ދަނީ ޑިޕްލޮމެޓިކް މަސައްކަތްތަކެއްވެސް ކުރަމުންނެވެ.
އިސްރާއީލުގެ ހަމަލާތައް ދެމިއޮތްނަމަ، ރައްދު ދިނުމުގެ ހައްގު ހިމާޔަތްކޮށް، ޣައްޒާގެ ހަމަނުޖެހުންތައް އިތުރުވިޔަ ނުދިނުމަށް އެދޭކަމަށް ބުނެ އީރާނުން އދ. މެދުވެރިކޮށް އިސްރާއީލަށް އިންޒާރުތައް ފޮނުވަމުން ދާތީވެސް ހާލަތު ދަނީ އިތުރަށް ގޯސްވަމުންނެވެ.
މިއީ ސައޫދީ އަރަބިއްޔާފަދަ ސަރަހައްދީ ބާރުތަކުން އިސްރާއީލާއެކު ނޯމަލައިޒޭޝަން މަޝްވަރާތައް މެދުކަނޑާލާފައިވާ ދަނޑިވަޅެއްގައި އިސްރާއީލާ ހިޒްބުﷲއާ ދެމެދުވެސް ހަމަނުޖެހުންތައް ހިނގަމުންދާ ދަނޑިވަޅެއްކަން ފާހަގަކޮށްލަން ޖެހެއެވެ.
އިސްރާއީލުންވެސް ވަނީ ލުބްނާނާއެކު އޮންނަ ބޯޑަރު ބަންދުކޮށް، އަސްކަރީ ސަރަހައްދެއްގެ ގޮތުގައި ކަނޑައަޅާފައެވެ. އެހެންކަމުން މިހާރު ހިނގަމުންދާ މި ކާރިސާއަކީ ސަރަހައްދީ ހަމަޖެހުމާއި ޑިޕްލޮމެޓިކްގޮތުން ހަނގުރާމަ ހުއްޓާލުމަށް ކުރަމުންދާ މަސައްކަތްތަކަށް ވަރަށް ބޮޑު ގޮންޖެހުމެކެވެ.
މި ހަމަނުޖެހުން ފެށުނީ މިދިޔަ އޮކްޓޯބަރު މަހުގެ ހަތްވަނަ ދުވަހު އިސްރާއީލުގެ ސަރަހައްދުގެ ތެރޭގައި ހަމާސް ޖަމާއަތުން ދިން ހަމަލާއެއްގެ ސަބަބުން އެތައް ބައެއްގެ ފުރާނަ ގެއްލި ބޮޑެތި ގެއްލުންތަކެއް ލިބުމުން، އޭގެ ބަދަލުގައި އިސްރާއީލުން ވަރުގަދަ ހަމަލާތަކެއް ޣައްޒާއަށް ދޭންފެށުމުންނެވެ.
ޣައްޒާއަށް ކުރިމަތިވެފައިވާ އިންސާނީ ކާރިސާއާ ގުޅިގެން (އީރާން ހިމެނޭ ގޮތުން) ބައިނަލްއަގުވާމީ މުޖުތަމައުން ދަނީ ކަންބޮޑުވުން ފާޅުކުރަމުންނެވެ. އަދި އިތުރަށް ހަލަބޮލިވުމުގެ ފުރުސަތު އޮތުމުން، ހާލަތު އަދިވެސް އޮތީ ވަރަށް ބޮޑަށް ނުތަނަވަސްވެފައެވެ.
