ވޯޓު ކަރުދާހުގައި ޖަހާ ފާހަގަ ނުފެންނަ ގޮތަށް ބޫތުގެ ޑިޒައިނަށް ބަދަލު ގެނެސްފައިވާނެ ކަމަށް އިލެކްޝަންސް ކޮމިޝަންގެ ޑެޕިއުޓީ ޑިރެކްޓަރ އޮފް ޕޮލިޓިކަލް ޕާޓީ އެންޑް ރެގިއުލޭޝަން ޚުޒައިމާ ތައުފީޤު ވިދާޅުވެއްޖެއެވެ.
ރާއްޖެޓީވީގެ ފަސްކާފު ޕްރޮގްރާމުގައި ވާހަކަފުޅު ދައްކަވަމުން ޚުޒައިމާ ވިދާޅުވީ ވޯޓުގައި ފާހަގަ ޖަހާ ބޫތު ފުރަތަމަ ބުރުގައި ބަހައްޓާފައިވަނީ ސިޔާސީ ޕާޓީތަކާއި ކެންޑިޑޭޓުންގެ އެދިވަޑައިގަތުމުގެ މަތިން ކަމަށެވެ. އެގޮތަށް ބަދަލުކުރީ ކުރިން ވޯޓު ބޫތު ބަހައްޓާފައި ހުރި ގޮތުން ޖީބަށް އަތްލާފައި ފޯނު ނަގާ ފޮޓޯ ނެގިޔަސް ނޭނގޭ ކަމަށެވެ.
ޚުޒައިމާ ވިދާޅުވީ ދެވަނަ ބުރުގައި ވެސް ބޫތު ބަހައްޓާނީ ފުރަތަމަ ބުރުގައި ވެސް ބެހެއްޓި ގޮތަށް ކަމަށާއި، ނަމަވެސް ބޫތުގެ ޑިޒައިނަށް ކޮންމެވެސް ވަރެއްގެ ބަދަލެއް ގެނެސްފައިވާނެ ކަމަށެވެ.
ބޫތަށް ބަދަލު ގެނެސްފައިވާނެ. ބޫތު ތަންކޮޅެއް ކުޑަކޮށްލާފައި، ބޫތުގެ ތެރެއިން ސައިޑުން މީހާއަށް ވަދެވޭގޮތަށް ކަނޑާލާފައި ހުރީމަ މި ފެންނަނީ، އެއިރު ހުއްޓިގެން ހުންނަ އިރު ދެފަރާތުން ކެމެރާކުރަން ލިބުނު ޖާގައިން މިފަހަރަކު އެކަން ކުރަން ނުލިބޭނެ. އެހެންވީމަ ފަހަތުން ފެނުނީމަ ޖީބުން ފޯނު ނުނެގޭނެ.އިލެކްޝަންސް ކޮމިޝަނުގެ ޑެޕިއުޓީ ޑިރެކްޓަރ އޮފް ޕޮލިޓިކަލް ޕާޓީ އެންޑް ރެގިއުލޭޝަން ޚުޒައިމާ ތައުފީޤު
އޭނާ ވިދާޅުވީ ވޯޓުގެ ފާހަގައާއި ގުޅޭގޮތުން ގިނަ ޝަކުވާތަކެއް ލިބިފައިވާ ކަމަށެވެ. ނަމަވެސް ގާނޫނު ބުނާ ގޮތަށް އަމަލުކުރަން ޖެހޭ ކަމަށާއި، ގާނޫނުގައި ބުނަނީ ސިއްރު ވޯޓެއް ނަގަންޖެހޭ ކަމަށެވެ. އެހެންކަމުން ވޯޓުގެ ސިއްރުކަން ކަށަވަރުކުރުމަށްޓަކައި ކުރި މަސައްކަތުން ބައެއް ކަންކަން ދިމާވި ކަމަށެވެ. ކޮމިޝަނުން އިތުރުކޮށްފައިވަނީ ދެ ކަމެއްކަން ފާހަގަކުރައްވާ ޚުޒައިމާ ވިދާޅުވީ އެކި ކުލަކުލައިން ފާހަގަ ނުޖެހުމާއި ދެ ފާހަގަ ނުލެވުމާއި، ބޫތު ބަހައްޓާގޮތަށް ބަދަލު ގެނައުން ކަމަށެވެ.
ޚުޒައިމާ ވިދާޅުވީ ދެ ފާހަގަ ޖަހައިފި ނަމަ ނުވަތަ ކޮމިޝަނުން ނިންމާފައިވާ ކުލައެއް ފިޔަވައި އެހެން ކުލައަކުން ފާހަގަ ޖަހައިފިނަމަ ވޯޓު ބާތިލްވާނެކަމަށް ނިންމާފައިވަނީ ކެންޑިޑޭޓުންނާއި ކެންޑިޑޭޓުންގެ މަންދޫބުންގެ ފަރާތުން، ގައުމީ ލަފާދޭ ކޮމިޓީގައި ތިބި މެންބަރުންގެ އެދުމުގެ މަތިން ކަމަށެވެ.
ވަރަށް ގިނަ ޝަކުވާތަކެއް އައި ވަކި ބަޔަކު ނުފޫޒު ފޯރުވުމަށް ވަކި ބަޔަކު އެބަ އަންގައޭ މިވެނި އޮފީހެއްގެ ހުރިހާ ބޭފުޅުން ލާނީ ފިޔާތޮށި ކުލައިންނޭ، ނޫކުލައިންނޭ ނުވަތަ ރީނދޫކުލައިންނޭ. ވަކި ބަޔަކު ޖަހާނޭ ދެ ފާހަގަ. ވޯޓުގެ ސިއްރުކަން ގެއްލޭގޮތަށް ރާވާފައިހުރި ކަންތައްތައް ކުރިއަށް ނުގެންދެވޭނެ ގޮތަކަށް ކޮމިޝަނުން ނިންމީ މި ބަދަލުތަކެއް ގެންނަންޖެހޭ. ގާނޫނުގައި އޮންނަނީ ރަނގަޅު ފާހަގަ ޖަހަން. އެހެންވީމާ ރަނގަޅު ފާހަގަ ޖަހަންޖެހޭ ތަނުގައި 3 ފާހަގަ ޖަހައިގެން ވޯޓުގެ ސިއްރުކަން ގެއްލޭގޮތަށް މުޅިން ގޯސް ނިޔަތުގައި ކުރަންޖެހޭ ކަންކަން މަނާކުރަންޖެހޭ. އެގޮތުގެ މަތިން އެކަން ކުރީ. އެންމެ ބޮޑަށް ގަބޫލުކުރަނީ ކޮމިޝަނުގެ ވިސްނުން ވަރަށް ރަނގަޅަށް ތަންފީޒުވެއްޖޭ.އިލެކްޝަންސް ކޮމިޝަންގެ ޑެޕިއުޓީ ޑިރެކްޓަރ އޮފް ޕޮލިޓިކަލް ޕާޓީ އެންޑް ރެގިއުލޭޝަން ޚުޒައިމާ ތައުފީޤު
އީފާސް ބޭނުން ނުކުރެވޭތީ އެކަމުގެ ކަންބޮޑުވުން އާންމުން ފާޅުކޮށްފައިވާތީ އެކަމާއި ގުޅިގެން ޚުޒައިމާ ވިދާޅުވީ ބަދަލެއް ގެންނަން ނުފެންނާނީ ފުރަތަމަ ބުރުގައި ވެސް އައިޑީކާޑާއި، ލައިސަންސް ކާޑާއި، ޕާސްޕޯޓް ކާޑު އަދި ޕާސްޕޯޓު ބޭނުންކޮށްގެން ވޯޓުލެވޭގޮތަށް ހެދިކަމަށެވެ. ވޯޓުލާ މަރުކަޒުގައި ފޯނު ބޭނުންކުރުމަކީ މަނާކަމެއް ކަމަށާއި، އެހެންކަމުން އީފާސް ނުދެއްކޭނެ ކަމަށާއި، ވޯޓުލާ މަރުކަޒުގެ ތެރެއިން އެކަންކަން ބެލޭނެ ވަސީލަތްތައް ނުހުންނާނެ ކަމަށެވެ. މީގެ އިތުރުން ފޮޓޯ ކޮޕީ ގެންނަ އިރު، ދައުލަތުގެ ނިޝާން ނުހުނާތީ ސައްހަކަން ކަށަވަރު ނުވާނެ ކަމަށެވެ. އެހެންކަމުން ކޮމިޝަނުން ނިންމާފައިވަނީ އިތުރުބަދަލެއް ނާންނާނެ ކަމަށެވެ.
ގާނޫނުގައި ބުނަނީ އައިޑީކާޑާއި، ލައިސަންސް ކާޑާއި، ޕާސްޕޯޓް ކާޑު އަދި ޕާސްޕޯޓު ބޭނުންކުރެވޭނެ ވާހަކަ. އީފާސް ބޭނުން ނުކުރެވޭނޭ ބުނެފައި ނޯވޭ، އެހެންނަމަވެސް ގާނޫނުގައި އޮންނާނެ ވޯޓުލާ މަރުކަޒަށް ފޯނު ނުވެއްދޭނެ ވާހަކަ. އެހެންވީމާ އެ ސަބަބަށްޓަކައި ކޮމިޝަނުން ނިންމާފައިވަނީ ވަރަށް ކުރިންވެސް. މިއީ އަލަށް ދައްކާ ވާހަކައެއް ނޫން. ދެން އެންމެ އިސްކަމެއް ދޭންވީ މުއްދަތު ހަމަވެފައިވޭތޯ ބެލުން.އިލެކްޝަންސް ކޮމިޝަންގެ ޑެޕިއުޓީ ޑިރެކްޓަރ އޮފް ޕޮލިޓިކަލް ޕާޓީ އެންޑް ރެގިއުލޭޝަން ޚުޒައިމާ ތައުފީޤު
ޚުޒައިމާ ވިދާޅުވީ ވޯޓުލާ ގަޑި އިތުރުކޮށްފައިވީނަމަވެސް، ވޯޓުލާން ފަށާ ގަޑީގައި މީހުން މަދުން ދިއުމާއި، ނިންމާ ގަޑީގައި ވޯޓުލާންދާ މީހުންގެ އަދަދު އިތުރުވުމަކީ ކަންބޮޑުވުމެއް ކަމަށެވެ. މީގެއިތުރުން ރީ-ރަޖިސްޓްރޭޝަންގައި ވެސް އެންމެ ފަހު ވަގުތު ގިނަ އަދަދެއްގެ ބަޔަކު ރީ-ރަޖިސްޓްރޭޝަނަށް ފޯމް ހުށަހަޅާކަން ފާހަގަކުރެވިފައިވާ ކަމަށެވެ. އޭނާ ވިދާޅުވީ އެކަމުގެ ސަބަބުން ދަތިތަކެއް ހުންނަ ކަމަށެވެ.
