މޯލްޑިވްސް ކޮލިފިކޭޝަންސް އޮތޯރިޓީ (އެމް.ކިއު.އޭ) އާއި މޯލްޑިވްސް ސްކިލްސް ޑިވެލޮޕްމެންޓް އޮތޯރިޓީ (އެމް.އެން.އެސް.ޑީ.އޭ) އާ ގުޅިގެން ބުދަ ދުވަހު ފަހުމުނާމާއެއްގައި ސޮއިކޮށްފިއެވެ.
މި ރަސްމިއްޔާތު ޝަރަފުވެރި ކޮށްދެއްވީ މިނިސްޓަރ އޮފް ހަޔަރ އެޑިޔުކޭޝަން ޑރ. އިބްރާހީމް ޙަސަންއެވެ. މި ފަހުމުނާމާއަކީ ނޭޝަނަލް ކޮމްޕިޓެންސީ ސްޓޭންޑަޑްތަކުގެ ދަށުން ހިންގާ ޕްރޮގްރާމްތައް އެކްރެޑިޓް ކުރުމަށްޓަކައި އެ ދެ އިދާރާގެ ދެމެދު ވެވުނު ފަހުމުނާމާއެކެވެ.
މި ފަހުމުނާމާގައި ސޮއިކުރި ރަސްމިއްޔާތުގައި، އެމް.ކިއު.އޭގެ ސީ.އީ.އޯ ޑރ. ޢަބްދުލްޙަންނާން ވަހީދު ވިދާޅުވީ، މި ފަހުމުނާމާގެ ސަބަބުން އެމް.އެން.އެސް.ޑީ.އޭ އިން ރެޖިސްޓަރޑް ޓްރެއިނިންގ ޕްރޮވައިޑަރސް (އާރ.ޓީ.އޯ) ތަކާ ހަވާލުކޮށްގެން ކުރިޔަށްގެންދާ ނޭޝަނަލް ކޮމްޕިޓެންސީ ސްޓޭންޑަޑްތަކުގައި ހިމެނޭ މަސައްކަތު ތަޢުލީމާއި ތަމްރީނުގެ ތަފާތު އެކި ޕްރޮގްރާމްތައް ވީހާ ވެސް ގިނަ ބަޔަކަށް ފުރުސަތު ލިބޭގޮތަށް ހިންގުމަށް މަގު ފަހިވެގެން ދާނެކަމަށެވެ.
މިގޮތުން އެކްރެޑިޓެޑް ކުރެވޭ ޕްރޮގްރާމްތައް ވެސް އެކްރެޑިޓެޑް ކުރެވެމުން ދާ ވަރަކަށް، އެމް.ކިއު.އޭގެ ވެބްސައިޓްގެ ކޮލިފިކޭޝަންސް ރެޖިސްޓަރީގައި ޝާއިއުކުރެވެމުން ދާނެ ކަމަށް އެމް.ކިއު.އޭއިން މަޢުލޫމާތުދެއެވެ.
މި ފަހުމުނާމާގައި އެމް.ކިއު.އޭގެ ފަރާތުން ސޮއިކުރެއްވީ އެ އޮތޯރިޓީގެ ޑިރެކްޓަރ ޖެނެރަލް މަރްޔަމް ފިޒާނާ ރަޝީދުއެވެ. އަދި އެމް.އެން.އެސް.ޑީ.އޭގެ ފަރާތުން ސޮއިކުރެއްވީ އެ އޮތޯރިޓީގެ ޑިރެކްޓަރ ޖެނެރަލް ޝަކީބާ އަލީއެވެ.
