ސްޕެއިންގެ ޤައުމީ އަންހެން ޓީމުގެ ކޯޗުކަމުގެ މަގާމަށް ފުރަތަމަ ފަހަރަށް އަންހެނަކު ހަމަޖައްސައިފި އެވެ.
ސްޕެއިންގެ ޤައުމީ އަންހެން ޓީމުގެ ކޯޗަކަށް ހަމަޖެއްސީ ކުރިން އެސިސްޓެންޓް ކޯޗަކަށް ހުރި މޮންޓްސޭ ޓޯމް އެވެ. އޭނާ އެ މަގާމަށް ހަމަޖެއްސީ ކޯޗުކަމުން ޖޯޖް ވިލްޑާ ވަކި ކުރުމަށްފަހު އެވެ. މިއީ އުމުރުން 41 އަހަރުގެ މޮންޓްސޭ ކޯޗެއްގެ ގޮތުގައި ޓީމަކަށް އިރުޝާދު ދޭނެ ފުރަތަމަ ފަހަރެވެ. ކޯޗިން ކެރިއަރު 2018 ވަނަ އަހަރު އޭނާ ފެށީ ވެސް ސްޕެއިންގެ ޤައުމީ އަންހެން ޓީމުގެ އެސިސްޓެންޓް ކޯޗުގެ މަގާމުންނެވެ.
ސްޕެއިން އަށް ނިސްބަތްވާ މޮންޓްސޭ ވަނީ ކުޅުންތެރިޔެއްގެ ގޮތުގައި ސްޕެއިންގެ ޒުވާން ޤައުމީ ޓީމު އަދި ސީނިއާ ޤައުމީ ޓީމަށް ވެސް ކުޅެފަ އެވެ. ކުލަބު ކެރިއަރުގައި އޭނާ ވަނީ ސްޕެއިންގެ ގަދަ އެއް ބާރު، ބާސެލޯނާ އަށް ވެސް ކުޅެފަ އެވެ.
ސްޕެއިންގެ ފުޓުބޯޅަ ފެޑެރޭޝަނުން ބުނީ، މޮންޓްސޭ އެ މަގާމަށް ހަމަޖައްސަން ނިންމީ މުސްތަޤުބަލަށް ވެސް ވިސްނުމަށްފަހު ކަމަށެވެ. ހަމައެއާއެކު، އޭނާގެ އިރުޝާދުގެ ދަށުން ސްޕެއިން އިން ގިނަ ކުރިއެރުންތަކެއް ހޯދާނެ ކަމަށް ވެސް ވަނީ ބުނެފަ އެވެ. ސްޕެއިން އިން މިއަހަރު އޮތް ފީފާ އަންހެން ވޯލްޑް ކާމިޔާބު ކުރިއިރު، މޮންޓްސޭގެ ދައުރު އެ ޓީމުގައި ވަރަށް ބޮޑެވެ.
