އަންނަ އަހަރުގެ ހޫނު މޫސުމުގައި ދާއިމީކޮށް ނިއުކާސަލް ޔުނައިޓެޑަށް ބަދަލުވުމުގެ ކުރިން ލޯނު އެއްބަސްވުމެއްގެ ދަށުން ޗެލްސީގެ ލެވިސް ހޯލް, ނިއުކާސަލްއަށް ސޮއިކޮށްފިއެވެ.

އިންގްލެންޑުގެ 21 އަހަރުން ދަށުގެ ގައުމީ ޓީމުގެ ކުޅުންތެރިޔާ ޗެލްސީގެ ސީނިއާ ޓީމަށް ކުޅެފައިވަނީ މިދިޔަ އަހަރުގެ ނޮވެމްބަރު މަހުއެވެ. ނިއުކާސަލްއާ ދެކޮޅަށް ކުޅުނު މެޗުން، ޗެލްސީ ވަނީ 1-0ން ބަލިވެފައެވެ. މި ސީޒަނަށްފަހު، އޭނާ ދާއިމީކޮށް ނިއުކާސަލްއާ ގުޅޭނީ 28 މިލިއަން ޕައުންޑަށެވެ. އަދި އެޑް-އޮންސްގެ ގޮތުގައި އިތުރު ހަތް މިލިއަން ޕައުންޑް ލިބޭނެއެވެ.

އުމުރުން 18 އަހަރުގެ ކުޅުންތެރިޔާގެ ރަސްމީ ޕޮސިޝަނަކީ ލެފްޓް ބެކެވެ. ނަމަވެސް، ޗެލްސީގައި އޭނާ މެދުތެރެޔަށާއި ކުރިޔަށްވެސް ކުޅެފައިވެއެވެ. އޭނާ ވަނީ މިދިޔަ ސީޒަނުގައި ޗެލްސީއަށް 11 މެޗު ކުޅެދީފައެވެ. މީގެއިތުރުން، ޗެލްސީ އެކަޑަމީގެ މޮޅު ކުޅުންތެރިޔަކަށް މިދިޔަ ސީޒަނުގައި ހޮވުނީވެސް ލެވިސް ހޯލް އެވެ.

ނިއުކާސަލްގެ ކޯޗު އެޑީ ހޯވް ބުނީ، ހޯލްއާއެކު އެއްބަސްވުމަކަށް އާދެމުން ވަރަށް އުފާވާ ކަމަށެވެ. މީގެއިތުރުން ކޯޗު ބުނީ، ހޯލްއަކީ މި ހޫނުމޫސުމުގައި ނިއުކާސަލްއަށް ސޮއިކުރާނެ އެންމެ ފަހު ކުޅުންތެރިޔާ ކަމަށެވެ.

ނިއުކާސަލްއިން ވަނީ މި ހޫނުމޫސުމުގައި ކުޅުންތެރިން ގަތުމަށް ޖުމްލަ 130 މިލިއަން ޕައުންޑް ޚަރަދުކޮށްފައެވެ. އޭގެތެރެއިން އެންމެ ފާހަގަކޮށްލެވެނީ ޓޮނާލީއާއި ހާވީ ބާންސްއެވެ.