ގއ. ނިލަންދޫއަށް ގިނަ ކަންކަން ކޮށްދެއްވާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.

"އުފާވެރި އަމާންރާއްޖެެ" ކެމްޕޭން ޖަލްސާގައި ގއ. ނިލަންދޫ އަށް ވަޑައިގެން "ބަނދަރު ބައްދަލުވުން" ގައި ވާހަކަފުޅުދައްކަވަމުން ރައީސް ވިދާޅުވީ ރާއްޖޭގެ ތަރައްގީއަށްޓަކައި ކުރަންޖެހޭ ބައިވަރު މަަސައްކަތް އެބަހުރި ކަމަށެވެ. ވެރިކަމުގައި ތިބޭބަޔަކަށް ކުރިއަށް ދެވޭނީ ބޭކާރު ސިޔާސީ ހަލަބޮލިކަމެއް ނެތި ކަމަށާއި، ރާއްޖެ މިދަނީ ޑިމޮކްރަސީއަކަށް ފައްކާވަމުން ކަމަށް ރައީސް ވިދާޅުވިއެވެ.

ދެވަނަ ދައުރަކަށް ކުރިމަތިލާއިރު ވިސްނަން ޖެހޭ ކަންކަން އެބަހުރި ކަމަށް ރައީސް ވިދާޅުވިއެެވެ. ޑިމޮކްރަސީގައި އިރުއިރުކޮޅާ ސިޔާސަތު ބަދަލުކުރަން ފުރުސަތު ދޭނަމަ ތަރައްގީއެއް ނުގެނެވޭނެ ކަމަށް ވިދާޅުވިއެވެ. ރައީސް ވިދާޅުވީ ގިނަ މަސައްކަތް ކުރަން ފަށާ ގިނަ މަސައްކަތް ނިމިފައިވާ ކަމަށެވެ. ކޮންމެ 5 އަހަރަކުން ވެރިކަން ބަދަލުވާނަމަ ކަންކަން ހުއްޓިގެންދާނެ ކަމަށާއި، އެކަން ތަޖްރިބާކޮށްފައިވާ ކަމަށް ރައީސް ވިދާޅުވިއެވެ. ރައީސް ވިދާޅުވީ އެމްޑީޕީން 2008 ވަނަ އަހަރު ވެރިކަމަށް އައިސް ފެށި ވަރަށް ރަނގަޅުކަންކަން އޭގެ ފަހުން އައި ވެރިކަމުގައި ހުއްޓި ބަދަލުވެއްޖެ ކަމަށެވެ. ކުރިއަށް އޮތް ދައުރުގައި މިހާރު ފަށާފައިވާ މަސައްކަތްތައް ކުރިއަށް ގެންދެވެނެ ގޮތަކަށް ވިސްނުން ބެހެއްޓުމަކީ މުހިންމުކަމެއް ކަމަށާއި، އެހެންނުވާނަމަ ދައުލަތުން ބޭކާރު އެތައް ހަރަދުތަކެއް ކުރަންޖެހޭ ކަމަށް ރައީސް ވިދާޅުވިއެވެ.

ރައީސް ވިދާޅުވީ ކުރިއަށް އޮތް 5 އަހަރަށް ނުކުމެވަޑައިގެންނެވީ ތަސައްވުރަކާއެކީގައި ކަމަށެވެ. އެއީ އުފާވެރި އަމާން ރާއްޖެ ކޮންމެ ރައްޔިތަކަށް ހޯދައިދެއްވުން ކަމަށް އެމަނިކުފާނު ވިދާޅުވިއެވެ ރައީސް ވިދާޅުވީ ކޮންމެ ރަަށަކަށް ބޭނުންޖެހިފައި ހުރިކަންތައް އެބަހުރިކަމަށާއި، ނިލަންދޫއަށް ވެސް ކުރަންޖެހޭ ކަންކަން އެބަހުރި ކަމަށެވެ.

ރައީސް ވަނީ ކުރިއަށް އޮތް 1 މަސް ތެރޭގައި ބުރަކޮށް މަސައްކަތް ކުރައްވާ ވޯޓުލާ ދުވަހު ނުކުމެ ވަޑައިގެން އުފާވެރި އަމާން ރާއްޖެ ހޯދުމަށް ބައިވެރިވުމަށް އެދިވަޑައިގެންފައެވެ.