Advertisement
ކ. މާލެ
|
8 އޯގަސްޓް 2023 | އަންގާރަ 23:05
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު، ގައްދޫގައި ވާހަކަފުޅުދައްކަވަނީ
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު، ގައްދޫގައި ވާހަކަފުޅުދައްކަވަނީ
އެމްޑީޕީ
ރިޔާސީ އިންތިޚާބު
2023 ތަފާތު، ފެނިގެން މިދަނީ ވެރިކަން ބަދަލުކުރަން ކޯލިޝަން ހެދުމުގެ ބަދަލުގައި ވެރިކަމުގައި ތިބި މީހުންނާއެކު ކޯލިޝަން ހެދިތަން
މި ފެންނަނީ ޑިމޮކްރަސީއަށް ފައްކާވަމުން އަންނަކަން، އެކަމަށްޓަކައި ސިޔާސީ ޕާޓީތަކަށް ޝުކުރުވެސް އަދާކުރަންޖެހޭ -ރައީސް-
2018 ވަނަ އަހަރު ޖަޒީރާ ރާއްޖޭގެ މެނިފެސްޓޯއާއެކު ނުކުމެވަޑައިގަތުމުން، ވާދަވެރި ބޭފުޅުންގެ މެނިފެސްޓޯއަކަށްވީ "ނުވާނޭ"
ކުރިއަށް އޮތް ރިޔާސީ އިންތިޚާބުގައި ރައްޔިތުން ގޮތެއް ނިންމާއިރު، 2 ސަރުކާރުގައި ހުރި ތަފާތުތައް ދެނެގަންނަންޖެހޭ

ރާއްޖޭގައި ބޭއްވުނު ރިޔާސީ އިންތިޚާބުތަކާ މިއަހަރު ބޭއްވޭ ރިޔާސީ އިންތިޚާބު ތަފާތުކަމަށާއި، އެ ތަފާތަކީ ވެރިކަން ބަދަލުކުރަން ކޯލިޝަން ހެދުމުގެ ބަދަލުގައި ވެރިކަމުގައި ތިބި މީހުންނާއެކު ކޯލިޝަން ހަދައި، ރިޔާސީ އިންތިޚާބާ ކުރިމަތިލަމުންދާކަން ކަމަށް، އެމްޑީޕީއާއި ގުޅިފައިވާ ސިޔާސީ ޕާޓީތަކުގެ ކޯލިޝަންގެ ކެންޑިޑޭޓް، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް ވިދާޅުވެއްޖެއެވެ.

Advertisement

"އުފާވެރި އަމާން ރާއްޖެ" ކެމްޕޭން ޖަލްސާގައި، ގދ. ގައްދޫގައި ވާހަކަފުޅުދައްކަވަމުން ރައީސް ސާލިހް ވިދާޅުވީ، 2008 ވަނަ އަހަރުން ފެށިގެން މިހާތަނަށް ބޭއްވުނު އިންތިޚާބުތަކުގައި ޕާޓީތަކުން އަމަލުކުރަމުން އައީ ވެރިޔަކަށް ހުންނަ މީހަކު ބަދަލުކުރުމަށް ކަމަށެވެ. 2008ގައި ވެސް އެކަން ހިނގައިދިޔައީ އެހެން ކަމަށާއި، 2013ގައި ވަކި މީހަކު ގެނަޔަނުދޭން މަސައްކަތްކުރި ކަމަށެވެ. އަދި 2018ގައި ވެސް އެމްޑީޕީން ނުކުތީ އެ ވިސްނުމުގައި ކަމަށެވެ. އެކަމަކު 2023ގައި ތަފާތު ފެނިވަޑައިގަންނަވާ ކަމަށް ރައީސް ވިދާޅުވިއެވެ.

ވެރިކަމުގައި ހުންނަ މީހަކު ބަދަލުކުރަން ބޭނުންވާނަމަ މީގެ ކުރިން ދެން ތިބި އެންމެން އަރަނީ އެއްކޮޅަކަށް. އެންމެން ކިޔަނީ އެކައްޗެއް. އެނޫން ގޮތަކަށް އެކަން ނުކުރެވިދާނެކަމަށް ގަބޫލުކުރެވޭތީ ރިސްކެއް ނަގަން ބޭނުން ނުވާތީ އެންމެން އެއްކޮޅަށް އަރާ، ވެރިކަން ބަދަލުކުރަނީ. އެކަމަކު މި ފަހަރު ތަފާތު. މިފަހަރު ވެރިކަމުގަ ތިބި މީހުން މިތިބީ ކޯލިޝަން ހަދައިގެން. މި އިންތިޚާބަށް ނިކުތް އެއްވެސް ބަޔަކާ އެކީގަ ބައިވެރިވާނެ ބަޔަކު ނުވި. ވަކިވަކިން ނުކުމެ ވަޑައިގެން ތިއްބެވީ. އެހެންނަމަވެސް ފާހަގަކޮށްލެވޭ ކަމަކީ ސީރިއަސް ކަމާއެކީގަ މި އިންތިޚާބަށް ނުކުމެވަޑައިގެން ބޭފުޅުންކޮޅެއް އެބަތިބި. ބޭނުންވަނީ ވެރިކަން. ވެރިކަމުގަ ހުންނަ މީހާ ބަދަލުކުރާކަށް ނޫން. ވާދަކޮށްގެން ވެރިކަމަށް އާދެވޭތޯ. މީގެ ކުރިން 2008ން ފެށިގެން ބޭއްވުނު އިންތިޚާބުތަކާ ތަފާތު އިންތިޚާބެއްގެ ގޮތުގަ ފާހަގަކުރެވެނީ. އެއްގޮތެއްގަ ބަލާނަމަ، އަޅުގަނޑު ދަންނަވާނީ ޑިމޮކްރަސީއަށް ފައްކާވަމުން އަންނަކަން. އެކަމަށްޓަކާ ސިޔާސީ ޕާޓީތަކަށް ޝުކުރުވެސް އަދާކުރަންޖެހޭ.
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް

ރައީސް ވިދާޅުވީ 2008ގައި ވެރިކަމަށް އަންނަން އެމްޑީޕީން ވައުދުތަކެއް ވީކަމަށެވެ. އަދި 2013ގައި ވެސް، 2018ގައި ވެސް ވައުދުތަކާއި މެނިފެސްޓޯއަކާއެކު އައިކަމަށެވެ. މިއަހަރުވެސް މެނިފެސްޓޯއަކާއެކު އައިސް ތިބިކަމަށެވެ.

ރައީސް ވިދާޅުވީ 2018 ވަނަ އަހަރު ޖަޒީރާ ރާއްޖޭގެ މެނިފެސްޓޯއާއެކު ނުކުމެވަޑައިގަތުމުން، ވާދަވެރި ބޭފުޅުންގެ މެނިފެސްޓޯއަކަށްވީ "ނުވާނޭ" ކަމަށެވެ. "ނުވާނޭ"އަކީ ވާދަވެރިންގެ މެނިފެސްޓޯގައި އޮތް ހަމައެކަނި ވާހަކަކަމަށް ރައީސް ވިދާޅުވިއެވެ.

އަޅުގަނޑުމެން ވީ ހުރިހާ ވައުދަކަށް ބުނީ ނުވާނޭ. އަޅުގަނޑު ގަބޫލުކުރާގޮތުގަ ވާދަވެެރިންގެ މެނިފެސްޓޯއަކަށް ވާންވާނީ ނުކުރެވޭނެ ކަމެއް ކަމަށް ދެއްކުން. އެކަމަކު މިއަދު 5 އަހަރު ވެގެންދާއިރު އަޅުގަނޑުމެން މި ތިބީ އެ ވީ ވައުދުތަކުގެ ބޮޑު ބައި ކޮށްދީ ނިންމާފަ. ރާއްޖޭގެ ރަށްރަށުގަ ހުރިހާ ރަށެެއްގަ ފެނާ ނަރުދަމާ ނިޒާމް އަޅާނަމޭ ބުނީމަ އެބޭފުޅުންގެ މެނިފެސްޓޯގަ އޮތީ ނުވާނޭ. އެހެންނަމަވެސް މިއަދު 141 ރަށުގައި 5.7 ބިލިއަން ރުފިޔާ ހޭދަކޮށްގެން މިދަނީ ފެނާ ނަރުދަމާ ނިޒާމް ގާއިމްކުރަމުން. ރަށްރަށުގެ ބަނދަރުތައް ހަދައިދީ، ލަފާފުރުމުގެ ދަތިކަން ހުރި ހުރިހާ ރަށެއްގައި މި މަޝްރޫއު ހިންގައިދޭނަމޭ ބުނީމަ ބުނީ ނުވާނޭ. މިއަދު 125 ރަށެއްގެ ބަނދަރު ހަދައިދީ ނިންމަމުން އަޅުގަނޑުމެން މިދަނީ.
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު

ރައީސް ވިދާޅުވީ ހިލޭ ޑިގްރީ ތައާރަފް ކުރައްވާނަމޭ ވިދާޅުވުމުން، ވާދަވެރިން ބުނީ ނުވާނޭ ކަމަށެވެ. ނަމަވެސް މިއަދު 18،000 ދަރިވަރުންނަށް އެ ފުރުސަތު ދެވިއްޖެކަމަށާއި، 7000 ދަރިވަރުން ޑިގްރީ ހާސިލްކޮށްގެން ނުކުމެއްޖެ ކަމަށެވެ. ހަމައެކަނި ގައްދޫއަށް ބަލާއިރު 146 ދަރިވަރުން ހިލޭ ޑިގްރީ ޕްރޮގްރާމުގައި ބައިވެރިވެ ކުރިއަށްދިޔަ ކަމަށާއި، އޭގެ ތެރެއިން 76 ދަރިވަރަކު ކިޔަވައި ނިމިއްޖެކަމަށެވެ. މުޅި އަތޮޅަށް ބަލާއިރު 1252 ފުރުސަތުގެ ބޭނުން ދަރިވަރުން ހިފަމުންދާއިރު، އޭގެ ތެރެއިން 600 އެއްހާ ދަރިވަރުން ޕްރޮގްރާމް ނިންމާ މަސައްކަތުގެ ތެރެއަށް ނުކުމެއްޖެކަމަށް ރައީސް ވިދާޅުވިއެވެ.

ރައީސް ވިދާޅުވީ ކުރިއަށް އޮތް ރިޔާސީ އިންތިޚާބުގައި ރައްޔިތުން ގޮތެއް ނިންމާއިރު، 2 ސަރުކާރުގައި ހުރި ތަފާތުތައް ދެނެގަންނަންޖެހޭ ކަމަށެވެ. ރައީސް ވަނީ ސެޕްޓެމްބަރު 9 ވަނަ ދުވަހު އޮންނަ ރިޔާސީ އިންތިޚާބުގައި ރައްޔިތުން ވިސްނާ ވަޑައިގެން ވޯޓުދެއްވުމަށް އެދިވަޑައިގަންނަވާފައެވެ.

Advertisement

Advertisement
- ކޮމެންޓް