އަންނަ މަހު ބާއްވާ ރިޔާސީ އިންތިޚާބުގައި އެމްޑީޕީގެ ކެންޑިޑޭޓު އަދި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ރަނިންމޭޓެއްގެ ގޮތުގައި، ރައްޔިތުންގެ މަޖިލީހުގެ އައްޑޫ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ހަމަޖައްސަވައިފިއެވެ.
މިކަން އިތުބާރުހުރި މަސްދަރަކުން "ރާއްޖެޓީވީ"އަށް ވަނީ ކަށަވަރުކޮށްދީފައެވެ. ރަނިންމޭޓަކަށް އަސްލަމް ހަމަޖެއްސެވުމަށް ކުށުގެ ރެކޯޑު ސާފު ކުރުމަށްވެސް މިހާރު ވަނީ ހުށަހަޅުއްވާފައެވެ.
އަސްލަމަކީ އެމްޑީޕީގެ ޕާލަމެންޓްރީ ގްރޫޕުގެ އަދި މަޖިލީހުގެ މެޖޯރިޓީ ލީޑަރެވެ. އޭނާއަކީ އެމްޑީޕީއާއެކު ފެށުނީއްސުރެ މަސައްކަތް ކުރައްވަމުންގެންދަވާ ބޭފުޅެކެވެ. އަސްލަމް ވަނީ ރައީސާއެކު މަޖިލީހުގައިވެސް ގިނަ ދުވަސްތަކެއް ވަންދެން މަސައްކަތް ކުރައްވާފައެވެ.
ރައީސް ސާލިހު ނޫސްވެެރިންނަށް މައުލޫމާތު ދެއްވަމުން މީގެ ކުރިން ވިދާޅުވީ ރަނިންމޭޓު ކަނޑައަޅާނީ ވަރަށް ބޮޑަށް ވިސްނެވުމަށްފަހު ކަމަށެވެ. އަދި އެ ނިންމެވުމުގައި ޕާޓީގެ އިސް ބޭފުޅުންގެ ޚިޔާލު ހޯއްދަވާނެ ކަމަށްވެސް ވިދާޅުވިއެވެ.
މިއަހަރުގެ ރިޔާސީ އިންތިޚާބު އަންނަ މަހުގެ 9 ވަނަ ދުވަހު ބާއްވާނެއެވެ. މި އިންތިޚާބުގައި ވާދަކުރަން ބޭނުންވާ ފަރާތްތަކަށް ކުރިމަތިލާން ހުޅުވާލި މުއްދަތު އަންނަ ހޯމަ ދުވަހަށް ހަމަވާނެއެވެ. މިހާތަނަށް ވާދަކުރާނެކަން އިއުލާންކޮށްފައިވަނީ އެމްޑީޕީއާއި ޖުމްހޫރީ ޕާޓީއާއި އެމްއެންޕީއާއި ޕީޕީއެމާއި ދަ ޑިމޮކްރެޓްސް އަދި އެމްއާރުއެމުންނެވެ. ނަމަވެސް މިހާތަނަށް ފޯމު ހުށަހެޅުއްވީ ޕީޕީއެމްގެ ކެންޑިޑޭޓު އަދި ކުރީގެ ރައީސް އަބްދުﷲ ޔާމީނެވެ. އެމަނިކުފާނުގެ ކެންޑިޑެންސީ ގަބޫލު ނުކުރުމަށް އީސީން ނިންމާފައިވާއިރު، އެ މައްސަލަ މިހާރު ވަނީ ސުޕްރީމްކޯޓަށް ހުށަހަޅާފައެވެ.
