ރ. ފުއްގިރި ކުއްޔަށް ދޫކުރުމުގެ މުއާމަލާތުގެ ތެރެއިން, މަގާމުގެ ނުފޫޒު ބޭނުންކޮށްގެން ރިޝްވަތު ނެގި މައްސަލައިގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ބުރާސްފަތި ދުވަހުގެ އަޑުއެހުމުގައި ވަނީ ލަންކާގައި ހުންނަ ރާއްޖޭގެ ހައިކޮމިޝަން މެދުވެރިކޮށް ލަންކާ ރައްޔިތެއްކަމަށްވާ ސިރިތާ ކުމާރުގެ ހެކިބަސް ނެގުން ކުރިއަށް ގެންގޮސްފައެވެ.
އޭނާއަކީ އޭރު ސަން ކުންފުނީގައި ޑިރެކްޓަރ އޮފް ފައިނޭންސްގެ މަޤާމު ފުރަމުންދިޔަ ފަރާތެވެ.
ހެކިވެރިޔާ ބުނީ، ކުންފުނީގެ މާލީ މުއާމަލާތްތަކާ ގުޅޭ ކަންކަން އޭރު ބަލަހައްޓަމުން ގެންދިޔައީ އޭނާ ކަމަށެވެ.
އޭނާ ބުނީ، ކުރީގެ ރައީސް އަބްދުﷲ ޔާމީނު ޑޮލަރު މާރު ކުރެއްވުމަށް ބޭނުންވާކަމަށް މީދޫ ދާއިރާގެ މެންބަރު އަހުމަދު ސިޔާމް ގުޅުއްވާފައި އޭނާ ގާތުގައި ވިދާޅުވި ކަމަށެވެ.
އަދި އެކަން ހަމަޖެއްސުމަށް ސަން ކުންފުނީގެ ޑިރެކްޓަރ އޮފް ޕަރޗޭސިންގ، ކެނދިކުޅުދޫ ދާއިރާގެ ކުރީގެ މެންބަރު އަލީ މައުރޫފާއެކު މީހަކު ފޮނުއްވާނެކަމަށް ސިޔާމް އޭނާ ގާތުގައި ވިދާޅުވިކަމަށް އޭނާ ހެކިބަސް ދެމުން ބުންޏެވެ.
މައުރޫފާއެކު އައީ ކްރިކް ރިޒާ ކަމަށާއި، ޗެކްގައި އޮތީ ކްރިކް ރިޒާގެ ނަންކަމަށްވެސް ހެކިވެރިޔާ ބުންޏެވެ. އެ ޗެކަކީ ޔާމީނަށް ދޭ ޗެކެއްކަމަށް އޭނާ ގާތުގައި މައުރޫފު ވިދާޅުވިކަމަށްވެސް ހެކިވެރިޔާ ބުންޏެވެ.
އެއީ މިލިއަނަށްވުރެ ގިނަ ޑޮލަރުގެ ޗެކެއް ކަމަށާއި، ސްޓޭޓް ބޭންކް އޮފް އިންޑިއާ މެދުވެރިކޮށް ޗެކް ޖަމާކުރީ ސަން ކޮންސްޓްރަކްޝަންގެ ޑޮލަރު އެކައުންޓަށް ކަމަށް ވެސް އޭނާ ބުންޏެވެ.
އެއަށްފަހު ސަން ކޮންސްޓްރަކްޝަންގެ އެކައުންޓުން ސަން އިންވެސްޓްމަންޓުގެ އެކައުންޓަށް އެ ފައިސާ ފޮނުވި ކަމަށާއި، އެކަން އެހެން ކުރީ ސަން ކޮންސްޓްރަކްޝަންގެ އެކައުންޓަށް އެކްސްޖޭންޖް ލައިސެންސް ނެތުމުންކަމަށް އޭނާ ބުންޏެވެ.
ޔާމީނަށް ދޭ ޗެކަށްވާ ރުފިޔާ ޔާމީނުގެ ފަރާތުން ނަގުދު ފައިސާއިން އެއްކޮށް ލިބުނުކަމަށް ކްރިކް ރިޒާ ރަސީދެއްގައި ސޮއި ކުރެއްވި ކަމަށް ހެކިވެރިޔާ ބުންޏެވެ. އެ ފައިސާ ދެއްވީ ޔާމީނުކަމަށް މައުރޫފު ވަނީ ހެކިވެރިޔާ ގާތުގައި ވިދާޅުވެފައެވެ.
ވުމާއެކު، ސަން އިންވެސްޓްމަންޓަށް ޔާމީނުގެ ފަރާތުން ފައިސާ ލިބުނުކަމަށްވެސް ރަސީދު ތައްޔާރުކޮށް ސޮއި ކުރުވާފައިވާނެކަމަށް ހެކިވެރިޔާ ބުންޏެވެ.
މި އަޑުއެހުމުގައި ކަނެކްޝަންގެ މައްސަލަ ތަކުރާރުކޮށް ދިމާވާތީ އެކަމުގެ ކަންބޮޑުވުން ދޭތެރެ ދޭތެރެއިން ދިފާއުންވެސް ފާޅުކޮށްފައިވެއެވެ. ޝަރީއަތުންވެސް ވަނީ އެކަން ފާހަގަކޮށްފައެވެ.
ވުމާއެކު، އެގޮތަށް ހެކިބަސް ކުރިއަށް ގެންދަން ޝަރީއަތަށްވެސް ދަތިކަން ފާހަގަ ކުރައްވައި ގާޒީ ވަނީ އެ ހެކިވެރިޔާ ޝަރީއަތުގެ މަޖިލީހަށް ހާޒިރު ކުރެވޭނެތޯ ސުވާލު ކުރައްވާފައެވެ.
ދައުލަތުން ވަނީ އާދިއްތަ ދުވަހު އޭނާ ހާޒިރު ކުރުމަށް މަސައްކަތް ކުރައްވާނެކަމަށް ވިދާޅުވެފައެވެ. ވުމާއެކު، މި އަޑުއެހުން ވަނީ ކުރުކޮށްލާފައެވެ.
ދައުލަތުން ބުނެފައިވަނީ ޓޫރިޒަމް މިނިސްޓްރީއާއި އެމްއެމްޕީއާރުސީ މެދުވެރިކޮށް، ޓޫރިސްޓް ރިސޯޓެއްގެ ގޮތުގައި ތަރައްގީކުރުމަށް ރ. ފުއްގިރި ކުށްޔަށް ދޫކުރުމުގެ މުއާމަލާތާ ގުޅިގެން، ރައީސް ޔާމީން، މަގާމުގެ ނުފޫޒު ބޭނުންކޮށްގެން، ކ. މާލެ، މއ. ކުރިކީލަހިޔާ، އަޙުމަދު ކްރިކް ރިޒާ، މެދުވެރިކޮށް ރިޝްވަތުގެ ގޮތުގައި، 1،117،000 (އެއް މިލިއަން އެއް ލައްކަ ސަތާރަ ހާސް) ޑޮލަރު ހޯދައި، ސަން ކޮންސްޓްރަކްޝަން އެންޑް އިންޖިނިއަރިންގ ޕްރައިވެޓް ލިމިޓެޑާއި، ސަން އިންވެސްޓްމަންޓް ޕްރައިވެޓް ލިމިޓެޑް ބޭނުންކޮށްގެން އެ ފައިސާ މަނީ ލޯންޑަރ ކުރުމަށްޓަކައި ފަށަލަކޮށްފައިވާ ކަމަށެވެ.
ކުރިކް ރިޒާއާއި ސަން އިންވެސްޓްމަންޓް ކުންފުނީގެ ދެމެދުގައި ހިންގާފައިވާ މުއާމަލާތަކީ ޑޮލަރު މާރުކުރުމުގެ ނަމުގައި ހިންގާފައިވާ މުއާމަލާތެއްކަމަށް ދައްކަން މަސައްކަތްކޮށްފައިވާ ކަމަށްވެސް ދައުލަތުން ބުނެފައިވެއެވެ.
