ތިން ރަށެއްގައި ތަރައްގީ ކުރުމަށް ހަމަޖެހިފައިވާ އެއަރޕޯޓު ހެދުމަށް ބިން ހިއްކަން ބަޔަކާ ހަވާލުކޮށްފިއެވެ.

މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގައި ބުދަ ދުވަހު ބޭއްވި ރަސްމިއްޔާތެއްގައި ށ. ބިލެތްފަހިއާއި ބ. ތުޅާދޫ އާއި ތ. ވިލުފުށީގެ އެއަރޕޯޓަށް ބޭނުންވާ ބިން ހިއްކަން ހަވާލުކޮށްފައިވަނީ ކެޕިޓަލް މެރިން އެންޑް ސިވިލް ކޮންސްޓްރަކްޝަންސް ޕްރައިވެޓް ލިމިޓެޑާއެވެ. މި އެއްބަސްވުމުގައި ޕްލޭނިންގ މިނިސްޓްރީގެ ފަރާތުން ސޮއި ކުރެއްވީ އެ މިނިސްޓްރީގެ ޑިރެކްޓަރ ޖެނެރަލް ފާތިމަތު ޝާނާ ފާރޫގެވެ. އަދި ކެޕްިޓަލް މެރިން އެންޑް ސިވިލް ކޮންސްޓްރަކްޝަންގެ ފަރާތުން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު ސިވަރާޖާ މަނިވައްނަން އެވެ.

މި މަޝްރޫއުގެ ދަށުން ތުޅާދޫ އެއަރޕޯޓު ހެދުމަށް 44.70 ހެކްޓަރުގެ ބިން ހިއްކުމަށް ހަވާލުކޮށްފައިވާއިރު ވިލުފުށި އެއަރޕޯޓު ހެދުމަށް 56.34 ހެކްޓަރު އަދި ބިލެތްފަހި އެއަރޕޯޓު ހެދުމަށް 56.34 ހެކްޓަރުގެ ބިން ހިއްކުމަށް ވަނީ ހަވާލުކޮށްފައެވެ. މި މަސައްކަތްތައް ހަވާލުކޮށްފައިވަނީ 280 ދުވަހުގެ ތެރޭގައި ނިންމާ ގޮތަށެވެ.

ޕްލޭނިންގ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ މި މަސައްކަތްތަކީ ކްރޮސް ސަބްސިޑީގެ ދަށުން ކުރިއަށްގެންދާ މަސައްކަތްތަކެއް ކަމަށެވެ. އަދި ތުޅާދޫ އެއަރޕޯޓުގެ އަމަލީ މަސައްކަތް އަންނަ އޮގަސްޓް މަހުގެ ކުރީ ކޮޅު ފެށޭނެ ކަމަށް ލަފާ ކުރެވޭއިރު ވިލުފުއްޓާއި ބިލެތްފަހި އެއަރޕޯޓުގެ މަސައްކަތް ވެސް އެހާތަނުގައި ފެށޭވަރުވާނެ ކަމަށް ލަފާ ކުރެވޭ ކަމަށް އޭނާ ވިދާޅުވިއެވެ.

ހޯމަ ދުވަހު ބޭއްވި ރަސްމިއްޔާތުގައި ތުޅާދޫ ދާއިރާގެ މަޖިލިސް މެމްބަަރު ހިސާން ހުސައިން އާއި ކަނޑިތީމު ދާއިރާގެ މެންބަރު ޢަބްދުﷲ ޝަހީމް ޢަބްދުލްޙަކީމް އާއި އެމްޑީޕީގެ ވިލުފުށި ދާއިރާގެ ރައީސް އިސްމާއިލް ރަޝީދު ގާސިމް ބައިވެވަޑައިގެންނެވިއެވެ. ތިން ބޭފުޅުން ވެސް ވަނީ މިއީ އެ ދާއިރާ އަދި ރަށްތަކުގެ ރައްޔިތުން އިންތިޒާރު ކުރަމުން އައި ކަމެއްކަން ފާހަގަކޮށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ޝުކުރު އަދާ ކުރައްވާފައެވެ.

ކަނޑިތީމު ދާއިރާގެ މެންބަރު ޝަހީމް ވިދާޅުވީ މިއީ އެ ދާއިރާ އަދި ބިލެތްފަހީގެ ރައްޔިތުންނަށް ލިބިގެންދާނެ ވަރަށް ބޮޑު ހިތްހަމަޖެހުމެއް ކަމަށެވެ. އަދި ދަތުރުފަތުރުގެ ނިޒާމަކުން ރާއްޖެ ގުޅާލުމަށް ރައީސް ވެވަޑައިގެންވާ ވައުދު ފުއްދިގެން ދިއުމުން މުޅި ރާއްޖެއަށްވެސް އޭގެ ފައިދާ ވާނެ ކަމަށާއި އެއަރޕޯޓުތަކުގެ ބިން ހިއްކުން ހަވާލުކުރެވިގެންދާއިރު އެއިން އެނގިގެންދަނީ ރައީސް ވައުދެއް ވެވަޑައިގެންފިނަމަ އެ ވައުުފުޅެއް ފުއްދަވާނެކަމުގެ ޔަގީންކަން ކަމަށް އޭނާ ވިދާޅުވިއެވެ.

ޕްލޭނިން މިނިސްޓްރީން ތުޅާދުއާއި ވިލުފުއްޓާއި ބިލެތްފަހީ އެއަރޕޯޓުގެ ބިން ހިއްކުމަށް ކެޕިޓަލް މެރިން އެންޑް ސިވިލް ކޮންސްޓްރަކްޝަނާ ހަވާލުކޮށްފައިވަނީ 42،450،783.48 ޑޮލަރު ނުވަތަ ގާތްގަނޑަކަށް 654.6 މިލިއަން ދިވެހި ރުފިޔާއަށެވެ.