މިއީ ކޮމިޓީތަކުގެ މަސައްކަތްތައް ހުއްޓިފައި އޮންނަންޖެހޭ ހާލަތެއް ނޫންކަމަށް އެމްޑީޕީ ޕީޖީ ގްރޫޕްގެ ލީޑަރު މުހައްމަދު އަސްލަމް ވިދާޅުވެއްޖެއެވެ.
އަސްލަމް މިހެން ވިދާޅުވީ އާދީއްތަ ދުވަހުގެރޭ ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުންނެވެ.
ރައްޔިތުންގެ މަޖިލީހުގެ ބައެއް ކޮމިޓީތަކުގެ މަސައްކަތްތަކަށް ހުއްޓުމެއް އައިސްފައިވާތީ މިކަމާ ގުޅިގެން އަސްލަމް ވިދާޅުވީ މަޖިލީހުގެ އެއްވެސް ކޮމިޓީއެއް ހުއްޓެންޖެހޭނެކަމަށް ގަބޫލުނުކުރައްވާ ކަމަށެވެ.
އަސްލަމް ވިދާޅުވީ ކޮމިޓީއެއްގެ މަސައްކަތް ހުއްޓެންޖެހޭނީ އެންމެ ހާލަތެއްގައި ކަމަށެވެ. އެއީ އައު ދައުރަކަށް މަޖިލީހުގެ މަސައްކަތްތައް ފަށައި، ކޮމިޓީތަކަށް މެމްބަރުން އައްޔަންކުރުމަށް އެ ދާ 14 ދުވަސް ކަމަށް އަސްލަމް ވިދާޅުވިއެވެ. ކޮމިޓީތައް އަލުން އެކުަލވާލެވެންދެން މިހާރު އެ އޮތް ގޮތަށް ކުރިއަށްގެންދަންޖެހޭ ކަމަށެވެ.
އާންމު ކޮމިޓީގެ މަސައްކަތް ކުރިއަށްނުދާނަމަ މަޖިލީހަށް އަންނަ ބިލަކަށް ވަގުތު ކަނޑައެއްނޭޅޭ. ކޮމިޓީތައް މިހާރުވެސް ހިނގަންވާނެ.މްޑީޕީ ޕީޖީ ގްރޫޕްގެ ލީޑަރު މުހައްމަދު އަސްލަމް
ކޮމިޓީގެ މަސައްކަތް ކުރިއަށްނުދާކަމަށްބުނެ ރައްޔިތުންގެ މަޖިލީހުގެ ނާއިބުރައީސް އީވާ އަބްދުﷲގެ އިތުބާރު ނެތްކަމުގެ މައްސަލައާއި، ފޮރިން މިނިސްޓަރު އަބްދުﷲ ޝާހިދުގެ އިތުބާރު ނެތްކަމުގެ މައްސަލަ އެޖެންޑާކޮށްފައެއްނުވެއެވެ. އެހެންނަމަވެސް މަޖިލީހުގެ ގަވާއިދު ބުނާގޮތުން އީވާގެ އިތުބާރު ނެތްކަމުގެ މައްސަލަ ހޯމަ ދުވަހުގެ ޖަލްސާއަށް އެޖެންޑާ ކުރަންޖެހޭނެކަމަށް އަސްލަމް މީގެ ކުރިން ވިދާޅުވެފައިވެއެވެ.
