ސެންޓްރަލް އޭޝިއަން ވޮލީބޯޅަ އެސޯސިއޭޝަން (ކާވާ) ޗެލެންޖް ކަޕްގެ ފުރަތަމަ މެޗުގައި ކަޒަކިސްތާނާ ދެކޮޅަށް ކުޅުނު މެޗުގައި ރާއްޖޭގެ ކުޅުންތެރިންގެ ފަރާތުން ރަނގަޅު ކުޅުމެއް ފެނުނު ކަމަށާއި، ނަމަވެސް ކުޅުން ގޯސްވީ ޓީމުގެ ޑިފެންސް ދަށްވުމުން ކަމަށް ޤައުމީ އަންހެން ޓީމުގެ ކޯޗު ވިޗީޕޮން ފޯންޗާޓްޔިންޗީޕް ބުނެފި އެވެ.

ކަޒަކިސްތާނާ ދެކޮޅަށް ކުޅުނު މެޗު ރާއްޖެ އިން ރަނގަޅަށް ފެށި ނަމަވެސް، އަމިއްލަ ގޯސްތަކެއް ހެދި މެޗުގެ ކޮންޓްރޯލް ގެއްލުނެވެ. އެ މެޗަށްފަހު ވާހަކަ ދައްކަމުން ކޯޗު ބުނީ ފުރަތަމަ ސެޓުގެ ކުޅުން ދިޔައީ ރަނގަޅަށް ކަމަށެވެ. އަދި ރާއްޖެ އިން ފެށީ ވެސް ވަރަށް ރަނގަޅަށް ކަމަށާއި، ރަނގަޅަށް އެޓޭކުކޮށް، އިދިކޮޅު ޓީމުގެ އެޓޭކުތައް ބްލޮކް ވެސް ކުރި ކަމަށެވެ. ނަމަވެސް މެޗުގެ މެދާ ހަމައިން ވަރަށް ފަސޭހަ ތިން ބޯޅައެއް ދޫކޮށްލެވުނު ކަމަށާއި، ފުރަތަމަ ސެޓު ގެއްލުނީ އެ ހިސާބުން ކަމަށް ކޯޗު ބުންޏެވެ. އެކަން ފާހަގަކޮށް ކޯޗު ބުނީ ވަކި ހިސާބަކުން ކުޅުންތެރިންނަށް ބޯޅަ އަށް މަސައްކަތް ކުރުމަށް ވެސް އުނދަގޫވެފައި ތިބި ކަމަށެވެ. އެހެންކަމުން ކަޒަކިސްތާނުން އެކަމުގެ ފައިދާ ވަރަށް ބޮޑަށް ނެގި ކަމަށް ވެސް ކޯޗު ބުންޏެވެ.

މެޗުގެ ދެ ވަނަ ސެޓުގެ ވަކި ހިސާބަކުން ރާއްޖޭގެ އައިޝަތު މާޖިދާ އަށް އަނިޔާވެ ވަނީ ބަދަލު ކުރަން ޖެހިފަ އެވެ. ކޯޗު ބުނީ އެއާއެކު ދެން އަރުވަން ޖެހުނު ކުޅުންތެރިންނަކީ މި ފެންވަރުގައި ކުޅެން އެހާ ގިނަ ތަޖުރިބާ ލިބިފައި ނެތް ކުޅުންތެރިން ކަމަށާއި، އޭނާ ޤަބޫލު ކުރާ ގޮތުގައި ގިނަ މެޗުތަކެއް ކުޅޭ ވަރަކަށް އެކަންކަން ރަނގަޅު ވެގެންދާނެ ކަމަށެވެ. އަދި މެޗުގެ ފުރަތަމަ ސެޓުގެ ކުޅުން ރަނގަޅު ކަމަށް ބުނެވިދާނެ ކަމަށާއި، އެހެން ނަމަވެސް ދެ ވަނަ ސެޓާއި ތިން ވަނަ ސެޓުގެ ކުޅުން ރަނގަޅު ނޫން ކަމަށެވެ. ފުރަތަމަ މެޗުގައި ޓީމުގެ ފަރާތުން އެކަށީގެންވާ ވަރުގެ ކުޅުމެއް ނުދެއްކި މެޗުން ބަލިވުމުން ކޯޗު ވަނީ މައާފަށް ވެސް އެދިފަ އެވެ. ކޯޗު ބުނީ ކުރިއަށް އޮތް މެޗުގައި އެކަންކަން ރަނގަޅު ކުރުމަށް މަސައްކަތް ކުރާނެ ކަމަށެވެ.

އިތުރަށް ވާހަކަ ދައްކަމުން ކޯޗު ބުނީ ކުޅުންތެރިންގެ ފަރާތުން ފެނުނު މަސައްކަތް ރަނގަޅު ކަމަށެވެ. އެހެން ނަމަވެސް މެޗު މެނޭޖުކުރަން ދަސްކުރަން ޖެހޭ ކަމަށެވެ. އެކަމުގެ ތެރެއިން ކަޒަކިސްތާނުން މެޗުގެ ކޮންޓްރޯލް ނެގުމުން ރާއްޖެ އަށް ގޯސްތަކެއް ހެދެމުން ދިޔަކަމަށް ކޯޗު ބުންޏެވެ.

މުބާރާތުގެ ގްރޫޕް ސްޓޭޖުގައި ރާއްޖޭގެ ދެ ވަނަ މެޗުގައި އަންގާރަ ދުވަހު ނުކުންނާނީ އުޒްބަކިސްތާނާ ދެކޮޅަށެވެ. އުޒްބަކިސްތާނު ވަނީ ގްރޫޕް ސްޓޭޖުގައި ކުޅުނު ފުރަތަމަ މެޗުގައި ސްރީލަންކާގެ މައްޗަށް ސީދާ ތިން ސެޓުން ކުރި ހޯދައިފަ އެވެ. މުބާރާތުގައި ދެމި އޮތުމަށް ރާއްޖެ އަށް އުޒްބަކިސްތާނު އަތުން މޮޅުވުން މުހިންމެވެ. ރާއްޖެއިން އުޒްބަކިސްތާނާ ދެކޮޅަށް ނުކުންނާނީ އަންގާރަ ދުވަހުގެ ހަވީރު ރާއްޖެ ގަޑިން 17:45 ގައެވެ.