ހުޅުމާލޭގައި ތަރައްގީ ކުރަމުން އަންނަ ކޭ ޕާކް ފްލެޓުތަކުގެ މައްސަލައިގައި އެ މަޝްރޫއު ހިންގާ ކުންފުނި ހަންބޯ މޯލްޑިވްސްގެ މައި ހިއްސާދާރު އުޅެނީ ފައިސާ ހިފައިގެން ފިލަން ކަމަށް އެ ކުންފުނީގެ ދިވެހި ހިއްސާދާރު ކަމަށްވާ ހަސަން މަމްދޫހު (މަންޑޭ) ތުހުމަތު ކޮށްފިއެވެ.

ހަންބޯ މޯލްޑިވްސްގެ ނަމުގައި ހަދާފައިވާ ފޯޖު ލިޔުންތަކެއް ބޭނުން ކޮށްގެން މަކަރާއި ހީލަތުން އެޕާޓްމަންޓުތައް ވިއްކައި ފައިސާ އަށް ހިޔާނާތްތެރިވި ކަމަށް ތުހުމަތުކުރާ މައްސަލައެއް ފުލުހުން އަންނަނީ ތަހުގީގު ކުރަމުންނެވެ. މި މައްސަލައިގައި މަންޑޭއަށް ވައްކަމުގެ ތުހުމަތުކޮށް ޖިނާއީ ތަހުގީގު ކުރުމަށް އެ ހަންބޯ މޯލްޑިވްސްގެ މައި ހިއްސާދާރު ވަނީ މައްސަލަ ހުށަހަޅައިފައެވެ.

މި ތުހުމަތުތަކަށް ރައްދުދީ އަންގާރަ ދުވަހު މަންޑޭ ނެރުނު ބަޔާނެއްގައި ބުނީ ކޭ ޕާކު ޕްރޮޖެކްޓުގެ ވެރިފަރާތުގެ ހައިސިއްޔަތުން ހަންބޯ ކޮރެއާއަށް ލިބިފައިވާ ބާރުތަކުގެ ތެރެއިން ބައެއް ކަންކަން ކުރުމުގެ ބާރު އެ ކުންފުނީގެ ރާއްޖޭގެ އެޖެންޓް، ހަންބޯ މޯލްޑިވްސްއަށް ލިބިފައިވާ ކަމަށާއި އެބާރަކީ ހަންބޯ ކޮރެއާގެ ބޯޑުގެ ރެޒޮލިއުޝަނަކުން އަނބުރާ ގެންދެވޭ ގޮތަށް ދީފައިވާ ބާރެއް ކަމަށެވެ. އަދި ދީފައިވާ ބާރުތަކުގެ ތެރޭގައި ޕްރޮޖެކްޓުގެ ދަށުން ވިއްކާ އެޕާޓްމެންޓުތަކުން ލިބޭ ފައިސާ ބަލައިގަތުމުގެ ބާރު ދީފައިވީނަމަވެސް، އެ ފައިސާއަކީ ހަންބޯ ކޮރެއާގެ ފައިސާކަމާއި އެ ފައިސާއަކީ އެއްވެސް ހާލަތެއްގައި ރާއްޖޭގެ ލޯކަލް އެޖެންޓުގެ ފައިސާއެއް ނޫން ކަމަށާއި ޖިން ޝީ ހޫ ނުވަތަ ލޯކަލް އެޖެންޓަށް ލިބޭނީ ހަންބޯ ކޮރެއާ އާއެކުވެފައިވާ އެއްބަސްވުމުގެ ދަށުން ކުރަންޖެހޭ ނުވަތަ ކޮށްފައިވާ މަސައްކަތުގެ އަގަށް ލިބެންޖެހޭ ފައިސާ އެކަނި ކަމަށް ފާހަގަކޮށްފައިވާ ކަމަށް އޭނާ ބުންޏެވެ.

މަންޑޭ ބުނީ ހަންބޯ މޯލްޑިވްސްގެ ހިއްސާދާރުންގެ މެދުގައި މައްސަލަޖެހިފައިވާ ކަމަށް ބަޔާންކުރާ މައްސަލައަކީ، ހަގީގަތުގައި 95 ހިއްސާދާރު، ޗައިނާގެ ރައްޔިތެއް ކަމަށްވާ، ޖިން ޝީ ހޫ އެ އޮފީހުގައި ބައިތިއްބާފައި ތިބި އޭނާގެ އެކައުންޓެންޓުންނާ ގުޅިގެން ޕްރޮޖެކްޓުގެ އެޕާޓްމެންޓުތައް ވިއްކުމުން ލިބޭ ފައިސާ ނެގުމަށްފަހު، ރާއްޖެއިން ފިލުމަށް ކުރަމުން ދިޔަ މަސައްކަތަށް އެއްބަސްނުވުމުން ދިމާވެފައިވާ މައްސަލައެއް ކަމަށެވެ. އަދި ޝީ ޖިން ހޫ ގެ 95 ހިއްސާގެ ތެރެއިން އެއް އިންސައްތަ ހިއްސާ ކޭ ޕާކުގެ ސައިޓުގައި މަސައްކަތްކުރާ ޗައިނާގެ ރައްޔިތެއް ކަމަށްވާ ވޫ ޒީއަށް ޓްރާންސްފާކޮށްފައިވާ ކަމަށާއި ބިއްލޫރި މަސައްކަތްތަކެއް ކުރުމަށް ޖިން ޝީ ހޫގެ ފަރާތުން ނެގި ދިވެހި ކޮންޓްރެކްޓަރެއް ކުންފުނީގެ ބޯޑަށް ނެގުމަށް ވެސް ޖިން ޝި ހޫ ބޭނުންވި ކަމަށް އޭނާ ބުންޏެވެ.

މި ލިޔެކިޔުންތަކުގައި ސޮއި ކުރުމަށް އިންކާރު ކުރުމުން އަބުރު ކަތިލައި އޭނާ ކުންފުނިން ބޭރުކޮށްލަން މަސައްކަތް ކުރާ ކަމަށާއި އެކަން ކުރުމަށްފަހު ލާރި ހިފައިގެން ފިލުމަކީ ޝީން ޖިން ހޫގެ ނުބައި ރޭވުމެއް ކަމަށް ވެސް މަންޑޭ ވަނީ ތުހުމަތުކޮށްފައެވެ.

ކޭ ޕާކް މައްސަލައިގައި މިހާރު ހިނގަމުންދާ މައްސަލައަށް އޭނާގެ ފަރާތުން ފުރިހަމަ އެއްބާރުލުން ލިބޭނެ ކަމަށާއި މިހާރުވެސް މަސައްކަތް ކުރަމުން ދަނީ ކޭ ޕާކުން އެޕާޓްމެންޓްތައް ގަނެފައިވާ ފަރާތްތަކުގެ ހައްގުތައް ހިމާޔަތް ކުރަން ކަމަށް ވެސް މަންޑޭ ބުންޏެވެ. އަދި ކޭ ޕާކް ރެޒިޑެންސް ތަރައްގީކޮށްފައި ވަނީ ޖިން ޝީ ހޫ އަދި އޭނާގެ ހަންބޯ ކޮރެއާ ކުންފުނިން ނޫން ކަމަށާއި އެތަން ތަރައްގީކުރުމަށް ހަރަދުކޮށްފައިވަނީ އެޕާޓުމެންޓް ވިއްކައިގެން ލިބުނު ފައިސާއިން ކަމަށް ވެސް އޭނާ ބުންޏެވެ. އެހެންކަމުން ކޭ ޕާކް ރެޒިޑެންސްއަށް ޖިން ޝީ ހޫ ނުވަތަ އޭނާގެ އެއްވެސް ކުންފުންޏެއްގެ މައްޗަށް އެއްވެސް ގާނޫނީ ބާރެއް ނޯންނާނެ ކަމަށް ވެސް މަންޑޭ ބުންނެވެ.

މަންޑޭއާ ދެކޮޅަށް ހަންބޯ މޯލްޑިވްސްގެ މައި ހިއްސާދާރު މައްސަލަ ހުށަހަޅާފައިވާއިރު ކޭ ޕާކުން އެޕާޓްމަންޓު ގަތް މީހުންގެ ތެރެއިން ޝަކުވާ ހުށަހަޅަން ބޭނުންވާ ފަރާތްތަކަށް ފުލުހުން ވަނީ އެ ފުރުސަތު ވެސް މިހާރު ހުޅުވާލައިފައެވެ.