21 އޭޕްރީލް ވަނަ ދުވަހުގެރޭ އަމީރު އަޙްމަދު މަގުން ދުއްވާފައިދިޔަ އެމްއެންޑީއެފްގެ ވެހިކަލަށް ހަތަރު ސިގްނަލާއެކު ބަރުގޮނު އަޅަންޖެހުނީ ޢާންމުންގެ ކުޑަކުއްޖަކު އަވަސް ފަރުވާއަށް ހޮސްޕިޓަލަށް ގެންގޮސްދިނުމަށް މަގުމަތި ބަލަހައްޓަމުންދިޔަ ފުލުހުން އެދުމުން ކަމަށް އެމްއެންޑީއެފުން ބުނެފިއެވެ.
އެމްއެންޑީއެފުން މިފަދައިން ބުނީ މިކަމާއި ގުޅިގެން އާންމުންގެ މީހަކު ކުރި ޓްވީޓަކާ ގުޅިގެން މީޑިއާތަކަށް ހިއްސާކުރި މައުލޫމާތުގައެވެ.
އެމްއެންޑީއެފުން ބުނީ އެ ކުޑަކުއްޖާ ހޭނެތި އަވަސް ޞިއްޙީ ފަރުވާދިނުމަށް އޭޑީކޭ ހޮސްޕިޓަލަށް ގެންގޮސްދިނުމަށް ފުލުހުން އެދިފައިވާކަމަށެވެ. އެވަގުތަކީ އެސަހަރައްދަކީ ކާރޫބާރޫ ވަރަށްބޮޑު ވަގުތެއް ނަމަވެސް ވެހިކަލްގެ ޑްރައިވަރު ފުރަތަމަ މަސައްކަތްކުރީ ބަރުގޮނު ނާޅައި ހަތަރު ސިގްނަލް ޖައްސައިގެން ވީ އެންމެ އަވަހަށް ހޮސްޕިޓަލަށް އެ ކުއްޖާ ގެންދެވޭތޯ ކަމަށް އެމްއެންޑީއެފުން ބުނެފައިވެއެވެ.
ހަތަރު ސިގްނަލް ޖެއްސި ނަމަވެސް ކުރިއަށްދެވޭގޮތްނުވެ، ކުއްޖާގެ ޙާލަތު އިތުރަށް ގޯސްވާތީ ބަރުގޮނު އަޅަންޖެހުނީކަމަށް އެމްއެންޑީއެފުން ބުނެފައިވެއެވެ. ހަތަރު ސިގްނަލާއެކު ބަރުގޮނު ޖައްސައިގެންވެސް އޭޑީކޭ ހޮސްޕިޓަލާއި ހަމައަށް ދިއުމަށް 15 މިނެޓް ހޭދަވިކަމަމަށް އެމްއެންޑީއެފުން ވަނީ ފާހަގަކޮށްފައެވެ.
މިކަން ހިނގާފައިވަނީ 21 އޭޕްރީލް ވަނަ ދުވަހުގެރޭ ސިފައިންގެ ދުވަހާއި ގުޅިގެން ހަވާ އެރުވުމުގެ ހަރަކާތް ކުރިއަށްގެންދިއުމުގެ ފަހުންނެވެ.
